كاپتنێن زاخۆ و هه‌ولێرێ گه‌شبینن سێ خالان بده‌ستڤه‌بینن

كاپتنێن زاخۆ و هه‌ولێرێ گه‌شبینن سێ خالان بده‌ستڤه‌بینن

وار – دهوك :

بڕیاره‌ ئه‌ڤرۆ رۆژا سێ شه‌مبى هه‌ر پێنح یاریێن دى ژ گه‌را ئێكێ یێن كۆما دووێ ژ خولا ئیراقێ یا ته‌پاپێى بۆ یانه‌یێن پلا نایاب بهێنه‌كرن، ژ گرنگترین یارییان یانه‌یا زاخۆ دێ مێڤاندارییا یانه‌یا مینا یا به‌سرایێ كه‌ت، بڕیاره‌ ئه‌ڤ یارییه‌ ل یاریگه‌ها ده‌لال ل باژێرێ زاخۆ بێى جه‌ماوه‌ر بهێته‌ كرن، ئه‌ڤ چه‌نده‌ لدویڤ بریارا ئێكه‌تییا ته‌پاپێى یا ئیراقێ ئه‌وا هاتیه‌ سه‌پاندن لسه‌ر یانه‌یا زاخۆ ژ ئه‌گه‌رێ ره‌فتارێن جه‌ماوه‌رى د یارییا زاخۆ د ڤه‌كرنا یاریگه‌ها وان یا ده‌وله‌تى به‌رامبه‌ر هه‌لبژارتیێ ئیراقێ، ژلایه‌كێ دویڤه‌ یانه‌یا هه‌ولێر دێ مێڤاندارییا یانه‌یا به‌غدا ل یاریگه‌ها شه‌هید فرانسۆ هه‌ریرى كه‌ت و شورته‌ دێ یارییه‌كا بهێز به‌رامبه‌ر جه‌وییه‌ كه‌ت، سیناعه‌ دێ حدوود مێڤانكه‌ت و نه‌جه‌ف دێ بیته‌ مێڤانا كه‌ربه‌لا و هه‌موو یارى لده‌مژمێر 3:30 دێ هێنه‌كرن.
داكو بزانێن هه‌دو نوونه‌رێن هه‌رێما كوردستانێ د كۆما دووێ دا یانه‌یێن زاخۆ و هه‌ولێرێ بۆ یاریێن خۆ چ به‌رهه‌ڤی كرینه‌ دڤێ راپۆرتێدا بخوینن:
لده‌ستپێكێ كاپتنێ یانه‌یا زاخۆ جاسم محه‌مه‌د حاجى دبێژیت، براستى ده‌ستپێكا خولێ یه‌ و یارییا ئێكێ و هه‌موو ده‌مان یارییا ئێكێ تایبه‌تمه‌ندیا خۆ یاهه‌ى، ژبه‌ركو چو یانه‌ و یاریكه‌ر ئاستێ ئێك و دوو نزانن و یارى به‌رامبه‌ر ئێك نه‌كرینه‌، به‌لێ بلا ئه‌م دبیر نه‌كه‌ین سێ خالێن یارییا ئێكێ پالده‌ره‌كێ سه‌ره‌كى یه‌ بۆ هه‌ر تیمه‌كێ بۆ بلندكرنا زاخا یاریكه‌رێن وان، هه‌رچه‌نده‌ یاریێن مه‌ دێ بێ جه‌ماوه‌ر هێنه‌ كرن و ئه‌ڤێ ژى دێ كارتێكرنا خۆ لسه‌ر ده‌رون و ئاستێ یاریكه‌ران كه‌ت، به‌لێ مه‌ هزر دڤێ یه‌كێ دا كریه‌ كو كار و پلان و ئارمانجا مه‌ بۆ ڤێ یاریێ و هه‌موو یاریێن دى سه‌ركه‌ڤتن و سێ خالن، لسه‌ر مه‌ هه‌موویان پێدڤییه‌ د رژدبین لسه‌ر بده‌ستڤه‌برنا سێ خالان و ژ ده‌ستدانا هه‌ر خاله‌كێ بتایبه‌ت دناڤ یاریگه‌ها مه‌دا دێ ب گرانى لسه‌ر مه‌ راوه‌ستیت و پێنه‌ڤێت مه‌ باوه‌رییه‌كا مه‌زن ب شیانێن یاریكه‌رێن خۆ هه‌یه‌ و هه‌ر وه‌سان شاره‌زاهییا راهێنه‌رى.
ژلایه‌كێ دویڤه‌ سه‌رهه‌نگ موحسن كاپتن و گۆلچیێ یانه‌یا هه‌ولێرێ لدۆر به‌رهه‌ڤیێن تیما خۆ دبێژیت، پێنه‌ڤێت یارییا ئێكێ بۆ هه‌موو تیمان یا ب زه‌حمه‌ته‌، ژبلى هندێ یارییا مه‌ دگه‌ل ئێك ژ تیمێن بهێزه‌ ئه‌وژى یانه‌یا به‌غدایه‌، به‌لێ مه‌ باوه‌رییه‌كا مه‌زن ب تیما خۆ هه‌یه‌ كو دێ سه‌ركه‌ڤتن و سێ خالێن ڤێ یاریێ بده‌ستخۆڤه‌ ئینین، بتایبه‌ت پشتى گرێدانا هه‌ڤبه‌ستێ دگه‌ل چه‌ند یاریكه‌رێن پیشه‌كار و زێده‌بارى دو یاریكه‌رێن كورد یێن خولا ئه‌لمانیایێ كو باشترین پالده‌ره‌ بۆ تیمێ، هه‌ر وه‌سان دوهى هه‌ڤبه‌ست دگه‌ل ئێكێ ژ باشترین یاریكه‌رێن هه‌لبژارتیێ ئیرانێ ئه‌وژى یاریكه‌ر میلاد زه‌ینه‌پۆر مه‌نسوره‌ كو د هێلا ناڤین یاریێ دكه‌ت، دیسان سه‌رهه‌نگى دیاركر ژى كو راسته‌ پتریا یاریكه‌رێن مه‌ خۆمالى نه‌ و كێم شاره‌زاهى د خولا ئیراقێ دا هه‌یه‌، به‌لێ ب هاریكارییا هه‌ڤالێن خۆ یێن كه‌ڤن و خۆدان شاره‌زاهییه‌كا باش دێ شێیین ناڤێ یانه‌یا هه‌ولێرێ بلند كه‌ین و بۆ هه‌موو ئیراقێ دیار كه‌ین كو ئاستێ یاریكه‌رێ كورد ژئ استێ چوو یاریكه‌رێن دى كێمتر نینه‌ ئه‌گه‌ر باشتر نه‌بیت، زاخا یاریكه‌رێن مه‌ یا بلنده‌ و یێ گه‌شبینم كو دێ ئه‌ڤرۆ ئێكه‌م سێ خالان بده‌ستخۆڤه‌ به‌ین و جه‌ماوه‌رێ خۆ رازى كه‌ین.
تێزانین هه‌موو یارى ل ده‌مژمێر 3:30ێ ئێڤارى دی هێنه‌ كرن.

بابه‌تێن ب ڤێ مژارێ ڤه‌ گرێدای