كاریگه‌رییا كریارا جنسی لسه‌ر مرۆڤى

كاریگه‌رییا كریارا جنسی لسه‌ر مرۆڤى

 

cvak

وار – دهۆک :

سێکس ب گشتی ئێكه‌ ژ گرنگیێن ھەموو مرۆڤان و پێنجەم تشتێ ھەرە گرنگێن هه‌ر مرۆڤه‌كییه‌ كو ل پشتى، ھەوا، ئاڤ، خوارن و نڤستنێ دهێت. وەکو چاوا کەسه‌ک تێنی دبیت، ھەر چه‌ند خوارن ژى لبه‌ر سینگێ وى بیت، تێناتییا وى ناشكێینت، یان خه‌ما كه‌سه‌كى بهێت، هه‌موو تشته‌ك بۆ وى بهێنه‌ دابینكرن، نه‌شێن پێدڤییا وى یا خه‌وێ ڤه‌ڕه‌ڤینن، سێكس ژى ب هه‌مان ئاوایه‌.
جوتبوون یان كریارا سێكسى پشکدارە د رێکخستنا ژیانا رۆژانەیا مه‌ دا، ئه‌ڤه‌ ژى ل گۆره‌ى ڤه‌كۆلینه‌كا زانستى یا گه‌له‌ك هوور هاتییه‌ سه‌لماندن كو سێكس رێگره‌ ژ گه‌له‌ك نه‌خوه‌شییان و چاره‌سه‌رییا گه‌له‌ك نه‌خوه‌شییانه‌ ژى.
دکتۆرە میریا لۆکاس کو بسپۆڕه‌کا بەڕازیلییە، د ڤه‌كۆلینه‌كێ دا كو دگەل لژنه‌یه‌كێ به‌رهه‌ڤ كرییه‌، رادگەهینیت کو جوتبوون ئانكو كریارا سێكسى ب تنێ خالا ڤه‌كرنا پەستانا تەوژما ھۆڕمۆنێ نینە د له‌شێ مرۆڤى دا، یان ده‌ربازكرنا چەند ده‌مه‌كێن ب تام نینه‌ دگه‌ل به‌رانبه‌رێ خوه‌ دا، به‌لكو چه‌ندین قازانجان دگه‌هینته‌ ساخله‌مییا مرۆڤى، ژ وان ژى مفایێ جەستەیی و مفایێ دەروونی.
ئه‌وا د ڤێ ڤه‌كۆلینا به‌رازیلى دا دهێته‌ باسكرن، جووتبوونه‌ نه‌كو سێكس ب ئاوایه‌كێ گشتى، ژبه‌ركو ده‌ستپه‌ر ژى د خانه‌یا سێكس دا دهێته‌ هژمارتن، لێ ده‌ستپه‌ر مرۆڤى ژ پترییا مفایێن كریارا سێكسى بێبه‌هر دكه‌ت، ب تایبه‌تى مفایێن ساخله‌میێ. د هه‌مان ڤه‌كۆلیان دا هاتییه‌، ”ئه‌م باسێ چەنداتیێ ناکەین، به‌لكو باسێ چاوانیێ دکەین، د كریارا سێكسى دا ماددەیێ (بۆلاتین) د خوینێ دا زێده‌دبیت، لێ د دەستپەڕێ دا گۆڕانکاری ب سەر خوینێ دا ناھێت، ھەر وەکو چاوا ئەو ھەستێ تێربوونا ل پشتى كریارا سێكسى دهێت، گه‌له‌ك كوورتره‌ ژ وێ ئێكا ل پشتى ده‌ستپه‌ڕێ هه‌ست پێ دكه‌ى، د ڤێ ئێكێ ژى دا زه‌لام و ژن وه‌كو ئێكن”.
ئه‌ڤ خالێن ل خوارێ گرنگترین مفایێن كریارا سێكسینه‌ كو وێ ڤه‌كۆلینا هان یا به‌رازیلى نیشان داینه‌:
ئێکەم: هاتییه‌ سه‌لماندن كو 3 جاران ئه‌نجامدانا كریارا سێكسى د حه‌فتییه‌كێ دا ب ئاوایه‌كێ بەردەوام، ب رێژەیا 50٪ێ سه‌ده‌ما جەلتەیا دلى کێمدكه‌ت، لێ ب به‌روڤاژى وێ، ئانكو دوورکەڤتن ژ كریارا سێكسى، مرۆڤ تووشی پەستانا تووڕەیی و بێزاری و خەمۆکیێ دبیت و هه‌تا مرۆڤ نزانیت چاوا سه‌ره‌ده‌ریێ دگه‌ل ده‌ر و پشتێن خوه‌ بكه‌ت.
دووەم: د ناڤبه‌را ھوش و سۆزداریێ دا رێکخستنه‌كا بەرچاڤ دروست دکەت کو ب سه‌ده‌ما وێ ئێكێ مرۆڤى د تەرازوویەکا دروست دا دھێلیت.
سێیەم: ب ئێك ژ باشترین ئارامكه‌رێن دەروونێ مرۆڤێ دهێته‌ دانان، ئەو بێهنڤه‌دان ژى كو د كریاره‌كا سێكسى دا ب ده‌ست ته‌ دكه‌ڤیت، وه‌كهه‌ڤه‌ دگه‌ل خوارنا دنکه‌کا ڤالیۆما 10 ملگ، ئه‌ڤه‌ ژبى وێ ئێكێ كو ڤالیۆمێ زیانێن وێ ژ مفایێن وێ پترن.
چوارەم: ب ئاوایه‌كێ ئێكسه‌ر رێژەیا ھەستکرن ب بەختەوەریێ د مرۆڤى دا زێده‌دكه‌. ڤه‌كۆلینان ده‌رئێخستییه‌، ئەو هه‌ڤژینێن ب ڤى ئاواى به‌رده‌وام كریارا سێكسى دكه‌ن، رێژه‌یا به‌خته‌وه‌رییا وان 60%ێ ژ یێن دى پتره‌.
پێنجەم: كریارا ب ئاوایێ ل سه‌رى هاتییه‌ دیاركرن، مرۆڤى ب سه‌ر تووڕەبوون و شه‌پرزه‌یێ دا زالدكه‌ت، و فاكته‌ره‌ بۆ وێ ئێكێ كو مرۆڤ بشێت ب ئاوایه‌كێ ئه‌رێنى هزربكه‌ت.
شەشەم: مفا بۆ پیستێ ژنێ ھەیە، نەرم و ساخله‌م دكه‌ت، کو ب باشترین کرێمان ئەڤ ئێكه‌ ب ده‌ست ته‌ ناكه‌ڤیت، ئه‌ڤه‌ ژبلى وێ ئێكێ كو ل گۆره‌ى ڤه‌كۆلینه‌كا ساخله‌میێ یا نوو ئاشکرابوویە، تۆڤێ زه‌لامى ژ هه‌ر چ کرێمه‌ما سه‌ر و چاڤان باشترە بۆ ژنێ و گەنجاتیێ دھێلیت و ناهێلیت چرچوون زوو بكه‌ڤیته‌ سه‌ر و چاڤان.
حەفتەم: ئەو خوهدانا د ده‌مێ كریارا سێكسى دا په‌یدادبیت، رێكخه‌ره‌كا رێکخەرێکی سروشتییە بۆ ڤه‌كرنا كونكێن پیستى و پێدانه‌ڤه‌یا ئۆکسجینا ساخله‌م تەندروست.
ھەشتەم: د حه‌فتیێ دا 3 جاران ئه‌نجامدانا كریارا سێكسى، ژبه‌ر وێ لڤینا د وى ده‌مى دا دهێته‌كرن، وه‌كهه‌ڤه‌ ب 40٪ێ یا وان مەشق و راھێنانێن وەرزشى كو ب ئاوایەکێ ئەکادیمی ئه‌نجام دده‌ى، له‌و هه‌رده‌م شیره‌ت ل هه‌ڤژینان دهێته‌كرن كو شێوازێن لڤینان د ده‌مێ كریارا سێكسى دا بگوهۆڕن و پێگیرنه‌بن ب ئێك شێوار.
نه‌هەم: دبیته‌ فاكته‌رێ ب هێزبوونا ماسۆلکان، وه‌ل مرۆڤى دکه‌ت كو د چاڤێن خه‌لكى دا زێده‌تر بالكێش بیت.
دەهەم: مفاى ب تمامى دگه‌هینته‌ هه‌موو هه‌ستێن مرۆڤى، ب تایبه‌تى هه‌ستێ بێهنكرنێ.
یازده‌هەم: ل گه‌له‌ك ژ هه‌ودانێن له‌شى مرۆڤى دپارێزیت، ب تایبه‌تى هه‌ودان و نه‌خوه‌شیێن میزه‌لان.
دوازده‌هەم :رێژەیا کۆلیسترۆل د له‌شى دا کۆنتڕۆل دكه‌ت.
سێزدەهەم: سێکس ب چه‌كه‌كێ كاریگه‌ر دهێته‌ دانان بۆ به‌رهنگاربوونا پرۆتستاتێ ژ زه‌لامان و په‌نجه‌شێرا رەحمى ژ خانمان.

بابه‌تێن ب ڤێ مژارێ ڤه‌ گرێدای