كاریزما بارزانی بۆ ڤێ قوناغا هه‌رێما كوردستانێ پێدڤییه‌

كاریزما بارزانی بۆ ڤێ قوناغا هه‌رێما كوردستانێ پێدڤییه‌

حه‌سه‌ن فه‌تاح  :

بابه‌تێ درێژكرن و درێژنه‌كرنا ده‌مێ سه‌رۆكاتییا مه‌سعوود بارزانی وه‌ك سه‌رۆكێ هه‌رێما كوردستانێ، نها بوویه‌ مژارا گه‌رما رۆژه‌ڤا ئه‌ڤرۆ یا جادده‌یا باشۆرێ كوردستانێ، سیاسه‌تڤان و چاڤدێرێن سیاسی ژی لسه‌ر لاپه‌رێن رۆژنامه‌ و ئه‌كرانێن تیڤییان، نانێ خوه‌ پێ دخۆن، دیسا جاران ئالیێن سیاسی ژی بۆ لسه‌رئێكزێده‌كرنێن حزبایه‌تی كارى پێ دكه‌ن. هه‌ر چاوا بیت، هنده‌ك خال هه‌نه،‌ دخوازم ئه‌ز ژی د روانگه‌ها خوه‌ یا كه‌سۆكیدا لسه‌ر ڤێ پرسێ ب كورتی به‌رچاڤ بكه‌م، ئه‌گه‌ر مرۆڤ نه‌ ب دیتنه‌كا دووربین، به‌لكو نێزیكبین ته‌ماشه‌ی ڤێ قووناغا هه‌رێما كوردستانێ ل ده‌ما چه‌ند سالێن بۆری بكه‌ت، دێ بینیت ئه‌گه‌ر رۆل و هه‌لوه‌ست وه‌رگرتنا بارزانی نه‌با، ره‌نگه‌ نووری مالكی سه‌رۆك وه‌زیرێن پێشتر یێ ئیراقێ، گه‌له‌ك ده‌ستتێوه‌ردان و مایتێكرن د هه‌رێمێدا كربان و ئه‌و پێگه‌هێ هه‌رێمێ هه‌ی سست و لاوازكربا و ده‌ستێ خوه‌ بسه‌ر چومكێ ده‌ستهه‌لاتا هه‌رێمێ ژی دا كێشابا، لێ ئه‌گه‌ر بیرا خوه‌ ل گۆتارا سه‌رۆكێ هه‌رێمێ بینین ل نه‌ورۆزا سالا 2012ێ، بارزانی ب ئاشكرایی هنده‌ك هێل و سنۆر بۆ مالكی دیاركرن كو رێكێ نه‌ده‌تێ زێده‌گاڤیێ لسه‌ر مافێن ده‌ستۆری و سه‌روه‌رییا هه‌رێمێ بكه‌ت، دوماهی چه‌كێ مالكی ژی، بڕینا بودجه‌ و مووچه‌یێ خه‌لكێ كوردستانێ بوو، حوكمه‌ت و گه‌لێ كوردستانێ ژی خوه‌ لبه‌ر وێ قه‌یرانێ راگرت و د ده‌ربازكرنا وێ قوناغێ دانه‌ و وێ ره‌فتارێ ژی خاله‌كا ره‌ش بۆ مالكی ل دیرۆكێ توماركر. دیسا د پێكئینانا حوكمه‌تا عه‌بادی ژی دا، ئالیێن كوردستانی كارێكته‌ره‌كێ سه‌ره‌كی بوون كو بێی كوردان ئالیێن ئیراقی ئه‌گه‌ر شیابان ژی حوكمه‌تا خوه‌ پێكبینن، دا كابینه‌یه‌كا په‌ككه‌فتی بیت و سه‌ركردایه‌تییا كوردستانی و ل پێشییا وان ژی، سه‌رۆكێ هه‌رێمێ ئاوا و مه‌رجێ پشكدارییا كوردان ئاشكراكر، عه‌بادی ژی عیبره‌ت بۆ خوه‌ ژ مالكی وه‌رگرت كو سیاسه‌ته‌كا میانره‌وتر به‌رامبه‌ری هه‌رێمێ و داخوازیێن كوردان نیشان بده‌ت، تا نها ژی عه‌بادی حسابه‌كا تایبه‌تتر ژ سه‌رده‌مێن مالكی و عه‌لاوی و جه‌عفه‌ری بۆ هه‌رێمێ دكه‌ت.
د شه‌ڕێ دژی داعشێ ژی دا، رۆل و سیاسه‌تا سه‌ركه‌ڤتییا بارزانی ئاشكراتر، هه‌تا بۆ جادده‌یا كوردستانی ژی، دیاربوو، ده‌ما شیایی ب كارێزما و په‌یوه‌ندیێن خوه‌ جیهانێ بینیته‌ سه‌ر هێلێ و هاریكاری و پشته‌ڤانییا نێڤده‌وله‌تی ژ روویێ سه‌ربازی و لوجستی و مرۆڤایه‌تی بۆ هه‌رێما كوردستانێ بده‌ستڤه‌ بینیت، ده‌ما مه‌ترسییا داعشێ گه‌هشتییه‌ ده‌ڤه‌رێن كوردستانی، زێده‌تری 60 وه‌لاتێن جیهانێ هه‌ڤپه‌یمانییا نێڤده‌وله‌تی ل دژی داعشێ پێكئینا و بۆمبه‌بارانا داعشێ هه‌تا ئه‌ڤرۆ ژی دكه‌ن، ب به‌رده‌وامی ژی هاریكارییا هه‌رێمێ دكه‌ن، ئه‌گه‌ر بزانین پێشتر داعشێ ل سووریێ و ناڤه‌راستا ئیراقێ و ئه‌نبار هه‌بوو، لێ ل ئاستێ نێڤده‌وله‌تی چو بزاڤێن دیار دژی وێ نه‌بوون. ژبلی ڤێ ژی، هه‌ر ژ ده‌ستپێكا هاتنا داعشێ و تا نها، بارزانی ل به‌ره‌یێن شه‌ڕی بوویه‌ و سه‌رپه‌رشتییا پلانێن شه‌ری و پێشمه‌رگه‌ی كرییه‌ كو هه‌بوونا وی ب خوه‌ ووره‌ و مورال دایه‌ پێشمه‌رگه‌ی ژی كو ب گیانه‌كێ خورتتر به‌رخوه‌دانێ بكه‌ت. ئه‌ڤ خاله‌ هه‌موو لسه‌ر كه‌توارێ ئه‌ڤرۆ دیارن و تێرا هندێ هه‌نه‌ كو پێدڤی نه‌كه‌ت مرۆڤ بچیت، لاپه‌رێن دیرۆكێ بخوینیت هه‌تا بزانیت خه‌بات و كارێزما بارزانی بۆ ئه‌ڤرۆیا كوردستانێ گونجاییه‌ یان نه‌، لێ ل ڤێرێ خاله‌ك دمینیت كو پێدڤییه‌ كادرێن پارتی ژی وه‌سا ره‌فتار و سه‌ره‌ده‌ریێ نه‌كه‌ن كو كه‌سایه‌تییا بارزانی د دیتنه‌كا حزبایه‌تیدا بچووك بكه‌ن، راسته‌ بارزانی سه‌رۆكێ پارتییه‌ و پارتی ژی مه‌زنترین حزبا باشۆرێ كوردستانێیه‌ ژ روویێ پێگه‌هێ جه‌ماوه‌ریڤه‌، لێ بارزانی سه‌رۆكێ گشت هه‌رێمێیه‌ ب هه‌موو هێز و ئالیێن علمانی، ئیسلامی، چه‌پ و راستڤه‌.

بابه‌تێن ب ڤێ مژارێ ڤه‌ گرێدای