قاره‌مان و باشترینێن كوردستانێ هاتنه‌ خه‌لاتكرن

قاره‌مان و باشترینێن كوردستانێ هاتنه‌ خه‌لاتكرن

وار –  تاهر رێكانى :

د رێوره‌سمه‌كێ ژ هه‌ژى دا و ب به‌رهه‌ڤبوونا پارێزگارێ دهۆكێ و نوونه‌رێ وه‌زاره‌تا ره‌وشه‌نبیرى و لاوان و سه‌رۆك و ئه‌ندامێن ئێكه‌تییا ته‌پاپێى ل هه‌رێما كوردستانێ و هژماره‌كا باش ژ به‌رپرسێن دام و ده‌زگایێن وه‌رزشى ل پارێزگه‌ها دهۆكێ و نوونه‌رێ كۆمه‌لگه‌ها فاملى مۆل و جه‌ماوه‌ره‌كێ مه‌زن قاره‌مان و باشترینێن خولێن هه‌رێما كوردستانێ یێن ته‌پاپێى لسه‌ر ئاستێ یانه‌یێن پله‌یێن ئێكێ و نایاب یێن وه‌رزێ (2014-2015) هاتنه‌ خه‌لاتكرن.
لده‌ستپێكێ سه‌فین كانه‌بى سه‌رۆكێ ئێكه‌تییا ناڤبرى په‌یڤه‌ك خاند و تێدا سوپاسییا به‌رێز فه‌رهاد ئه‌مین پارێزگارێ دهۆكێ كر بۆ وێ پشته‌ڤانییا ل یانه‌یێن پارێزگه‌هێ كرى و بتایبه‌ت یانه‌یا دهۆكێ ئه‌وا پشكدارى د هه‌ردو خولێن ئیراقێ و كوردستانێ دا كرى و بتایبه‌ت خولا ئیراقێ كو گه‌هشتبوو دوماهیك ده‌رازینك به‌ره‌ڤ هه‌ڤركیێن ئێكه‌تییا ئاسیایێ، هه‌ر وه‌سان ده‌ستخۆشى ل هه‌موو یانه‌یێن پشكدارى د خولێن هه‌رێمێ دا كرى و دڤان كاودانێن به‌رته‌نگ شیاین به‌رده‌وامیێ بده‌نه‌ كاروانێ خولێ و تاكو ب سه‌ركه‌ڤتیانه‌ ب دوماهیك هاتى، هه‌ر وه‌سان ده‌ستخۆشى و پیرۆزباهى ل هه‌ر چار یانه‌یێن زێره‌ڤانى و دهۆك و گاره‌ و سولاڤ كر بو بده‌ستڤه‌برنا رێزێن ئێكێ و دووێ یێن خولێن پلا ئێكێ و دوو، هه‌ر وه‌سان پیرۆزباهى ل باشترینێن هه‌ردو خولان كر، دویڤدا ده‌ست ب به‌لاڤكرنا خه‌لاتان هاتنه‌ كرن.
قاره‌مان و باشترینێن خولا پلا نایاب:
یانه‌یا زێره‌ڤانی خۆدانا ناسناڤێن سێ وه‌رزان خه‌لاتێ رێزا ئێكێ وه‌رگرت.
یانه‌یا دهۆكێ خه‌لاتێ رێزا دووێ وه‌رگرت.
هه‌ر وه‌سان یاریكه‌ر عه‌بدولقادر تاها گۆلكه‌رێ خولا پلا نایاب ژ یانه‌یا برایه‌تى هاته‌ خه‌لاتكرن و هاوكار له‌تیف ژ یانه‌یا نه‌ورۆز باشترین یاریكه‌ر و ئیسماعیل محه‌مه‌د ژ هه‌مان یانه‌ وه‌كو باشترین گۆلچى هاتنه‌ خه‌لاتكرن.
قاره‌مان و باشترینێن خولا پلا ئێكێ:
یانه‌یا گاره‌ قاره‌مانا خولێ و بناسناڤى هاته‌ خه‌لاتكرن، هه‌ر وه‌سان یانه‌یا سۆلاڤ خه‌لاتێ رێزا دووێ وه‌رگرت.
شالاو عه‌باس باشترین یاریكه‌ر و گۆلكه‌رێ خولێ ب 11 گۆلان ژ یانه‌یا سیروانى نوو هاته‌ خه‌لاتكرن، هه‌ر وه‌سان رێباز یوونس باشترین گۆلچیێ خولێ هاته‌ خه‌لاتكرن.
داكو بزانین بۆچوونێن یاریكه‌ران و ئێكه‌تییا ته‌پاپێى به‌رامبه‌ر ڤێ خه‌لاتكرنێ چ بوون، چه‌ند بووچوونه‌ك هاتنه‌ وه‌رگرتن بڤى ره‌نگى بۆ رۆژنامه‌یا وار دبێژن:
لده‌ستپێكێ جه‌مال سلێمان كاپتنێ یانه‌یا گاره‌ دبێژیت، مه‌ گه‌له‌ك پێخۆشه‌ بڤى ده‌ستكه‌فتى و خه‌لاتى و ئه‌ڤه‌ خه‌ونا چه‌ند سالێن بۆرى بوو و سوپاس بۆ خۆدێ ئه‌م گه‌هشتینه‌ دناڤ تیمێن مه‌زندا، تاراده‌كێ ئه‌ڤ خه‌لاتكرنه‌ گه‌له‌ك یا ب رێكوپێك بوو، به‌لێ یا پێدڤى بوو ب شێوه‌یه‌كێ باشتر هاتبا كرن و پشتى یارییا دوماهیێ ئێكسه‌ر هاتباكرن دا خۆشیه‌ه‌كا دى بۆ یاریكه‌ران په‌یدا بیت، گۆتژى راسته‌ قه‌یرانا دارایى یا په‌یدابووى به‌لى هه‌ر چ نه‌بیت یا پێدڤیبوو خه‌لاتكرنه‌كا دارایى ل یاریكه‌ران هاتبا كرن داكو ببیته‌ تشته‌كێ كێم به‌رامبه‌ر ماندیبوونا وان یا ب درێژاهییا خولێ بێ به‌رامبه‌ر خۆ ماندوو كرى، داكو ببیته‌ پالده‌ر ل وه‌رزێن بهێت یاریكه‌ر پتر خۆ ماندوو بكه‌ت و ئاستى خۆ باشتر لێ بكه‌ت.
لدۆر ڤێ چه‌ندێ سه‌ركار عه‌زیز خان جێگرێ سه‌رۆكێ ئێكه‌تییا ته‌پاپێى گۆت، راسته‌ مافێ یاریكه‌ران كو ئه‌ڤ خه‌لاتكرنه‌ هه‌ر چ نه‌با پاره‌كێ كێم ژى دابا وان، به‌لێ نۆكه‌ چ پاره‌ لبه‌رده‌ستێ مه‌ نینه‌ و مه‌ نڤیساره‌ك یا دایه‌ وه‌زاره‌تێ كو بره‌ پاره‌یه‌كێ بۆ یانه‌یێن سه‌ركه‌ڤتى مه‌زێخین به‌لێ تا نۆكه‌ چ دیارنینه‌، ده‌رباره‌ى خه‌لاتكرنا پێش وه‌خت ژى گۆت، خول نه‌وه‌كى قاره‌مانییا یه‌ و دو تیم دگه‌هنه‌ یاریا دوماهیێ هه‌تاكو دوماهیك چركه‌ ژى هه‌ڤركی یا به‌رده‌وام بوو، له‌وا نه‌شێن ڤێ چه‌ندێ بكه‌ین.
ژلایه‌كێ دویڤه‌ شالاو عه‌باس باشترین یاریكه‌ر و گۆلكه‌رێ پلا ئێكێ گۆت، خه‌ونا هه‌ر یاریكه‌ره‌كێ یه‌ رۆژه‌ك بهێت ناسناڤه‌كێ بده‌ستخۆڤه‌ بینیت و ب سۆپاسیڤه‌ ئه‌ڤرۆ ئه‌ز شیام دو خه‌لاتان وه‌ربگرم، پێ نه‌ڤێت ئه‌ڤه‌ د زڤریت بۆ هاریكارییا هه‌ڤالێن من كو بووینه‌ هاریكار تاكو بشێم ڤان ده‌ستكه‌ڤتان بده‌ستڤه‌ بینم.
دیسان پیشه‌كارێ رۆژئاڤایێ كوردستانێ عه‌بدولقادر تاها گۆلكه‌رێن پلا نایاب ژ یانه‌یا برایه‌تى دبێژیت، ئه‌ز گه‌له‌ك یێ كه‌یفخۆشم كو ئه‌ڤه‌ دو ساله‌ دبمه‌ گۆلكه‌رێ خولێ، پێنه‌ڤێت ئه‌ڤه‌ دزڤریت بۆ وێ هاریكاریا یاریكه‌رێن یانه‌یا برایه‌تى و چێكرنا گۆلان بۆمن و ئه‌گه‌ر ب هاریكاریا وان نه‌با نه‌شێم ببمه‌ گۆلكه‌ر، دیسان ده‌رباره‌ى خولا هه‌رێمێ گۆت، هه‌رچه‌نده‌ قه‌یرانه‌كا مه‌زن لسه‌ر هه‌رێمێ بۆ به‌لێ ب هاریكاریا هه‌موو لایان به‌رده‌وامى پێ هاته‌ دان و تاكو ب سه‌ركه‌ڤتیانه‌ ب دوماهیك هاتى.
هه‌ر وه‌سان رێباز یوونس باشترین گۆلچیێ خولا پلا ئێكێ ژ یانه‌یا ئالتۆن كۆپرى گۆت، خه‌ونا من بوو ئه‌ڤ ناسناڤه‌ و گه‌له‌ك یێ كه‌یف خۆشم بڤێ چه‌ندێ و ب ئانه‌هیا خۆدێ دێ هه‌مى شیانێن خۆ مه‌زێخم ل وه‌رزێ بهێت لسه‌ر ڤى ئاستى بم و ببمه‌ باشترین گۆلچى د خولا پلا نایاب دا، لڤێره‌ من دڤێت سوپاسییا یاریكه‌رێن تیما خۆ دكه‌م بتایبه‌ت یێن هێلا به‌رگریێ كو بوونه‌ هاریكار بۆ من كو ژماره‌كا كێم یا گۆلان لسه‌ر من هاتینه‌ كرن و تاكو بۆیمه‌ باشترین گۆلچى، به‌لێ هیڤییا من ئه‌وه‌ پشته‌ڤانییا دارایى ژى ل یانه‌ و یاریكه‌ران بهێته‌ كرن، داكو به‌رده‌وامیێ بده‌نه‌ ئاستێ خۆ یێ باش.
لدوماهییا رێوره‌سمێن خه‌لاتكرنێ پیشانگه‌هه‌كا گرێداى وێنه‌یێن خولێن هه‌رێما كوردستانێ یێن هه‌رسێ پله‌یێن نایاب و پلا ئێك و پلا دووێ ژلایێ فۆتۆگراف بێستر دهۆكێ ڤه‌ هاتبوو به‌رهه‌ڤرك و ژلایێ پارێزگارێ دهۆكێ و سه‌رۆكێ ئێكه‌تییا ته‌پاپێى ڤه‌ هاته‌ ڤه‌كرن، كو تێدا هژماره‌كا باش یا وێنه‌یێن جوان بخۆڤه‌ گرتبوو.

بابه‌تێن ب ڤێ مژارێ ڤه‌ گرێدای