فێسـبۆك ئه‌لبۆما كوردانه‌

ئیشهات نوری عه‌بدال :

مێژوویا تۆرا كۆمه‌لایه‌تیا فێسبۆك Face Book, ژلایێ‌ قوتابیێ‌ گه‌نجێ‌ ئه‌مریكی ماركmark ڤه‌, ل زانكۆیا هارڤێرد Harvard ل رێكه‌فتی 4/2/2004ێ‌ هاتیه‌ ڤه‌دیتن، بنیازا وێ‌ یه‌كێ‌ داكۆ قوتابیێ‌ ناڤبری و هه‌ڤالێن خوه‌یێن زانكۆیێ‌, گرۆپه‌كێ‌ هه‌ڤپه‌یڤینێ‌ چێبكه‌ن Network Group كو برێكا تۆرا فێسبۆك وێنه‌یێن خوه‌ تێدا به‌لاڤه‌ بكه‌ن, هه‌ر وه‌ك ژ ناڤێ‌ خوه‌ خویا (فێسبۆك) ئانكو په‌رتۆكا دێمان. لێ‌ به‌ره‌ به‌ره‌ دگه‌ل وه‌رار و پێشڤه‌چوونا ته‌كنه‌لۆجیایێ‌ تۆرا ناڤبری ژی ئافراندن بخۆڤه‌ گرتن, حه‌یا كو ملله‌تان ئه‌ڤ تۆره‌ بخوه‌ كره‌ ژێده‌ر ژبۆ به‌لاڤكرنا زانیاریا, نووچه‌ و بابه‌تان, پێك گۆهارتنا هزر و په‌یامێن جڤاكی, هزر و بیرێن فه‌لسه‌فی و هتد.
لێ‌ مخابن كو مه‌ كوردان كۆتله‌ و پاشناڤێن عه‌شیره‌تگه‌ریێ‌ برێكا ڤێ‌ تۆرا ناڤبری ساخكرنه‌ ڤه‌, مه‌ ئه‌ڵبوم و وێنه‌یێن مالێن خوه‌ یێن بچووك, دناڤ ئه‌ڵبوما مالا مه‌زنا فێس بۆكی دا به‌لاڤه‌كرن, له‌ورا ژی مه‌ هه‌ر هێلا فێس بۆك, بتنێ‌ ژبۆ به‌لاڤكرنا وێنه‌یێن بێ رامان، داكو نیشانی خه‌لكێن دیتر بده‌ین.! ئێدی كا چه‌وا مه‌ لاوازی و یه‌ك-لایی ب رۆلێ‌ راگه‌هاندنێ ڤه‌ هه‌یه‌, هه‌ر وه‌ك ئه‌ڤرۆ ئه‌م دبینین كو ده‌زگه‌هێن راگه‌هاندنێ‌ پتر دئه‌كتیفن ل سه‌ر به‌رژه‌وه‌ندیێن كه‌سۆكی, پارتایه‌تی و هتد. و لبه‌ر ره‌نگڤه‌دانا هه‌مان ئاوێنه‌ دا پتر دزالن ل سه‌ر وه‌رگرێ‌ جڤاكێ‌ خوه‌! هه‌لبه‌ت ئه‌ڤ یه‌كه‌ ژی به‌رۆڤاژی وه‌لاتێن پێشكه‌فتییه‌, ژبه‌ر كو ده‌زگه‌هێن راگه‌هاندنێ‌ بمل بملێ‌ تۆرا ناڤبری و ب هه‌بوونا رۆلێ‌ خوه‌ یێ‌ كاریگه‌ر , و ب هه‌موو سازیێن سه‌ربخوه‌ یێن راگه‌هاندنی ڤه‌: ژبۆ یه‌كسانی و مرۆڤاتیێ‌, ژبۆ یه‌ك-ره‌نگی و یه‌ك-ده‌نگیێ‌ ژبۆ پێشڤه‌برنێن جڤاكی, ژبۆ پاراستنا خاك وكه‌لتۆرێن ملله‌تان و تا داویێ‌ كه‌فتینه‌ كاری.
بنێره‌ نها فێرخوازێن زمانێ‌ ئنگلیزی ل پرانیا كۆلیژێن بریتانیا ژبۆ بكارئینانا ئه‌رێنی یا (فێسبۆك)ی برێكا وانه‌یێن تایبه‌ت ڤه‌ دهێنه‌ فێركرن, وه‌ها پرس ژلایێ‌ مامۆستایێن پسپۆرڤه‌ دهێنه‌كرن, داكو ئارمانجێن هه‌بوونا پرۆفایلا مرۆڤی ئالو-گۆر بكه‌ن, دا بزانن مرۆڤێ‌ هه‌، ب ملله‌ت و كه‌لتورێن جڤاكێن خوه‌, ل چ ئاستێ‌ پێشكه‌فتنێ‌ دا دژین؟ ژبه‌ر تۆرا ناڤبری گرێدایی پارچێن گرنگێن ئاڤاكرنا ژیانا مرۆڤییه‌! لێ‌ مخابن لده‌ڤ مه‌ كوردان نه‌ وه‌ها یه‌, مه‌ دیتیه‌ بجاڤێن خوه‌، ئه‌و كوردێن ب ره‌وشه‌نبیر ژی هاتیه‌ ناسكرن, ل گه‌شتێن خوه‌ بۆ توركیا ,و لبه‌ر ئالایێ‌ توركیا, ل به‌ر وێنه‌یێ‌ ئه‌تاتۆك، وینه‌یێن خوه‌ كێشاندینه‌ دا كو بزانین یێ‌ ل توركیا, و برێكا تۆرا فێسبۆكی به‌لاڤه‌كرینه‌! ئه‌رێ‌ ما ئه‌ڤ نه‌ كێمبوونا ناخێ‌ كورده‌؟ لبن ئالایێ‌ ده‌وله‌تا تورك, چه‌ند كورد ژبرسا د زیندانانڤه‌ كوشتینه‌؟ ئه‌ڤ چه‌ند سالن به‌رڤه‌مایێن ئه‌تاتوركی, زمانێ‌ گه‌لێ‌ كورد قه‌ده‌غه‌ و بن پێكریه‌؟ ئێدی چما ئه‌م بكێشانا وێنه‌یێن خوه‌ ب بین كۆله‌ ل ژێر كارتێكرنێن نه‌رێنی ل سه‌ر سایكۆلۆجیا پێكهاتێن جڤاكێ‌ كورد؟ لێ‌ ژنه‌بوونا لێكۆلینێن مه‌یێن هه‌ڤپشك دگه‌ل هه‌ڤبه‌ركرنا ملله‌تێن پێشكه‌فتی. ئه‌م دێ‌ بێژین كو ب مخابنیڤه‌، هێشتا ژی مه‌ نه‌زانییه‌ تۆرا فێسبۆك ژبۆ پێشڤه‌برنێن جڤاكی, هونه‌ری, كه‌لتوری, یه‌كگرتنا زمانی, ئاڤاكرنێن هه‌ست و هشا نه‌ته‌وه‌یی, ناسكرنا داگیركه‌رێ‌ ملله‌تێ‌ كورد ,و بلندكرنا مۆرالا له‌شكه‌ری و تا داویێ‌ بكار بینین! حه‌یا رێكخراوێن مه‌ ژی نه‌زانییه‌ تۆرا ناڤبری بكاربینن كو مه‌ نها نێزیكی دوو هزار رێكخراوێن مرۆڤایه‌تی لكوردستانێ‌ یێن هه‌ین, لێ‌ مه‌ ته‌مه‌ت هه‌ر دو تبلێن ده‌ستێن خوه‌ ژی نه‌دیتیه‌, وه‌كو رێكخراوا نووژین ژبۆ دیمۆكراسیكرنا خێزانێ‌, په‌یام و چالاكیێن خوه‌, برێكا پێچێن خۆ یێن تایبه‌ت ل سه‌ر تۆرا جڤاكییا فێسبۆك به‌لاڤ بكه‌ن, هه‌لبه‌ت مه‌به‌ستا مه‌ نه‌ بانگه‌شه‌كرنه‌ ژبۆ رێكخراوا ناڤبری, لێ‌ نه‌ خڕابه‌ كۆ مرۆڤ “هه‌ر تشته‌كی ل تشته‌كی بزانیت و ڤی تشتی ل هه‌می تشتێن دی بزانیت” به‌س لێ‌ نوزا كا ئه‌م دێ‌ شێین برێكا فێسبۆك, تشته‌كی ژ ئه‌لبۆمێن كوردان بزانین؟! دێ‌ هه‌ما بلا فێسبۆك ژی ئێشه‌ك بیتن وه‌ك وان هه‌موو ئێشێن مه‌ ل كوردستانێ‌ هه‌ین .

بابه‌تێن ب ڤێ مژارێ ڤه‌ گرێدای