فێسبۆكێ سه‌رۆكێ حكومه‌تێ

كارزان فه‌قى

پشتى بهارا عه‌ره‌بى، نها تۆرێن جڤاكى پتر ژ ده‌زگه‌هه‌كێ راگه‌هاندنێ رۆلێ خوه‌ دبنینیت، چۆنكى ئه‌و روودانێن د بهارا عه‌ره‌بى و پشتێ وێ چێبووین بوونه‌ ئه‌گه‌ر خه‌لك ژ بۆ بلاڤكرنا چالاكی و ستۆریێن خوه یێن‌ رۆژانه‌ پتر په‌نایێ ببه‌نه‌ به‌ر تۆرێن جڤاكى یێن وه‌كو فێسبۆك و ئنستاگرام و تویته‌ر.. هتد. ل كوردستانێ ژى هه‌روه‌سا بوویه‌ ئالاڤه‌كێ گرنگێ په‌یوه‌ندیان دناڤبه‌را خه‌لكى دا، لێ ئه‌گه‌ر ته‌ماشه‌ بكه‌ین تۆرێن جڤاكى ل هه‌رێما كوردستانێ پتر د بیاڤێ بانگه‌شه‌ و پرۆپاگه‌نده‌یێن سیاسى دهێـته‌ بكارئینان، هه‌تا گه‌هشتیه‌ وى راده‌ى حزبێن سیاسى پێگه‌هێ خوه‌ جه‌ماره‌ى ل سه‌ر پیڤه‌رێ لایك و كۆمینتێن په‌یجێن خوه‌یێن فه‌رمى مقیاس دكه‌ن. بۆ نزیكبوونا ژ خه‌لكى ژى، ده‌مه‌كه‌ پرسیار و به‌رسڤێن دناڤبه‌را وه‌لاتییان و نێچیرڤان بارزانى سه‌رۆكێ حكومه‌تا هه‌رێمێ و جێگرێ سه‌رۆكێ پارتى دیموكراتى كوردستانێ دناڤا تۆرێن جڤاكى گه‌له‌ك دهێته‌ دیتن، پتریا ئه‌و پۆستێن كو من دیتین و د په‌یجێ فه‌رمی یێ نێچیرڤان بارزانى دا به‌لاڤبووینه‌، تاراده‌یه‌كێ دوورن ژ سیاسه‌تێ، چونكى خه‌لك هه‌موو چالاكیێن سیاسى یێن سه‌رۆكێ حكومه‌تێ د تیڤیان دا دبینیت، لێ ئه‌وێ گرنگه‌ ئه‌و پرسیاریێن ساده‌یێن كو ژ زارێ زارۆكه‌ك، یان سنێله‌یه‌ك یان ژنه‌كا دانعه‌مر دهێته‌ كرن، ده‌رباره‌ى ژیانا تایبه‌ت یا سه‌رۆكێ حكومه‌تێ یه‌، ده‌ما زارۆكه‌ك دخوازیت نهێنیا گرێدانا بۆینباغێ سه‌رۆكێ حكومه‌تێ بزانیت، ئه‌ڤه‌ بخوه‌ وێ یه‌كێ دگه‌هێنیت كو سه‌رۆكێ حكومه‌تێ دخوازیت پتر خوه‌ نزێكى خه‌لكێ خوه‌ بكه‌ت، یان ده‌ما ژنه‌كا دانعه‌مر پسیارا خوارنێ ژ بارزانیێ سه‌رۆك وه‌زیر دكه‌ت، ئه‌ڤه‌ بخوه‌ ئاماژه‌یه‌كه‌‌ كو ئه‌م دكارین تۆرێن جڤاكى نه‌ ب تنێ ژ بۆ تاوانباركرنا هه‌ڤدوو و شه‌رێ ئاخفتنان و په‌یڤێن كرێت بكاربینین، سه‌ره‌راى ڤان پرسیارێن ساده‌، گه‌له‌ك وه‌لاتیان پرسیارا ره‌وشا نهایا هه‌رێمێ و ره‌وشا سیاسى و چاركرنا قه‌یرانا دارایى و پرسا ئێكگرتنا هێزێن پێشمه‌رگه‌ى ژ سه‌رۆكێ حكومه‌تێ كریه‌ و به‌رسڤێن وى ژى ژ په‌یجێ وى یێ فه‌رمى به‌لاڤ بووینه‌. ئه‌ڤ روویێ تۆرێن جڤاكى بۆ من تشته‌كێ نوویه‌ و جوانه‌ ژى، چۆنكى هه‌تا نها من گرنژینێن به‌رپرسان و به‌رسڤا پرسیارێن نۆرمال و رۆژانه‌ ژ زارێ چ به‌رپرسێن كورد نه‌دیتبوو، یا من دیتبوو چ بوو؟ شكاندنا هه‌ڤدو، تاوانباركرنا هه‌ڤدو، كێمكرنا سمعه‌تا پارته‌كا سیاسى، هێرشكرنا سه‌ر پیرۆزیێن ملله‌ته‌كى، و گه‌له‌ك لایه‌نێن دى یێن نێگه‌تێڤ. هیچ ده‌مه‌كى په‌یجێ به‌رپرسه‌كێ گۆرانێ یان ئێكه‌تى نابینى كو پۆسته‌ك دناڤدا نه‌بیت دژى پارتى و سه‌رۆكێ حكومه‌تا هه‌رێمێ، له‌ورا ئه‌گه‌ر تا نها هه‌موو ئه‌و حزبێن دژه‌ پارتى تۆرێن جڤاكى یێن خوه‌ ژ بۆ دژاتیكرنا حكومه‌تێ بكارئینابیت، لێ سه‌ر‌ۆكێ حكومه‌تێ د وى ئاستى دا چ پۆست نه‌كرن، به‌لكو ب كریار نیشاندا كو ئه‌و دخوازیت ره‌وشا ئابوورى و ده‌روونى یا خه‌لكێ كوردستانێ به‌ره‌ف باشیێ ببه‌ت، به‌لگه‌ ل سه‌ر ڤێ گۆتنێ ژى ئه‌وه‌ ده‌ما بارزانیێ سه‌رۆك وه‌زیر د خه‌ما خه‌لكێ خوه‌ دا وه‌لات وه‌لات دگه‌ریا ژبۆى كو دۆرپێچا سه‌ر كوردستانێ بشكێنیت و به‌غدایێ نه‌چار بكه‌ت هنده‌ك ژ مافێن خه‌لكێ هه‌رێمێ ره‌وانه‌ بكه‌ت، وى ده‌مى شاندێن حزبێن سلێمانى ل رێكا به‌غدایێ سرا گرتبوون ژ بۆى كو شیرتا ل عه‌بادى بكه‌ن سه‌ره‌ده‌ریێ ل گه‌ل حكومه‌تا هه‌رێمێ نه‌كه‌ت و هیچ كوژمه‌كێ پاره‌ى ره‌وانه‌كى كوردستانێ نه‌كه‌ت، لێ نها ئه‌م هه‌موو دزانیت بزاڤێن كى ب سه‌ر كه‌فت، ئه‌گه‌ر بۆ ڤێ یه‌كێ دانپێدانێ ب شكه‌ستنا خوه‌ ژى نه‌كه‌ن، باوه‌رى دانا خه‌لكێ هه‌رێمێ ب پارتى د هه‌لبژارتنێن 12ى گولانێ بخوه‌ ئاماژه‌یه‌كه‌ ژ بۆ سه‌ركه‌فتنا بزاڤێن سه‌رۆكێ حكومه‌تێ.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.