فلمێ “دوا رۆژه‌كانى رابردوو” د قۆناغا مۆنتاژى دایه‌

فلمێ “دوا رۆژه‌كانى رابردوو” د قۆناغا مۆنتاژى دایه‌

Capture

وار – نه‌وزاد ئامێدى :

تیپا خه‌نده‌ ل مه‌خموورێ مژوولى به‌رهه‌مئینانا كورته‌ فلمه‌كى نه‌. بابه‌تێ فلمى په‌روه‌رده‌یى یه‌ و ل سه‌ر به‌رده‌وامییا پرۆسه‌یا خواندنا زاڕۆیان و كاركرنا وان د بوارێن جودایێن ژیانێ یه‌ ب مه‌به‌ستا ڤێ چه‌ندێ كو قوتابی به‌رده‌وامیێ ب خواندنا خۆ بده‌ن.
ده‌رباره‌ى ڤى فلمى، دلدار خۆشناو سه‌رپه‌رشتێ ڤى گرۆپى بۆ رۆژنامه‌یا وار گۆت: ئه‌ڤ كورته‌ فلمه‌ د چارچۆڤێ به‌رنامه‌یێ كارێن تیپا خه‌نده‌ یا هونه‌رى ل باژێرێ مه‌خموورێ، ئه‌وا بۆ ئه‌ڤ ساله‌ داناى و دارێشتى و ل سه‌ر دچیت. ئه‌ز كورته‌ فلمه‌ به‌رهه‌مێ ڤێ تیپێ یه‌ و هه‌موو مه‌زاختیێن ڤى فلمى تیپا خه‌نده‌ یێن ئاماده‌كرین.
دلدارى زێده‌تر گۆت: ناڤێ ڤى فلمى “دوا رۆژه‌كانى رابردوو”یه‌. بابه‌تێ ڤى فلمى بابه‌ته‌كێ په‌روه‌رده‌یى یه‌ و چیرۆكا وى ل سه‌ر خواندنا قوتابییان و به‌رده‌وامییا وان ل سه‌ر خواندنێ یه‌. هه‌ر وه‌سا ل سه‌ر كاركرنا وان زاڕۆیانه‌ ئه‌وێن ژ خواندنێ هاتینه‌ دابڕین و نها د بوارێن جودایێن ژیانێ ب كارنێ ڤه‌ د مژوولن و قوتابخانه‌یا خو بجهـ هێلاینه‌.
تیپا خه‌نده‌ یا مه‌خموورێ تیپه‌كا هونه‌رى یه‌ و خودان مووله‌تا فه‌رمى ژ وه‌زاره‌تا ره‌وشه‌نبیرى و هونه‌رى یه‌. ئه‌ڤێ تیپێ هژماره‌كا زێده‌ یا كار و چالاكیێن هونه‌رى د بوارێن جودایێن هونه‌ر ئه‌نجامداینه‌. ئه‌ڤ كورته‌ فلمه‌ دوماهى به‌رهه‌مێ ڤێ تیپێ یه‌.
ده‌رباره‌ى كارێن هونه‌رى یێن ڤى كورته‌ فلمى، دلدار خۆشناوى گۆت: فلمێ “دوا رۆژه‌كانى رابردوو” ژ سیناریۆ و ده‌رهێنانا “كارزانێ مامه‌ند بیران” یه‌ و ژ وێنه‌گرتنا “بارزان ساله‌یى” یه‌. وێنه‌گرتنا ڤى فلمى هه‌موو دناڤ باژێرێ مه‌خموورێ دایه‌.
ناڤبرى زێده‌تر گۆت: د ڤى فلمى دا 10 ئه‌كته‌ر ژ وان “جه‌لال خه‌یلانی، ئه‌حمه‌د ره‌شید، دلدار خۆشناو، كامل ئیبراهیم، بورهان یوسف، عه‌بدوللا بالانی، ره‌شید ئه‌حمه‌د، ئه‌حمه‌د جه‌لال، عه‌لى كه‌مال، یوسف جه‌عفه‌ر” و نێزیكى 60 كۆمبارسان تێدا پشكدارن.
هه‌ژى ئاماژه‌ پێدانێ یه‌ كو پشتى ئازادكرنا باژێرێ مه‌خموورێ، ئه‌ڤێ تیپێ ب شه‌ڤێ ل سه‌ر جادده‌یێن ڤى باژێرێ شانۆگه‌ریا “شه‌هید بوون له‌ پێناو كوردستان سه‌ربه‌رزییه‌‌” پێشكێشكربوو.
ده‌رباره‌ى ڤێ شانۆگه‌ریێ و مه‌به‌ستێن پێشكێشكرنا وێ، سه‌رپه‌رشتێ ڤێ تیپێ گۆت: ئه‌ڤ شانۆگه‌ریه‌ شانۆگه‌رییه‌كا سه‌ر جادده‌یان بوو كو ئێكراست ل شه‌ڤا ئازادكرنا باژێرێ مه‌خموورێ مه‌ ل سه‌ر جادده‌یێن باژێرى پێشكێشكر. ئه‌ڤ شانۆگه‌ریه‌ ژ به‌رهه‌مێ تیپا خه‌نده‌ بوو و ب پشكدارییا 11 ئه‌كته‌ران بوو.
ناڤبرى زێده‌تر گۆت: مه‌ ژ پێشكێشكرنا ڤێ شانۆگه‌ریێ دو مه‌به‌ست هه‌بوون، ئێك بلند راگرتنا رۆلێ مه‌زنێ پێشمه‌رگه‌ى د ڤێ سه‌ركه‌ڤتنا مه‌ن ئه‌وا پێشمه‌رگێن كوردستانێ تۆماركرى، مه‌به‌ستا دى ئه‌ڤه‌ بوو كو پاش ئازادكرنا باژێرێ، ژیان یا ئاسایى و به‌رده‌وامه‌. ئه‌م هونه‌رمه‌ند و هونه‌ر دوست سۆزێ دده‌ین كو ئه‌م پشتگیرێن هێزا پێشمه‌رگه‌ینه‌ و دێ د سه‌نگه‌رێ هونه‌رى دا به‌رده‌وام بین.

 

بابه‌تێن ب ڤێ مژارێ ڤه‌ گرێدای