فاكته‌رێن سەرکەڤتنا خودانێ تۆڕا جڤاكییا فەیسبووکى ئاشکرادبن

فاكته‌رێن سەرکەڤتنا خودانێ تۆڕا جڤاكییا فەیسبووکى ئاشکرادبن

Capture

وار  كوردۆ رۆژهات :

کارێ ته‌ یان کۆمپانیا ته‌، هه‌ر چو تشتێ بیت، بچووک بیت یان ته‌ کۆمپانییەکا زلهێز ھەبیت، بوارێ وێ ژى هه‌ر چو تشتێ بیت، پێدڤییە گوهـ ل ڤان شیره‌تان بگرى، هه‌تا وه‌كو مارک زوکربەرگ خودانێ تۆڕا جڤاكییا فەیسبووکى سه‌ركه‌ڤتى بى. ستیڤان ھاوبۆلد ھه‌ڤسەرۆکێ کۆمپانیا کارمۆدی ھەمان ئه‌و شیره‌ته‌ بجهئیناینه‌، هه‌تا بگرە ئه‌و خوه‌ ب خودانێ وان هزران دانیت و مارك ژى گوهێ خوه‌ دایه‌ شیره‌تێن وى. ھاوبۆلد شیا د هه‌یاما 6 مه‌هان دا، کۆمپانیا خوه‌ د 16 وه‌لاتێن جیھانێ دا بده‌ته‌ نیاسین ب بجهئینانا وان خالان.
ھاوبۆلد 5 پێنگاڤێن سەرەکی بۆ کارکرنێ نیشان دده‌ت، ھەر ژبه‌ر وێ ئێكێیه‌ ناسناڤێ کەسێ تایبەت ب وى هاتییه‌ به‌خشین، خودانێ فەیسبووکى ژى وه‌سا دبینیت، ھەر کەسه‌کێ دى ژى وان پێنگاڤان بجهبینیت، دێ شێت وێ سه‌ركه‌ڤتنێ ب ده‌ست خوه‌ڤه‌ ئینیت. ئه‌و پێنگاڤ ژى ئه‌ڤه‌نه‌:
کەس د سه‌ر کەسێ ڕا نینە
ئەو ھەستێ پلەبلند و پلەداریێ گه‌له‌ك جاران ب ترسه‌، پێدڤییە دگه‌ل به‌رچاڤكرنا رێزبەندییا ھەرەمییا کارمەندان، د ده‌مێ كارى دا هه‌ست ب وه‌كهه‌ڤیێ د به‌رپرسارییه‌تێ دا بكه‌ن، له‌و دڤێت ب هه‌مان ئاست به‌رێ خوه‌ بده‌یه‌ هه‌موو كارمه‌ندان و ب هه‌مان ھەستێ بەرپرسیارییەتێ ژى مامه‌له‌یێ د گه‌ل وان دا بكه‌ى. ب ترسترین شێوازێ کارى ئەوە، بەرپرسێ ھەر پشكه‌كێ خوه‌ ژ كارمەندێن جودا بکه‌ت و ل ئۆفیسه‌کا تایبەت روونیت، ئه‌ڤه‌ ژى شێوازێ نوویێ کارکرنێیە ل جیهان کو دڤێت خودانێ پرۆژه‌ى ب خوه‌ ژى د وێ هۆلێ دا روونیت كو كارمه‌ندێن وى لێ كاردكه‌ن‌، هه‌ما هه‌كه‌ر چو نەبیت ل ده‌مێ کارکرنێ دگه‌ل وان بیت. پێدڤییە کارمەند ل تەنشت ئێكدو بن، ڤێجا پله‌یا وان د ناڤ كۆمپانیێ دا هه‌ر چ بیت. دڤێت بەرپرسێن پشكان ژى ب تنێ ژ روویێ نیاسین و ماندووبوونا زێده‌تر ڤه‌ جوداهى دگه‌ل یێن دى هه‌بیت، نه‌كو چو جوداكاریێن دى د ناڤبه‌را وان دا هه‌بن. مارک ب خوه‌ ڤێ ئێكێ د ناڤ فه‌یسبووكى دا بجهدئینیت.
ب دەستێن خوه‌ كار بكه‌ن!
تو کو خودانێ کۆمپانییەکێی، بلا مەودایێ نێزیکییا ته‌ ژ ھەموو کارمەندان وەکو ئێك بیت، بزاڤێ نه‌كه‌ ب رێیا بەرپرسێن پشكان ڤه‌ هوورده‌كاریێن پشكێن وان بزانى، به‌لكو بلا ئێك ب ئێك کارمەندێن هه‌موو پشكان په‌یوەندییا ئێكسه‌ر دگه‌ل ته‌ هه‌بیت، هه‌تا هه‌كه‌ر ئه‌ڤ كاره‌ ته‌ گه‌له‌ك ماندوو ژى بكه‌ت، پێدڤییه‌ تو ب خوه‌ ئێكسه‌ر ب كاران رابى. ئه‌ڤه‌ ژى هاریكرنا گشت كۆمپانیێیه‌ بۆ گه‌شه‌پێدانا زێده‌تر، و ئه‌ڤه‌ دبیته‌ سه‌ده‌م كو كارمه‌ند زێده‌تر هه‌ست ب سه‌ركه‌ڤتنا راسته‌قینه‌ بكه‌ن.
لاوازی تاوانە!
پێدڤییە کارمەند و ڕێڤەبەر ژى هه‌ڤڕكیێ دگه‌ل خوه‌ ب تنێ بكه‌ن و بزاڤێن خوه‌ د پلانێن رۆژانه‌ دا زێده‌تر لێ بكه‌ن. رێڤه‌به‌ر و کارمەندێ سەرکەڤتى ئەو کەسە نینە کو کارێ رۆژانەیێ خوه‌ دكه‌ت، به‌لكو ئه‌وه‌ كو تشته‌كى زێده‌تر دكه‌ت ژ ئه‌وا رۆژانه‌ پێدڤییه‌ بكه‌ت. پێدڤییە ھەرگیز سار نەبى ژ كارێ خوه‌، هه‌تا ل پشتى وان هوورده‌ شكه‌ستنان ژى كو دروست دبن، ژبه‌ركو ھەر سەرکەڤتنه‌کا مه‌زن ژ ئه‌نجامێ چەندین تاقیکرن و شکه‌ستنێن بچووک دروست دبیت. مارک ھەموو جاران دبێژیته‌ کارمەندێن خوه‌، ”ئەو كارێ لسه‌ر ته‌ پێدڤى،‌ ب جوانى و پۆختى بكه‌، هه‌تا هه‌كه‌ر وه‌سا ببینى كو بچووك و ئاساییه‌، ژبه‌ركو ھەر ئەڤ کارێن بچووکن کو زێده‌هیێ ب پرۆژه‌ى دبه‌خشیت”.
له‌زاتى و بالکێشی!
ھەر چەند کارمەند و ڕێڤەبەر وه‌سا بزانن کو ئەو کارێ دکەن، بێ وێنەیە، دڤێت ڤێ ئێكێ بزانن کو هه‌ڤڕكى راناوه‌ستیت و نه‌نڤییه‌، نوكه‌ هنده‌ك كه‌س هه‌نه‌ كو دخوازن به‌رى هه‌وه‌ بكه‌ڤن، هنده‌ك كه‌س ژى هه‌نه‌ ل به‌رى هه‌وه‌نه‌ و دڤێت هوون هه‌ڤڕكییا وان بكه‌ن. بزاڤێ بكه‌ دگەل کارمەندێن خوه‌ کێمتر ب نامەیێن مۆبایلێ باخڤى، ئێكسه‌ر تو ب خوه‌ بێژه‌ وان، داكو هه‌ست ب له‌زاتییا بابه‌تى بكه‌ن و ھەردەم دڤێت بالکێشیێ ژى ژبیرنه‌كه‌ى، کارێ پۆخت و جوان، پێدڤییە بله‌زتر ژ هه‌موویان و بالکێشتر بده‌یه‌ خه‌لكى.
دلخوه‌ش و ب هیڤى به‌!
گه‌له‌ك گرنگە ده‌ما كو كاره‌كى دكه‌ى، تامێ ژێ وه‌ربگرى، له‌و پێدڤییه‌ لسەر ڕێڤەبەر و کارمەندان ژى پێکڤە خوه‌ ژ خەمۆکی و بێزاری و هه‌رفینێ ب دوور بگرن، ھەردەم ب وى چاڤى کاربکەن کو به‌رانبه‌رێن هه‌وه‌ ل چاڤه‌ڕێى هه‌وه‌نه‌ و باوه‌رییا تمام ب كارێ هه‌وه‌ هه‌یه‌، له‌و پێدڤییه‌ ب وێ باوه‌ریێ ڤه‌ كاربكه‌ن كو خودانێن به‌رپه‌رسیارییه‌تێنه‌.

بابه‌تێن ب ڤێ مژارێ ڤه‌ گرێدای