غه‌زوه‌یا كۆبانێ

زه‌رده‌شت :

ئه‌وه‌ى ده‌سته‌كا ب (داعش) هاتیه‌ ناسین جهه‌ك ل سۆریێ و ئیراقێ بۆ خوه‌ گرتى و ده‌وله‌تا خیلافه‌تێ راگه‌هاندى، به‌رده‌وام دو په‌یامان دشینته‌ ده‌رڤه. ئێك، بۆ چاڤترساندنا خه‌لكى چ یێن خوه‌جهـ چ یێن دوور، دڕنده‌ترین و هۆڤانه‌ترین حه‌ز و خوه‌ڕسكا كوشتنێ ب فلم نیشا جیهانێ دده‌ت، هه‌روه‌كو ره‌ڤده‌یه‌كا گورگان فێرى ته‌كنۆلۆجیا نوو ببن و ئێریشێن خوه‌ وێنه‌ بكه‌ن و ب رۆژێ په‌خش بكه‌ن!. دو، بۆ رازیكرنا بسورمانان و پتر جه‌ماندنا خوه‌به‌خشان، بزاڤێ دكه‌ن هه‌مى كریارێن وان كۆپیه‌ك د مێژوویا ده‌وله‌تێن ئیسلامىدا هه‌بت، ئانكو ب هه‌مان هۆڤانه‌ترین كوشتنێ ژى، په‌یامه‌كا ئاراسته-به‌ره‌ڤاژ دهنێرن كو ئه‌ڤێ د مێژوویێ دا روودایه‌، له‌و ره‌وایه‌.
من ئه‌ڤ پێشگۆتنه‌ ئینا داكو بێژم: وه‌كو ره‌فتارێن داعشێ هه‌مى گرێدایى مێژوویێنه‌، هه‌لبه‌ت ژ بلى وێنه‌كرنێ و په‌خشێ ئنته‌رنێتێ، پێدڤیه‌ هه‌مى كریارێن وێ ب سانه‌هى بهێنه‌ پێشبینكرن.. لێ وا دیاره‌ نه‌ نڤیسه‌ره‌كێ وه‌كو من، نه‌ژى سیاسیان و ئوستادێن مێژوویێ ئه‌ڤ راستیا ساده‌ لبه‌ر چاڤ گرتیه‌. ئه‌ڤه‌ ژى پارچه‌یه‌كه‌ چ ژ بێپلانى و نه‌هزركرنا مه‌، بلا دلێ كه‌سێ نه‌مینت، ئه‌ز ل پێشیێ.
داعش هه‌مى تشتان ب گۆره‌ى مێژوویێ دكه‌ت، غه‌زا یان غه‌زوه‌ پارچه‌یه‌كێ گرنگه‌ ژ مێژوویا ئیسلامى و ئه‌وا ل كۆبانێ رووداى، غه‌زوه‌یه‌كا ده‌وله‌تا داعشێیه‌، چ سه‌ر گربت یان نه‌، هند گرنگ نینه‌، گرنگ ئه‌وه‌، (ابو) تشته‌كى ب ده‌سته‌كه‌كا جه‌نگاوه‌رێن خوه‌به‌خشڤه‌ بۆ كوشتنێ دربه‌ك ل وه‌لاته‌كێ كافران دا.
بۆ داعشێ و بكوژێن وێ، ئه‌ڤه‌ ئه‌زموونه‌كا جانكىیه‌‌ و دوباره‌كرنا مێژوویه‌كا پیرۆزه‌ و ژیانه‌ د هه‌مان ره‌وشا ده‌ستپێكىدا.. ئه‌ڤ ڤه‌ژیاندنا مێژوویێ كلیله‌كا گه‌له‌ك گرنگه‌ بۆ فه‌همكرنا كریارێن ژ ئه‌ڤى ره‌نگى. نه‌به‌س داعشى، هه‌مى مرۆڤێن د مێژوویێ دا دژین، ژیانێ و خوه‌شیه‌كا ره‌ها ژ دوباره‌كرنێ دبینن، ئه‌ڤ دوباره‌كرنه‌ ئه‌وان هند شاد دكه‌ت، پێ دكه‌ڤنه‌ ره‌وشا د حالچۆنێ.
چاوا بت، غه‌زوه‌یا كۆبانێ، ده‌ستپێكه‌ك بوو بۆ كریاره‌كا چاڤه‌ڕێكرى، لێ وا دیاره‌ هێشتا شرۆڤه‌كار و ره‌وشه‌نبیر و سیاسیان، ب دروستى و ب كوورى داعش نه‌خواندیه‌، نه‌خوه‌ ئه‌ڤا ل كۆبانێ رووداى، پێدڤیه‌ هه‌رده‌م هاتبایه‌ پێشبینكرن و نه‌دبوو شه‌ڕڤان هیچ ده‌لیڤه‌یه‌كێ ل به‌رۆكێن شه‌ڕى بهێلن كو هنده‌ك داعشى ژێ ده‌ربازى ناڤ ئه‌ردێ رزگاركرى ببن و باوه‌ریا خه‌لكێ سڤیل سست بكه‌ن و پتر دوورى وه‌لاتى بكه‌ن. ب دیتنا من، كۆمكوژیا كۆبانێ ژ ئالیێ چاڤترساندنا خه‌لكىڤه‌ ژ گرتن و وێرانكرنا وێ گه‌له‌ك كامباختر بوو، چونكى بۆ ده‌مه‌كێ درێژ خه‌لكى باوه‌رى نامینت ڤه‌گه‌ڕنه‌ سه‌ر جهـ و وارێن خوه‌، نه‌خوه‌ پێدڤیه‌ هه‌ر گونده‌ك ببته‌ بنگه‌هه‌كێ له‌شكه‌رى و هه‌ر ماله‌ك ببته‌ كۆسك و چه‌په‌ره‌كێ شه‌ڕى.
ئه‌ز پێشبینیێ دكه‌م كو ئه‌ڤه‌ ده‌ستپێكه‌ك و ئه‌زموونه‌ك بوو بۆ جۆره‌كێ كه‌ڤنه‌-نوو ژ شه‌ڕى. وه‌كى داعش ب مێژوویێ و لسه‌ر مێژوویێ دژیت، دێ كریارا كۆبانێ ده‌هباره‌كه‌ت و نه‌دووره‌ بكه‌ت شێوازه‌كێ شه‌ڕكرنێ؛ گرۆپه‌كێ بچووك دێ خوه‌ ڤه‌دزته‌ ناڤ ده‌رڤه‌ى سنۆرێ داعشێ، دربه‌كێ كوژه‌ك دانت و ڤه‌گه‌ڕت یان خوه‌ ده‌ته‌ كوشتن.. و هند. دبت ئه‌وا ل كۆبانێ رووداى خوه‌جه‌ڕباندن بت بۆ هه‌مى وه‌لاتێن دى ل دۆرماندۆرى داعشێ.
گه‌له‌ك گرنگ بوو‌ سایكۆلۆجیا جه‌نگاوه‌رێن داعشێ هاتبایه‌ خواندن و مه‌ زانیبایه‌ بۆ جه‌نگاوه‌رێن داعشێ، ئه‌و خوه‌ ڤه‌دزینه‌ و ئه‌و كوشتن و تالانكرن و ترساندن، گوپیتكا ژیانێیه‌. ئه‌و مێژوویێ دوباره‌ دكه‌ن و تێدا دژین.. بۆ به‌رهه‌نگاربوونا ئه‌ڤان كریاران پێدڤیه‌ ئه‌م لسه‌ر ئه‌ڤان ته‌وه‌ران كار بكه‌ین، و خه‌لكى تێ بگه‌هینین، كانێ چاوا مرۆڤ دوباره‌ نابن، وه‌سا مێژوو ژى دوباره‌ نابت. ئه‌وا داعش دكه‌ت به‌س فلمه‌كێ مێژووییه‌ و داعشى تێدا ئه‌كته‌رن، به‌س مخابنى بویه‌ر و كریارێن فلمى هه‌مى راستن، ب سه‌رێ خه‌لكى دهێن.
ل دوماهیێ من دڤێت دوباره‌ بكه‌م و بێژم؛ وه‌كو داعش مێژوویێ دوباره‌ دكه‌ت، پێدڤیه‌ د ئه‌وى ده‌رگه‌هىرا ره‌فتار و كریارێن وێ بهێنه‌ خواندن و پێشبینیكرن، و غه‌زوه‌یا كۆبانێ راسته‌ كریاره‌كا له‌شكه‌رى و سنۆردار بوو، لێ پێدڤى بوو هاتبایه‌ پێشبینكرن و پووچكرن به‌رى دو سه‌د بێگونه‌هـ ببنه‌ قوربان و چیرۆكه‌كا دى ل شه‌ڤبێریێن گورگان زێده‌ ببت.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.