عه‌بادى ژ جێبه‌جێكرنا ده‌ستۆرێ عیراقێ دره‌ڤیت

به‌ده‌ل گابێركى

بزاڤێن سه‌رۆكێ حكومه‌تا هه‌رێما كوردستانێ نێچیرڤان بارزانى بۆ چاره‌سه‌ركرنا كێشه‌یێن دناڤبه‌را هه‌ولێرێ و به‌غدا به‌رده‌وامن و هه‌موو بزاڤێن بارزانى د ئاشتیانه‌نه‌ و هه‌رده‌م ئاماده‌ییا حكومه‌تا هه‌رێما كوردستانێ بۆ چاره‌سه‌ركرنا هه‌موو پرسگرێگان ب رێكا ده‌ستۆرێ عیراقێ راگه‌هاندییه‌ و  حه‌یده‌ر عه‌بادى سه‌رۆكوه‌زیرێن حكومه‌تا عیراقێ به‌رده‌وام ژ جێبه‌جێكرنا ده‌ستۆرێ عیراقێ دره‌ڤیت و دڤێت ببیته‌ رویڤیێ سیاسه‌تێ.

لڤێره‌ یا گرنگه‌ بزانین كو حه‌یده‌ر عه‌بادى یێ به‌رده‌وامه‌ ل سه‌ر دژایه‌تیكرنا هه‌رێما كوردستانێ و تا نوكه‌ چ سۆزێن خوه‌ بجهـ نه‌ئیناینه‌ و چ نه‌مایه‌ دێ روویێ راسته‌ڤینه‌یێ عه‌بادى بۆ هه‌موو كوردان دیاربیت و چه‌ندین ئه‌ندام په‌رله‌مانێن كوردستانێ دیاركرییه‌ كو عه‌بادى چ داواكاریێن كوردان د پرۆژه‌یا بۆدجه‌یا عیراقێ دا جێبه‌جێناكه‌ت و چ به‌رسڤێن عه‌بادى ده‌رباره‌یى مافێن كوردان د دباش نه‌بوون.

عه‌بادى هوسان هزردكه‌ت كو رویڤیێ سیاسه‌تێ یه‌، به‌س نزانیت سه‌رده‌مێ وێ سیاسه‌تێ ژى یێ ب سه‌رڤه‌چووى و ئێدى نه‌شیت ملله‌ته‌كى ب لژنێن هوربینیكرنێ ڤه‌ مژیل بكه‌ت ئه‌و باش دزانیت كو عیراق مه‌زنترین وه‌لاته‌ دكرنا گه‌نده‌لیێ دا و ژنوى لژنان پێك دئینیت بۆ پێداچوونێ دلیستا موچێن فه‌رمانبه‌رێن هه‌رێما كوردستانێ دا ئه‌رێ به‌رعاقله‌ عیراقه‌كا درۆشمێ وێ گه‌نده‌لى بیت و داخازا چاكسازییان ژ حكومه‌تا هه‌رێما كوردستانێ بكه‌ت ئه‌رێ كارێ سه‌ره‌كی یێ عه‌بادى نه‌ئه‌وه‌ لژنان پێك بینیت بۆ دیڤچوونا سه‌دان ملیاردولارێن چووین بۆ ده‌رڤه‌ى وه‌لاتى، باش یا دیاره‌ كو ئه‌ڤ لژنه‌یێن هاتینه‌ پێكئینان ب ناڤێ لژنێن هویربینكرنێ و هونه‌رى ب تنێ بۆ ده‌م كوشتنێ یه‌ و مژیلكرنا وه‌لاتیێن هه‌رێما كوردستانێ.

وه‌كى یا دیار  عه‌بادى گه‌له‌ك داخوازیێن سونه‌یان جێبه‌جێكرن بۆ هندێ بشێت پرۆژه‌یا بودجه‌یا عیراقێ ده‌رباز بكه‌ت و د رۆژێن بهێت دا ئه‌ڤ چه‌نده دێ رووده‌ت، به‌س لڤێره‌ یا گرنگه‌ هه‌موو فراكسیۆنێن كوردى ل به‌غدا ئێك ده‌نگ بن و بایكوتا كومبۆنێن په‌رله‌مانێ عیراقێ بكه‌ن.

هه‌روه‌سا د چه‌ند رۆژێن بهێتدا دێ سه‌رۆكێ حكومه‌تا هه‌رێما كوردستانێ سه‌ره‌دانا به‌غدا كه‌ت و ئه‌ڤه‌ دێ بیته‌ سه‌ره‌دانا دووێ یا نێچیرڤان بارزانى پشتى ریفراندۆمێ بۆ به‌غدا و ئه‌ڤ سه‌ره‌دانه‌ دێ بۆ چه‌ندین پرسێن گرنگ بیت وه‌كى كێشه‌یا په‌ترۆلا هه‌رێما كوردستانێ و مووچێن فه‌رمانبه‌رێن هه‌رێمێ و ڤه‌كرنا فرۆكه‌خانه‌یێن هه‌رێمێ و چه‌ندین پرسێن دیتر، و  ئه‌گه‌ر ئه‌مریكا و ئیران و ئه‌ورۆپا گڤاشتنێن زێده‌تر ل عه‌بادى نه‌كه‌ن ئه‌و ب چ ره‌نگان ده‌ستورێ عیراقێ جێبه‌حێناكه‌ت، ژ به‌ركو ئه‌و باش دزانیت جێبه‌جێكرنا ده‌ستۆرى د به‌رژه‌وه‌ندییا كوردان دایه‌ و عه‌بادى ب چ ره‌نگان لگه‌ل دانا مافێن كوردان نینه‌.

ل دوماهیكێ یا گرنگه‌ وه‌لاتیێن هه‌رێمێ باوه‌ر ژ گوتنێن عه‌بادى نه‌كه‌ن و ئێك ده‌نگییا خوه‌ ب پارێزن به‌رامبه‌رى هه‌ر بزاڤه‌كا عه‌بادى بۆ بێهێزكرنا قه‌واره‌یێ هه‌رێمێ و پشته‌ڤانیا بزاڤێن دبلوماسێن سه‌رۆكێ حكومه‌تێ نێچیرڤان بارزانى بكه‌ن، ژ بویى چاره‌سه‌ركرنا هه‌موو كێشه‌ و ئاریشێن دناڤبه‌را به‌غدا و هه‌ولێرێ دا ب رێكا ده‌ستۆرێ عیراقێ.

 

 

 

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.