عه‌بادى ب فه‌ندو فێلان دڤێت هه‌رێما كوردستانێ داگیر بكه‌ت!

به‌ده‌ل گابێركى

رۆژ بۆ رۆژێ دژایه‌تیكرنا حكومه‌تا عیراقێ بۆ هه‌رێما كوردستانێ یا به‌ره‌ڤ زێده‌بوونێ دچیت و عه‌بادى ه‌ وه‌كو پاهله‌وانێ ڤێ دژایه‌تیێ خوه‌ نمایش دكه‌ت بۆ هندێ پتر ده‌نگان د هه‌لبژارتنێن عیراقێ دا ب ده‌ست خوه‌ڤه‌ بینیت و ئه‌ڤه‌ژى یاریكرنه‌ ب نان و ژیانا ملله‌تێ كورد.

عه‌بادى كه‌سه‌كه‌ ژ مالكى گه‌له‌ك خرابتره‌، ئه‌ڤه‌ى ئه‌و بوویه‌ سه‌رۆك وه‌زیرێن عیراقێ ئێك مافێن كوردان ژ ده‌ستۆرێ عیراقێ نه‌داینه‌ و به‌رده‌وام دبێژیت ئه‌م دێ مووچێن فه‌رمانبه‌رێن هه‌رێما كوردستانێ ده‌ینێ و هه‌موو وه‌لاتیێن عیراقێ پله‌ئێكن! ل ده‌مه‌كى نه‌مووچه‌ى فرێدكه‌ت و پارێن جوتیارێن هه‌رێما كوردستانێ دده‌تێ و چ سۆزێن خوه‌ بجهـ نائینیت به‌رامبه‌رى مافێن كوردان.

عه‌بادى یێ به‌رده‌وامه‌ ل سه‌ر دژایه‌تیكرنا كوردان و مافێن وان و ئارمانجا وى یا سه‌ره‌كى ئه‌وه‌ حكومه‌تا هه‌رێما كوردستانێ نه‌چار بكه‌ت هه‌موو ده‌ریێن سنۆرى بێخیته‌ ژێر ده‌ستهه‌لاتا وى و دیسان ب هزاران حه‌شدا شه‌عبى بناڤێ پولیسێن فیدرال بینیته‌ هه‌رێما كوردستانێ ل فرۆكه‌خانه‌یان و خالێن گرنگ یێن سنۆرى جێگیربكه‌ت ئانكو عه‌بادى دڤێت ب فه‌ند و فێل هه‌رێما كوردستانێ داگیر بكه‌ت ب ناڤێ ده‌ستهه‌لاتا فیدرال.

عه‌بادى یاریێ ب ده‌مى دكه‌ت و دڤێت ب ناڤێ لژنێن هونه‌رى و هویربینیێ به‌رده‌وام ده‌مى ب كوژیت، به‌س لڤێره‌ سه‌رۆكێ حكومه‌تا هه‌رێما كوردستانێ نێچیرڤان بارزانى ب سیاسه‌تا خوه‌ یا نه‌رم و دبلۆماسى دێ بۆ جیهانێ هه‌موو یێ دیاركه‌ت، كو عه‌بادى و عه‌قلیه‌تا شوفینیزم یا عه‌ره‌بى یا به‌رده‌وامه‌ ل سه‌ر دژایه‌تیكرنا ملله‌تێ كورد و ب چ ره‌نگان ده‌ستۆرێ عیراقێ جێبه‌جێناكه‌ن.

هه‌روه‌سا عه‌بادى بۆ گه‌رمكرنا بازارێ خوه‌ یێ ده‌نگدانێ چه‌ندین لێدوان و بریارێن دیتر دژى هه‌رێما كوردستانێ دان وه‌كو درێژكرنا ماوێ دائێخستنا فرۆكخانێن هه‌رێما كوردستانێ و زێده‌نه‌كرنا بۆدجه‌یا هه‌رێمێ، ئه‌رێ ئه‌ڤا عه‌بادى دكه‌ت دێ بۆ چیته‌ سه‌رى، ب دیتنا من گه‌له‌كا ب زه‌حمه‌ته‌ به‌غدا به‌رامبه‌رى هه‌ولێرێ ب ڤى ره‌نگى یا به‌رده‌وام بیت، ژ به‌ركو زلهێزێن جیهانێ ژى تاراده‌یه‌كی دێ ده‌رفه‌تێ ده‌نه‌ عه‌بادى بۆ هندێ هه‌موو ئاریشێن هه‌رێما كوردستانێ ل دیڤ ده‌ستۆرێ عیراقێ بهێه‌ جێبه‌جێكرن و سیسته‌مێ فیدرالى ب درۆستى بهێته‌ بجهـ ئینان و ئه‌گه‌ر ئه‌ڤ چه‌نده‌ چێنه‌بوو ل وى ده‌مى عه‌بادى دێ ژ یاریا شه‌تره‌نجێ هێته‌ دورئێخستن.

ل دوماهیكێ یا گرنگه‌ كورد باوه‌ر ژ سۆزێن عه‌بادى نه‌كه‌ن و ئێدى پشت به‌ستنێ ل خوه‌ بكه‌ن و پشته‌ڤانیا سه‌رۆكێ حكومه‌تێ نێچیرڤان بارزانى بهێته‌كرن بۆ هندێ چاكسازى ب زۆترین ده‌م بهێنه‌كرن و هه‌رێم بخوه‌ نانێ خوه‌ په‌یدا بكه‌ت نه‌ك نانێ وه‌لاتیێن هه‌رێمێ بكه‌ڤیته‌ ده‌ستێن دۆژمنێن مافێن كوردان پاشى ل وى ده‌مى ئه‌وا هه‌ى ژى نامینیت و وه‌كو مه‌زنژى دبێژن: (نانێ خوه‌ بخوه‌ ب ئاڤێ منه‌تا خه‌لكى پاڤێ) یا گرنگه‌ حكومه‌تا هه‌رێما كوردستانێ دور ژ دره‌و و فند و فێلێن عه‌بادى چاره‌یه‌كێ بۆ ڤێ ره‌وشا نه‌خوه‌ش یا هه‌رێمێ ببینیت بۆ هندێ گیانێ هه‌موو شه‌هیدێن كوردستانێ بۆ هه‌تا هه‌تایێ یێ شاد بیت.

 

 

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.