شەڕخوازێن ناڤا (پ.ک.ک)ێ ل مەیدانەکا نوو یا شەڕی دگەڕن

رزگار كێسته‌ی  :

دەمێ ل نیڤا ساڵێن ١٩٧٠ (پ.ک.ک)ێ دەست ب بزاڤێن خوە یێن سیاسی و ڕێكخستنێ کری و پاشی پشتی ١٠ ساڵان ژی شەڕێ چەکداری دەستپێکری، وان ب درووشمێن خوە وەسا دیارکر کو ئەو بزاڤەکا نوویە دناڤ کوردان دە و ب چ تشتێ خوە نە وەک ڕێكخستنێن دی یێن تەقلیدیێن کوردانە و هەر د چوارچۆڤه‌یێ ڤێ سیاسەتا خوە دا، درووشمێ دەولەتەکا کوردی لسەر هەرچوار پارچه‌یێن کوردستانێ بلندکر، دیارکر ژی کو ئەو وان سنۆرێن دناڤا کوردستانێ ده‌ ناسناکن.
ڕاستی ژی (پ.ک.ک)ـه‌ تشتەکێ نوو بوو دناڤ بزاڤا کوردی دە، لێ مخابن وێ نوویاتیێ هند مفا نەگەهاندە دۆزا کوردستانێ هندی زیان گەهاندیێ، چونکی ژبلی هندێ کو چو هێز و ڕێكخستنەکا کوردستانی نەما ل هەرچوار پارچه‌یێن کوردستانێ کو (پ.ک.ک)ێ شەڕێ وان نەکری، هەروەسا دناڤ خوە ژی دا قۆناغ ب قۆناغ ب سەدان کادرێن خوە یێن پلە بلند لژێر ناڤێن جودا جودا تەسفییەکرن و ژناڤبرن. ڤێ چەندێ ژی عبداللە ئۆجالان د پەرتووکا (هەفت رۆژ لگەل ئاپۆ دا) یا نەبیل ملحم دا دیار دکەت، هەروەسا مەزنە فەرماندارێ (پ.ک.ک)ێ شەمدین ساکک ژی د پەرتووکا خوە یا ب ناڤێ (ئاپۆ)ـدا ب هوور و درێژی باسکرییە. ئەڤە ژی بوو ئەگەرێ هندێ کو د دیرووکا کوردان ده‌ بۆ جارا ئێکێ جیهان ڕێكخستنەکا کوردان وەک تەرۆریست ناس بکە کو ئەو ژی (پ.ک.ک)ـه‌ بوو.
ل ڤێ دوماهیێ ژی، پشتی ٤٠ ساڵێن شەڕ و کوشتار و مالوێرانیێ و ڕشتنا خوینا نێزیکی ٤٠ هزار شەهیدان، (پ.ک.ک)ێ دەست ب بازاڕێ ئاشتیێ کرییە لگەل دەولەتا ترک، لێ نەکو لسەر دەولەتەکا کوردی یا سەربخوە، ئەوا کو وان گەنجێن کوردان پێ ڕاکرینە سەر پیان و برینە چیا و نە ژی لسەر فیدرالی و ئۆتۆنۆمی ژ بۆ باکوورێ کوردستانێ، بەلکی وان لگەل ڤی بازاڕێ خوە یێ لگەل دەولەتا ترک هێرشەکا دژوار ل دژی بنەما و هزرا نەتەوەیی یا کوردی دەستپێکرییە و رۆژانە داخویانیێن بالکێش ژ ئالیێ بەرپرسێن (پ.ک.ک)ێ یێن چیا و یێن ل باژاران ڤە تێنەدان. جار دبێژن ئەم ل دژی دەولەتەکا کوردی یا سەربخوەنە و مە هزرا دەولەتا کوردی هاڤێتییە د تەنەکا گەلێشی ده‌!! جار ژی دبێژن بەهدینی و سۆران و ئێزدی نە ئێک نەتەوەنە، جار ژی دخوازن هەموو باژێر و دەڤەرێن کوردستانێ ژێکڤەکەن و پارچەپارچە بکەن لژێر ناڤێ کانتۆنان و هەر دەڤەر و هەرێمەکێ پاتەیەکی لسەر بلند بکەن ب ناڤێ ئاڵا و ل هەر جهەکی ئاڵایا پیرۆزا کوردستانێ بهێتە بلندکرن ئەگەر دەستهەڵاتا وان بگەهیتێ دێ ئیننە خوارێ و ناهێلن بهێتە بلندکرن، هەروەکی ل نەورۆزا ئەڤ ساڵە ل ئامەدێ ئاڵایا کوردستانێ ئینایە خوارێ و نەهێلای بلند ببیت.
هەلبەت ئەڤە وێ چەندێ ناگەهینیت کو خەلکێ کوردپەروەر دناڤ (پ.ک.ک)ـێدا نەبوویە، بەرۆڤاژی ب هەزاران کەسێن دلسۆز و کوردپەروەر دناڤ (پ.ک.ک)ـێدا گەهەشتنە پلەیێن بلند و گەلەک ژی شەهید بوونە، لێ هەروەکی عبداللە ئۆجالان و شەمدین ساکک د پەرتووکێن خوە دا دیار دکەن، ئەو کەسێن خودانێن هزرا نەتەوەیی بەردەوام هاتنە ژناڤبرن ژ ئالیێ (پ.ک.ک)ـێڤە و نوکە ژی ئەڤ پرۆسە یا بەردەوامە، هەروەکی بەری چەند ساڵەکان ل چیا مۆراد کارایلانێ سەرۆکێ (ک.ج.ک)ێ کو ب سەرکێشێ هزار نەتەوەیی و کوردایەتی دهاتەن ناسین دناڤ (پ.ک.ک)ـێدا، هاتە دوورخستن ژ بەرپرساتیێ و ل باژێڕان ژی کەسێن وەکی ئۆسمان بایدەمیر، عبداللە دەمیرباش و لەیلا زانا، کو دیسان دناڤ باژێران دە ب کەسێن کوردپەروەر و نەتەوەیی دهاتنە ناسین، هاتنە لادان.
پشتی لادانا ڤان کەسان ڕێ هاتییە خوەشکرن بۆ کەسێن کو خوە وەک ترک دبینن دناڤا (پ.ک.ک)ـێدا، ڤێجا چ ئەوکەسە ب بنگەها خوە کورد بن، لێ ب کوردی نزانن و خوە وەک ترک دبینن، وەکی سەلاحەددین دەمیرتاش و گولتان کشناک و ئایسەل تۆگلۆگ ل باژێران، جەمیل بایک و مستەفا کاراسۆ ل چیا، چ ژی ئەو کەسێن ترک بن یێن کو ئیرۆ (پ.ک.ک)ـه‌ چارەنڤیسا ٢٠ ملیۆن کوردان ڕادەستی وان کریە، وەکی سڕی سوڕەییا ئۆندەر ل باژێران و دۆران کالکان ل چیان.
هەلبەت پڕانییا ڤان سەرکرده‌یێن مە باسکرین، د ژینگەهەکا شەڕ و کوشتارێ دە هاتنە پێش و وەک ئاغایێن شەڕی تێنە ناسین، ژبەر هندێ ژی ئیرۆ دەما کو دبینن سەرۆکێ (پ.ک.ک)ێ عبداللە ئۆجالان و دەولەتا ترکی ل هەڤهاتنە و شەڕ ئێدی ب ئێکجاری د ناڤبەرا وان دە دێ ڕاوەستیت، ئێدی ئەو دترسن د قۆناغا ئاشتیێ دا وان ئەو رۆل و پلەیێن بەرێ نەمینن، ژبەر هندێ ژی ئیرۆکە ئەو ب خوە ل مەیدانەکا نوو یا شەڕی دگەڕن، داکو بشێن وان پلەیێن خوە بپارێزن. هەروەکی مە دیارکری ئەڤ شەڕخوازێن هە نە تەنێ خوە وەک ترک دبینن، لێ دهەمان دەم ژی دا ئەو خوە وەک دژمنێ هزرا نەتەوەیی یا کوردان و دەولەتا کوردی دبینن.
هەلبەت ئێکانە هێز ژی کو ئیرۆ نوونەرتییا هزرا نەتەوەیی دکە و ژبۆ کوردستانەکا سەربخوە خەباتێ دکە، سەرۆکاتییا باشوورێ کوردستانێیە ب تایبەت ژی پشتی داعش لسەردەستێ باشوورێ کوردستانێ هاتییە شکاندن، پتر وەک وەلاتەکی سەربخوە دانوستاندن لگەل تێتەکرن. ژبەر ڤێ یەکێ ژی، وان ئیرۆ چاڤێ خوە بەردایە باشوورێ کوردستانێ وەک مەیدانا خوە یا نوویا شەڕی. هەلبەت دوی دەمی دە هەرچوار دەولەتێن داگیرکەرێن کوردستانێ ژی ب خۆشحالیڤە دێ پشتەڤانییا ڤێ هێزا شەڕخواز کەن، کو ئەو بشێن باشوورێ کوردستانێ بێخنە دناڤ شەڕەکی دی یێ وێرانکەردا.
لێ ئەز هیڤیدارم خەلکێ باکوورێ کوردستانێ زێدەتر ڕێ نەدە ڤان شەڕخوازان کو کوڕ و کچێن وان ژ بۆ بەرژەوەندییا داگیرکەران بدنە کوشتن، هەروەسا پێدڤییە هێز و ڕیكخستنێن باشوور ژی دەڤ ژ بەرژەوەندیێن خوە یێن بەرتەنگ بەردن و هەموو پێکڤە ل دژی ڤان جۆرە پلانان بڕاوەستن و دەستکەفتێن خوە یێن نەتەوەیی بپارێزن.

بابه‌تێن ب ڤێ مژارێ ڤه‌ گرێدای