شرۆڤه‌كاره‌ك: كوڕێن دهۆكێ دیرۆك تۆماركرییه‌ و سه‌ركه‌ڤتن لسه‌ر جه‌وییه‌ دوور نینه‌

شرۆڤه‌كاره‌ك: كوڕێن دهۆكێ دیرۆك تۆماركرییه‌  و سه‌ركه‌ڤتن لسه‌ر جه‌وییه‌ دوور نینه‌

وار – محه‌مه‌د عه‌لی :

چاڤه‌ڕێ دهێته‌ كرن شه‌مبییا بهێت تیما یانه‌یا دهۆك یارییا خۆ یا شه‌شی و دوماهیی ژ خولا ئیراقی یا ته‌پاپێی بۆ یانه‌یێن پلا نایاب یا كۆما دووێ ژقۆناغا دوماهیی بكه‌ت ده‌می دبیته‌ مێڤانا یانه‌یا جه‌وییه‌ یا به‌غدایی ل یاریگه‌ها شه‌عب ل ده‌مژمێر(10) شه‌ڤ، ژلایێ خۆڤه‌ نه‌فت ئه‌لجنۆب دێ مێڤاندارییا مینایێ كه‌ت، ئه‌ڤ هه‌ردو یارییه‌ دهێنه‌ هژمارتن یاریێن ڤه‌بڕ بۆ ده‌ستنیشانكرنا هه‌ردو تیمێن ئێكی بۆ یاریێن دوماهییا خولێ، دڤێ كۆمێ دا مینا ب هه‌فت خالان لرێزا ئێكێ دهێت، دیڤدا جه‌وییه‌ ب هه‌مان خال كێمترییا گۆلان لرێزا دووێ و یانه‌یا دهۆك ب پێنج خالان لرێزا سێیێ دهێت و ب كێمترییا گۆلان نه‌فت ئه‌لجنۆب ل رێزا چارێ دهێت، هه‌ر چار تیمان ده‌لیڤه‌یا ده‌ربازبوونێ یا هه‌یی، سه‌ركه‌ڤتنا دهۆكێ لسه‌ر جه‌وییه‌ و دۆراندن مینایێ دگه‌ل نه‌فت ئه‌لجنۆب دێ دهۆك ده‌ربازبیته‌ یارییا دوماهیێ، وه‌كهه‌ڤییا وان دهۆك دی بۆ پلێتا سێیێ یاریێ كه‌ت، لدۆر دوماهی به‌رهه‌ڤیێن هه‌ردو تیمێن دهۆك و جه‌وییه‌ رۆژنامه‌یا وار بووچۆنێن راهێنه‌رێن وان دگه‌ل شرۆڤه‌كاره‌كێ وه‌رزش وه‌رگرتینه‌ ئه‌وێن بڤی ره‌نگی دیاردكه‌ن.

لده‌ستپێكی حازم سالح راهێنه‌رێ دهۆكێ ئه‌ڤ یارییه‌ ب چاره‌نڤیسی و یارییا دوماهیێ و یا هیڤییان دیاركرن و گۆت، پێنه‌ڤێت یاریێن ڤی گه‌ڕی بۆ هه‌رچار تیمێن كۆما مه‌ یا چاره‌نڤیسه‌ كو هه‌موویان هیڤیین ده‌ربازبوونێ یاریین دوماهیێ ماینه‌، له‌ورا ئه‌م ڤێ یاریی ب ڤه‌بڕ دانینن، به‌رهه‌ڤیێن مه‌ د ئاسته‌كی گه‌له‌ك باش دانه‌ و هه‌موو یاریكه‌ر ژلایێ ده‌رۆنی و به‌رهه‌ڤیێ دزاخه‌كا مه‌زن دانه‌، بتایبه‌تی پشتی شیایین سه‌ركه‌ڤتنا بۆری لسه‌ر نه‌فت ئه‌لجنۆب تۆماربكه‌ن، ئه‌ركێ مه‌ ب سانه‌هی نابیت همبه‌ری خودانا ئه‌ردی و جه‌ماوه‌ری، مه‌ گرنگییا ڤێ یاریێ ژبۆ تۆماركرنا ده‌ستكه‌ڤته‌كێ جێاواز بۆ یاریكه‌ران شرۆڤه‌كرییه‌، من باوه‌رییه‌كا مه‌زن ب شیانێن یاریكه‌رێن خۆ هه‌یه‌ و هه‌موویان دیاركرییه‌ كو ئاستێ وان چو كێمتر نینه‌ ژیێن بیانی، بهیڤیمه‌ ئارمانجا خۆ بجهـ بینن ئه‌وژی سه‌ركه‌ڤتن وبه‌رده‌وامیێ بده‌ینه‌.
ژلایێ خۆڤه‌ عه‌باس عه‌تییه‌ راهێنه‌رێ جه‌وییه‌ گه‌شبینیا خۆ دیاركر كو دێ سه‌ركه‌ڤتنێ تۆماركه‌ت و گۆت، هه‌رچه‌نده‌ تیما دهۆكێ بوو هه‌موویان سه‌لماند كو نه‌ تیمه‌كا بچووكه‌ به‌لكۆ ب گه‌نجێن باژێرێ خۆ شیان ئاست و ئه‌نجامێن مه‌زن بده‌ستخۆڤه‌بینن، له‌ورا ئه‌ركێ مه‌ ب سانه‌هی نابیت، به‌لێ ئه‌م درژدین و گه‌شبینن بۆ سه‌ركه‌ڤتنێ، ژبه‌ركو ئارمانجا مه‌ سه‌رێ لیستێیه‌ و یارییا دوماهیێیه‌، مه‌ خالێن كێماتی و هێزا دهۆكێ ده‌ستنیشانكریینه‌ و دێ كه‌ینه‌ پلان دناڤ یاریێ دا.
لدوماهیێ وه‌حید ره‌شید شرۆڤه‌كارێ وه‌رزشی ل كه‌نالێ وار سپۆرت گۆت، بدیتنا من دی بزه‌حمه‌ت بیت دهۆك سه‌ركه‌ڤتنێ لسه‌ر خودانا ئه‌ردی و تیمه‌كا وه‌كو جه‌وییه‌ یا پڕی ستیر تۆماربكه‌ت، هه‌رچه‌نده‌ ئه‌ز سه‌ركه‌ڤتنا دهۆكێ ژی دوورنابینم چنكو یاریكه‌رێن دهۆكێ نوكه‌ دباشترین ره‌وش دانه‌ و ئاسته‌كی مه‌زن نیشاندایه‌ سه‌ره‌رایی كێم شاره‌زاهیێ و دیاركر ژی كو قه‌یرانا دارایی كارتیكرن ل ئاستی وان نه‌كر، هه‌رچه‌نده‌ هه‌تا نوكه‌ تیما دهۆكێ شیاییه‌ ده‌ستكه‌ڤتنان تۆماربكه‌ت و ده‌ربازبوونا وێ بۆ ڤێ قۆناغی ژی ئێكێ دیرۆكه‌ بۆ كوڕێن باژێرێ دهۆكێ، هه‌روه‌سان وه‌حیدی گۆت، ئه‌گه‌ر یاریی ب ئاسانه‌ بڕێڤه‌بچیت بێی ئاریشه‌ و خه‌له‌تیێن دادڤانی دژی دهۆكێ، من باوه‌ری یا هه‌یی دهۆك دی ئه‌نجامێ یاریێ بده‌ستخۆڤه‌ئینت.

بابه‌تێن ب ڤێ مژارێ ڤه‌ گرێدای