شاندا ھەرێمێ بۆ بەغدا ئەڤرۆ کۆم دبیت

شاندا ھەرێمێ بۆ بەغدا ئەڤرۆ کۆم دبیت

WAAR-دهۆک:

شاندا ھەرێما کوردستانێ یا جڤاتا بلندا رێفڕاندۆمێ بۆ بەغدا کۆمبوو، ب ئارمانجا دیارکرنا تەوەرێن دانوستاندنێن سەرەدانا چاڤەڕێکری یا بەغدا.
ئەرشەد شوانی پەیامنێرێ وار ل ھەولێرێ راگەھاند؛ شاندا ھەرێمێ یا جڤاتا بلندا رێفڕاندۆمێ ئەڤرۆ ل سات یازده‌ى سپێدێ ل دیوانا سەرۆکاتییا ھەرێما کوردستانێ ب سەرپەرشتییا د. فوئاد حسێن سەرۆکێ دیوانا سەرۆکاتییا ھەرێما کوردستانێ کۆمبوویە.
دیار ژی کر، د ڤێ کۆمبوونێ دا، تەوەرێن گۆتوبێژێن سەرەدانا بەغدا دھێنە دەستنیشان کرن.
پەیامنێرێ وار دیارکر، ھەر ئەڤرۆ پشتی نیڤرۆ، ھەمان شاند دێ ب سەرپەرشتییا مەسعوود بارزانی سەرۆکێ ھەرێما کوردستانێ کۆمبیت.
شاندێ جڤاتا بلندا رێفراندۆمێ بۆ بەغدا ژ نەھـ کەسان پێکھاتییە و نوونەرێن ئالیێن سیاسی ژبلی تەڤگەرا گۆرانێ و کۆمەلا ئیسلامی، ھەروەسا تورکمان، کرستیانان تێدا، ل گۆر زانیاریێن وار، شاندێ ھەرێمێ سوبە دێ سەرەدانا بەغدا کەت و بەرپرسێن حکومەتا ناڤەندی ب فەرمی ھایدار کەت کو ھەرێما کوردستانێ دێ ل بیست و پێنجی ئیلۆنێ رێفراندۆما سەرخوەبوونێ کەت.
شاندا ھەرێمێ بۆ بەغدا ھەر یەک ژ د. رۆژ نووری شاوەیس ئەندامێ مەکتەبا سیاسییا پارتی، سەعدی ئەحمەد پیرە، ئەندامێ مەکتەبا سیاسییا ئێکەتیێ، ھەروەسا محەمەد ئەحمەد سەرۆکێ ئەنجوومەنا سیاسییا یەکگرتوویا ئیسلامی ل سلێمانیێ و ڤیان دەخیل نوونەرا کوردێن ئێزدی، رۆمی ھەکاری نوونەرێ کرێستیانان و ھەروەسا ماجد بازرگان نوونەرێ تورکومانان ب خوەڤە دگریت.

بابه‌تێن ب ڤێ مژارێ ڤه‌ گرێدای