سیبه‌ر… بزاڤێ دكه‌ت ببته‌ كه‌س!

سیبه‌ر… بزاڤێ دكه‌ت ببته‌ كه‌س!

زه‌رده‌شت

هیڤیدارم خه‌له‌ت تێنه‌گه‌هن، ئه‌ڤه‌ نه‌ سه‌رناڤێ شانۆنامه‌یه‌كێیه‌، نه‌ژى سه‌رناڤێ هه‌لبه‌سته‌كێیه‌، ئه‌ڤه‌ دیارده‌یه‌كا سیاسییه‌، نهۆ ل كوردستانێ ده‌ست پێكرییه‌… ئه‌ز دێ بزاڤێ كه‌م، ژ ئالییه‌كیڤه‌ لێ بنێڕم.

وه‌كى هه‌مى وه‌لاتێن جیهانێ، پترییا ده‌ستهه‌لاتدارێن كوردستانێ ژى، دێمجامه‌ و سیبه‌ر هه‌بوون و هه‌نه‌. ئه‌ڤه‌ نه‌ ژ كرێتى و خرابى و كێماسیانه‌، به‌لكو پارچه‌یه‌كه‌ ژ سیسته‌م یان شێوازێ ژیانێ و كارێ سیاسى. ب گۆتنه‌كا دى، دبت كه‌سێن وه‌كو من و ته‌ ژى، هه‌مان سێیانى هه‌بت؛ دێمجامه‌، ئه‌و روویێ ده‌ستهه‌لاتدار یان هه‌ركه‌سه‌ك خوه‌ پێ نیشا خه‌لكى دده‌ت، و سیبه‌ر؛ ئه‌و كه‌سێن شۆلى بۆ دكه‌ن، و ده‌ستهه‌لاتدار یان كه‌ساتییا دروست، ل ناڤبه‌رێیه‌.

دوباره‌ دێ بێژم؛ هه‌مى ده‌ستهه‌لاتداران و نه‌دووره‌ هه‌مى كه‌سان ژى ئه‌ڤ سێیانییه‌ هه‌بت، و ئه‌ڤه‌ نه‌ شه‌رمه‌ نه‌ژى كێماسىیه‌، لێ شێوازێ بكارئینانێ و خوه پێ ‌دیاركرنێ، یان ئاستێ جوداهییا كه‌ساتییا مرۆڤىیا دروست، دگه‌ل دێمجامه‌یێ و سیبه‌رێ، كارڤه‌دانا خه‌لكى دیار دكه‌ت. ئانكو قه‌باره‌یێ كه‌سێ دروست ل ناڤبه‌رێ، ئاستێ دروستى و خه‌له‌تییێ دیار دكه‌ت، نه‌ دیارده‌ بخوه‌… چونكى دیارده‌یه‌كا ژیانێیه‌، هه‌ركه‌سه‌كى ئه‌ڤ سێیانییه‌ هه‌یه‌، لێ ئاست و گۆشه‌ و بیاڤا لێنێڕینێ ژێكجودایه‌. ب گۆتنه‌كا دى، كیشك  ژ هه‌رسێیان پتر دیار و زاله‌، ئه‌و هه‌لوه‌ستێ بینه‌رى دیار دكه‌ت:

دێمجامه‌ < كه‌س> سیبه‌ر.

دێمجامه‌ < كه‌س> سیبه‌ر.

دێمجامه‌ < كه‌س> سیبه‌ر.

دێمجامه (خه‌لك دبینت)؛‌ ژ نموونه‌یێن بلند و په‌یه‌ندێن جڤاكى و ره‌وشه‌نبیرى و ئه‌كادمى… پێكدهێت. دێمجامه‌، پتر ئالییێ جڤاكى و ره‌وشه‌نبیرى ژ هه‌ڤبه‌ندیێن مرۆڤان دگرت.

 

سیبه‌ر (ره‌نگڤه‌دانا كه‌سىیه‌ ل پێشبه‌رى رۆناهىیێ)؛ ئه‌ڤه‌ پتر ئالىیێ ئابۆرى ژ هه‌ڤبه‌ندىیێن مرۆڤان دگرت. بۆ ده‌ستهه‌لاتداران، ئه‌ڤه‌ ژ كه‌سێن سه‌رمایه‌دار و ئابۆرناس و بازرگان و خودان كۆمپانى و كارگه‌هـ و پیشه‌… پێك دهێت.

من دڤێت ئه‌ڤێ هه‌مىیێ بگڤێشم و ببێژم: پترىیا ده‌ستهه‌لاتداران، ل ناڤبه‌را دو جۆره‌ كه‌سان خوه‌ رادگرن. هنده‌ك خه‌مل و ره‌ونه‌قێ بۆ چێدكه‌ن (دێمجامه‌نه‌) و هنده‌ك بۆ بازرگانییێ و شۆلێن كرێت د چاڤێ خه‌لكیدا، دكه‌ن (سیبه‌رن).

هه‌لبه‌ت، ده‌ستهه‌لاتدارێن كوردستانێ ژى، ژ ئه‌ڤێ قانوونێ دوور نه‌بوون… ئه‌وان ژى دێمجامه‌ و سیبه‌ر هه‌بوون و هه‌نه‌ و دێ هه‌بن. لێ تشتێ سه‌رنجراكێش ئه‌وه‌؛ هنده‌ك دێمجامه‌ یان هنده‌ك سیبه‌ر، ب رۆلێ خوه‌ رازى نابن؛ دڤێن رۆلێ كه‌سى ب خوه‌ بگێڕن!

ئه‌ڤه‌ ژى، وه‌كو هزر، ئارمانجه‌كا ره‌وایه‌ و مافه‌كێ كه‌سییه‌؛ مرۆڤ ژ دێمجامه‌ یان سیبه‌ر، ببته‌ كه‌سه‌ك سه‌ربخوه‌ و ئه‌و ب خوه‌، ببته‌ خودان دێمجامه‌ و سیبه‌ر. ئانكو، جهگوهاڕتن چێببت و بازرگانه‌ك ببته‌ ده‌ستهه‌لاتدار یان كه‌ساتییه‌كێ جڤاكى ببتێ. لێ، ئه‌ڤ دیارده‌یه‌ (دێمجامه‌ و سیبه‌ر بزاڤا ده‌ستهه‌لاتداریێ بكه‌ن) چه‌ندین پرسیاران هه‌لدگرت:

ئه‌رێ ئه‌ڤێ‌ ب شێوه‌یه‌كێ سروشتى روودایه‌؟ ئانكو كه‌سه‌ك لاوازبوویه‌ یان نه‌مایه‌ و جهێ وى ب سیبه‌ره‌كى یان دێمجامه‌یه‌كێ هاتییه‌ پڕكرن؟ ئه‌ڤه‌ دكه‌ڤته‌ خانه‌یا بوویه‌رێن نۆرمال و رۆژانه‌ و هه‌ژى لێ راوه‌ستانێ نینه‌، نه‌خاسمه‌ د گوتاره‌كێ دا.

گه‌له‌ك جاران، وه‌ختێ دێمجامه‌یه‌ك ژى بزاڤا دكه‌ت ببته‌ كه‌س، خه‌لك نۆرمال دبینن، لێ سیبه‌ر كو پتر ئالییێ ئابۆرى و دژوارییێ دگرت و ئه‌وان رۆلان دگێڕت، وه‌ختێ بزاڤا كه‌سبوونێ دكه‌ت، دبته‌ جهێ گومانێ و پرسیار په‌یدا دبن. ب دیتنا من، خه‌لكى ماف هه‌یه‌ بپرست؛ ئه‌رێ سیبه‌ر دشێت جهێ كه‌ساتىیێ بگرت؟ ب گۆتنه‌كا رۆهنتر؛ ئه‌رێ وه‌خت هاتىیه‌ بازرگانێن ده‌ستهه‌لاتداران جهێ وان بگرن؟ یان ئه‌رێ بارزگانێ سیاسى دێ شێت رۆله‌كێ باشتر ژ مێشتنا به‌ریكان بگێڕت؟

هه‌روه‌سا په‌یدابوونا ئه‌ڤێ دیارده‌یێ ل كوردستانێ، پرسیاره‌كا دى ژى دهه‌لێخت؛ ئه‌رێ ئه‌ڤه‌ ده‌ستپێكا دیارده‌یه‌كێیه،‌ دێ دیمه‌نێ سیاسى ل كوردستانێ ڤه‌گرت؟ یان دیارده‌یه‌كا تاكه‌كه‌سییه‌ و بازرگانێن سیاسى ل هیچ جهه‌كى ئه‌زموونه‌كا باش پێشكێش نه‌كرینه‌ و دێ هه‌مان شكه‌ستنێ ل نك مه‌ ژى خوت؟

ئه‌رێ خه‌لك دێ چاوا پێشوازییێ ل ئه‌ڤان سیبه‌ران كه‌ت؟ هه‌كه‌ر بوو دیارده‌.

كۆمه‌كا پرسیارێن دى ژى هه‌نه‌، ده‌نگێن خه‌لكێ كوردستانێ بۆ په‌ڕله‌مانێ ئیراقێ، دێ دیار كه‌ن كانێ كوردستانیان دڤێت سیاسه‌تێ دگه‌ل به‌غدا بكه‌ن یان بازرگانییێ.

وێنه‌: ژ ئنته‌رنێتێ

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.