سووچدارێن ل شوقه‌یێن ئێتیتێ‌ كه‌سه‌ك كوشتی، دێ‌ هێنه‌ سێداره‌دان

سووچدارێن ل شوقه‌یێن ئێتیتێ‌ كه‌سه‌ك كوشتی، دێ‌ هێنه‌ سێداره‌دان

 

cvakkww

وار – دهۆک :

پشتی كو سێ‌ گونه‌هبارێن ب ناڤێن (ڤ) و (ز) و (و) كه‌سه‌كێ‌ ب ناڤێ‌ (ح) برییه‌ د كاڤله‌كێ‌ ڤه‌ ل ته‌نشتا باژێڕێ‌ دهۆكێ‌ ل شوقێن ئێتیتێ و كوشتی، داكو پاره‌ و ترومبێلا وی ببه‌ن، دادگه‌ها تاوانێن دهۆكێ‌ بڕیاردا دو گونه‌هبار ژ وان بۆ هه‌تا هه‌تایێ‌ بهێنه‌ حوكمكرن و یێ‌ سێیێ‌ ژى بهێته‌ سێداره‌دان، ئه‌ڤه‌ پشتی كو هه‌ڤژین و چه‌ندین زاڕۆیێن (ح) داخوازا مافێن خوه‌ ژ گونه‌هباران كرین.
سكالاكه‌ر كو هه‌ڤژینا (ح) بوو ئه‌وێ‌ كو د كاڤلی ڤه‌ هاتییه‌ كوشتن، بۆ دادگه‌ها تاوانان دیاركر كو ل ئێڤارییا به‌ری روودانێ‌ (ح) ئه‌و گه‌هانده‌ ماله‌كا ناسیارێن وان و سكالاكه‌رێ‌ گۆت: ”پاشی هه‌ڤژینێ‌ من ڤه‌گه‌رییا سه‌ر كارێ‌ خوه‌ یێ‌ رۆژانه ‌ڤه‌، ئینا بوو شه‌ڤ و كوڕه‌كێ‌ من هاته‌ لدووڤ من ڕا و ئه‌ز به‌ر ب مال ڤه‌ برم، ل ده‌مه‌كی من هند دیت تێله‌فۆنه‌ك بۆ كورێ‌ من هات و گۆتێ‌ (تو كوڕێ‌ فلان كه‌سی؟) د به‌رسڤێ‌ دا كوڕێ‌ من گۆتێ‌ (به‌لێ‌)، ئینا گۆتنێ‌ دایكا خوه‌ ل گه‌ل خوه‌ بینه‌ و وه‌رنه‌ (نۆشدارییا‌ داد)، ئه‌م چووینه‌ وێرێ،‌ من دیت زه‌لامێ‌ من یێ‌ هاتییه‌ كوشتن بێی كو ئه‌م بزانین كێ‌ وه‌لێ‌ كرییه‌، له‌و پێله‌كا مه‌زن یا گریێ‌ و تووڕه‌یێ‌ ب سه‌ر مه‌ دا هات و پشتی هینگێ‌ پۆلیسان هه‌ر سێ‌ گونه‌هبار (ڤ) و (ز) و (و) ده‌سته‌سه‌ركرن و دان ب تاوانا كوشتنا هه‌ڤژینێ‌ من كرن، ئه‌ڤجا ئه‌ز ژ دادگه‌هێ‌ و قانوونێ‌ دخوازم گونه‌هباران ب توندی سزابده‌ن، ژبه‌ركو وان جه‌رگێ‌ ل من سۆتی”.
ژلایێ‌ خوه‌ ڤه‌ دو كوڕێن (ح) ژی هه‌موو گۆتنێن دایكا خوه‌ ب راستی ل قه‌له‌مدان و گۆتن، ”ئه‌م ژی دخوازین دادگه‌هـ و قانوون گونه‌هباران ب توندی سزا بده‌ن.
هاته‌ زانین كو (ح) چه‌ندین زاڕۆ ژی هه‌بوون، لێ‌ مافێن وان ژی هاتنه‌ خواستن.
گونه‌هبار (ڤ) بۆ دادگه‌ها تاوانان گۆت: ”به‌ری شه‌ڤا روودانێ‌ هه‌ردو گونه‌هبارێن هه‌ڤالێن من، ئه‌ز داخوازكرمه‌ نك خوه‌ و گۆتنه‌ من، تو كه‌سانێن ده‌وله‌مه‌ند دنیاسی، ئه‌ڤجا تو كه‌سه‌كێ ده‌وله‌مه‌ند ب هێجه‌ته‌كێ‌ بینه‌ د ڤی كاڤلێ‌ ڤه‌ ل ته‌نشتا باژێڕی‌، پاشی دێ‌ كوژین و پاره‌ و ترومبێلا وی بۆ خوه‌ به‌ین، من ژی ئێكسه‌ر هزرا (ح) كر، و ل شه‌ڤا روودانێ‌ من تێله‌فۆنا وی كر و هه‌ردو هه‌ڤالێن من (ز) و (و) ژی ل گه‌ل من بوون د كاڤلی ڤه‌، ئینا من گۆته‌ (ح) وه‌ره‌ مه‌ بۆ ته‌ له‌شفرۆش یێن ئیناین، ده‌ستپێكێ‌ (ح) باوه‌رنه‌كر، ئینا من گۆتێ‌ به‌لێ‌ هه‌كه‌ تو باوه‌رنه‌كه‌ی ئه‌ڤه‌ هه‌ڤاله‌كێ‌ ل گه‌ل من وی یێن بۆ ته‌ ئیناین و ها ل گه‌ل باخڤه‌ و من تێله‌فون داف (ز)، ئینا (ز) گۆتێ‌ وه‌ره‌ ئه‌ز ڤی كاری دكه‌م و یێ‌ پشتراستبه‌، ئه‌ڤجا (ح) باوه‌ركر و هات، پشتی گه‌هشتییه‌ نیك مه‌ ل كاڤلی، وی چو له‌شفرۆش نه‌دیتن، ئینا ل ده‌مه‌كی مه‌ ئه‌و مژوول كر و پاشی هه‌ڤالێن من (ز) و (و) ژ پشت ڤه‌ هاتنێ‌ و دا به‌ر چه‌قوویان و من ژی ل ده‌مه‌كی چه‌ندین چه‌قوو ل سینگێ‌ وی دان، داكو تمام بیت و بمریت و من مۆبایلا وی ژی ژبه‌ریكا وی ئیناده‌ر، ل ده‌مه‌كی هندی (ح) هه‌واركر، خه‌لكه‌كی ل وان ده‌ڤه‌ران قه‌ستا كاڤلی كر، ئینا (ز) و (و) هه‌رزووكا ڕه‌ڤین، و خه‌لك گه‌هشته‌ د كاڤلی ڤه‌، ئینا من ژی ژ قه‌ستا كره‌ هه‌وار و من گۆت هه‌واره‌ خه‌لكینۆ به‌ری نوكه‌ دو كه‌سان (ح) ئه‌وێ‌ بابێ‌ من كوشت و ڕه‌ڤین، پشتی هینگێ‌ پۆلیس ژی هاتنه‌ وێرێ‌، ئه‌ڤجا پشتی ده‌لیڤه‌ بۆ من چێبووی و هه‌موو ب ته‌رمێ‌ (ح) ڤه‌ مژوول بووین، من خوه‌ هاڤێت و ئه‌ز ڕه‌ڤیم، ئانكو مه‌ره‌ما مه‌ ژ كوشتنا (ح) ئه‌و بوو ئه‌م پارێن وی و ترومبێلا وی ببه‌ین، لێ‌ ئه‌م نه‌شیان ترومبێل و پارێن وی ببه‌ین، ژبه‌ركو خه‌لك ب سه‌ر مه‌ هلبوو، لێ‌ من مۆبایلا وی ب 45 هزار دیناران فرۆت، لێ‌ یا بێ‌ مفا بوو، ژبه‌ركو پشتی چه‌ند رۆژه‌كان پۆلیسان زانی مه‌ ئه‌و تاوانا كری و ئه‌م ده‌سته‌سه‌ركرین، و ئه‌ز مرۆڤه‌كێ‌ بێ‌ گونه‌هم د ڤێ‌ كێشه‌یێ‌ دا”.
هه‌روه‌سا هه‌ردو گونه‌هباران (ز) و (و) ژی هه‌موو گۆتنێن (ڤ) ب راستی ل قه‌له‌مدان و گۆتن، ”ئه‌م خوه‌ دبینین دبێ‌ گونه‌هـ”.
داواكارێ‌ گشتی ژ دادگه‌هێ‌ خواست گونه‌هباران ب گرانی سزابده‌ت، ل دووماهیێ‌ دادگه‌ها تاوانێن دهۆكێ‌ ل گۆر ماددێ‌ 406 برگا ژماره‌ 1 ژ قانوونا سزایێن عێراقێ‌، بڕیاردا گونه‌هبار (ڤ) و (ز) هه‌تا هه‌تایێ‌ بهێنه‌ حوكمكرن، و گونه‌هبار (و) بهێته‌ سێداره‌دان، ژبه‌ركو ژیێ‌ (ڤ) و (ز) كێمتر بوو ژ 20 سالیێ‌ و ژیێ‌ (و) پتر بوو ژ 20 سالیێ‌، هه‌روه‌سا دادگه‌هێ‌ بڕیاردا ژی گونه‌هبار گوژمێ‌ 30 ملیۆن دیناران ژی وه‌كو قه‌ره‌بوو بده‌نه‌ خێزانا (ح).

بابه‌تێن ب ڤێ مژارێ ڤه‌ گرێدای