سه‌رۆك بارزانى: دڤێت هه‌ر رێككه‌فتنه‌ك چاره‌نڤیسێ كوردان به‌رچاڤ وه‌ربگریت

سه‌رۆك بارزانى: دڤێت هه‌ر رێككه‌فتنه‌ك چاره‌نڤیسێ كوردان به‌رچاڤ وه‌ربگریت

WAAR-دهۆك:

سه‌رۆك مه‌سعوود بارزانى هۆشدارى ژ گهۆرینا دیموگرافى ل رۆژئاڤایێ كوردستانێ دان و راگه‌هاند: هه‌ر رێككه‌فتنه‌كا بهێته‌كرن، پێدڤی یه ‌چاره‌نڤیسێ گه‌لێ كورد ل سووریا به‌رچاڤ وه‌ربگریت.
ل گۆره‌ى مالپه‌رێ سه‌رۆك بارزانى، ئه‌ڤرۆ سعه‌ت نه‌هـ و نیڤێ سپێدێ ژان ئیف لودریان، وه‌زیرێ ده‌رڤه ‌یێ فره‌نسا ل پیرمامێ سه‌ره‌دانا سه‌رۆك مه‌سعوود بارزانی كر و هه‌ردو ئالییان بزاڤێن به‌رهنگاربوونا داعشێ، ره‌وشا رۆژئاڤایێ كوردستانێ و په‌یوه‌ندیێن دۆقۆلی گۆتوبێژ كرن.
لودریانى سلاڤێن سه‌رۆك ماكرۆنى گه‌هاندن سه‌رۆك بارزانى و راگه‌هاند: ئه‌ڤه‌ جارا حه‌فتێ یه ‌دهێت ‌هه‌رێما كوردستانێ، ژبه‌ركو سوزییه‌كا مه‌زن بۆ گه‌لێ كورد هه‌یه ‌و ڤێ جارێ ژى هاتییه ‌پشته‌ڤانییا فره‌نسا بۆ هه‌رێما كوردستانێ دوپات بكه‌ت.
سه‌رۆك بارزانى ژى، سوپاسییا هه‌لوه‌ست و پشته‌ڤانییێن گه‌ل و حكومه‌تا فره‌نسا بۆ دۆزا گه‌لێ كورد كر و جاره‌كا دى دلگرانییا خوه ‌ژ ره‌وشا رۆژئاڤایێ كوردستانی نیشاندا و هۆشدارى ژ گهۆرینا دیموگرافى ل رۆژئاڤایێ كوردستانێ دان و گۆت: پێدڤییه‌ هه‌ر رێككه‌فتنه‌كا بهێته‌كرن، چاره‌نڤیسێ گه‌لێ كورد ل سووریا به‌رچاڤ وه‌ربگریت و داخواز ژ فره‌نسا كر د وى وارى دا رۆلێ خوه ‌ببینیت.
سه‌رۆك بارزانى باسێ به‌رده‌وامییا هه‌ماهه‌نگى و هاریكارییا هه‌رێم و فره‌نسا د هه‌موو واران دا كر و دوپاتى ژى ل بزاڤێن هه‌ڤپشك بۆ به‌رهه‌نگاربوونا داعشێ كر.

بابه‌تێن ب ڤێ مژارێ ڤه‌ گرێدای