سه‌رهاتییه‌ك …. دره‌و ژلایێ‌ نێزیكترین كه‌سڤه‌

سه‌رهاتییه‌ك …. دره‌و ژلایێ‌ نێزیكترین كه‌سڤه‌

ئاواز وه‌یسی :

ئه‌ڤا دبێژنێ‌ ژیانا خانێن خه‌م و كۆڤانان، بوهارێن شاهی و خوه‌ش ده‌مانه‌… من ژیانا خوه‌ د گه‌له‌ك خانه‌یان دا ده‌ربازكر، هه‌موو ژی دره‌و، هه‌كه‌ بێژن ئه‌وا دره‌و ل من كری نێزیكترین كه‌س بوو لده‌ف من، دایكا من بوو!! نه‌بێژه‌ گونه‌هه‌ وه ‌نه‌بێژه‌ تو چاوا وه ‌دبێژی.. به‌س ئه‌ڤه‌ راستیيه‌ و مه‌نده‌هۆش نه‌بن كو ڤێ‌ دا‌یكێ‌ به‌رده‌وام دره‌و ل من كرینه‌، ببۆرن دێ‌ بێ‌ ره‌وشت ئاخڤم…. راستی ل من ڤه‌دشارتن, هه‌ر ژ رۆژا بوونا من ژیانا من یا ب هه‌ژاری چۆی، هه‌ر ل بوهارا چارێ‌ ژ ژییێ‌ من دایكا من سه‌میانا مالێ‌ بوو ده‌ست ب كاری دكر و ئێكانه‌یا دایكا خوه‌ بووم. گه‌له‌ك جاران ل ده‌مێ‌ خوارنا كێم؛ پاریێ‌ خوه‌ ددا من و خوه‌ دهێلا برسی، ده‌مێ‌ من پرسیار ژێ‌ دكر تو بۆچى ناخۆی، دا بێژیت من یا خواری, ئه‌زا تێرم و ئه‌ڤه‌ بوو ئێكه‌م دره‌و،  ببۆرن نه‌ راستی بوو, ده‌مێ‌ چۆینه‌ بازاری شریناهی بۆ من دكری و بۆ خوه‌ نه‌… و ئه‌ڤه‌ دره‌وا دووێ‌ بۆ دگۆت: كچا من ئه‌ز شریناهییان ناخۆم. مه‌زن بووم و چۆمه‌ دبستانێ،‌ ل شه‌ڤێن درێژ دره‌وا سیێ‌ ده‌ستپێكر, هه‌كو تا دره‌نگ لسه‌ر ماكینا درینا جلكان كاردكر، دگۆته‌ من خه‌وا من ناهێت، بۆ مه‌ شۆل دكر دا من ب سه‌رفه‌رازی ره‌وانه‌ی دبستانێ‌ بكه‌ت. سال بوورین، بابێ‌ من ژ سه‌ده‌ما نه‌خوه‌شییا گران وه‌غه‌ركر، ئه‌م هه‌ردو هێلاینه‌ ب تنێ‌. ب بوورینا پایزان هات و پایزا ژییێ وێ‌ و به‌لگێن دارا وێ‌ زه‌ركرن و بوهارا ژیێ‌ من ده‌ستپێكر ژ زانینگه‌هێ ده‌رچۆم، ئه‌ز گه‌ش بووم و ئه‌و چرمسی د سه‌ره‌دانا من دا بۆ وێ‌ ده‌مێ‌ نه‌خوه‌شیێ‌ لاوازكری، من زانی ژیان تاری بوو ل من دێ‌ دووماهى خودانا من چیت، چاڤێن من تژی گری بوون و ئاخڤتن مر.. ده‌ربڕین بۆ بێ‌ ئومێدییان و ئه‌و دیتن بۆ خاتر خواستنا بێ‌ زڤرین، دگۆته‌ من ئه‌زا باشم.. دێ‌ چێبم.. خوه‌ ئاجزنه‌كه‌، ئه‌ڤه‌ ب گرنژینه‌كا دره‌و دگۆت، وی ده‌می بارێ‌ نه‌خوه‌شییا وێ گرانتر بوو ژ تاقه‌تا وێ‌ و ئه‌ڤه‌ بوو دره‌وا دووماهیێ‌ ل من كری، ئه‌ڤه‌ بوون دره‌وێن ته‌حل، خۆزی راستی گۆتبا دا شرینتربن.

بابه‌تێن ب ڤێ مژارێ ڤه‌ گرێدای