سه‌ركرده‌یێ‌ گونجای ل جهێ‌ گونجای

حكمه‌ت خابوور

ل هه‌رێما كوردستانێ‌، باوه‌ر ناكه‌م هیچ مرۆڤه‌كێ‌ دلسۆز بۆ نه‌ته‌وه‌یا خوه‌ هه‌بیت كو هیڤییا وی ئه‌و نه‌بیت مه‌سعود بارزانی هه‌ر وه‌ك سه‌رۆكێ‌ هه‌رێمێ‌ بمینیت. ره‌نگه‌ سه‌ركرده‌یێن هنده‌ك حزبان وێ‌ یه‌كێ‌ نه‌زانن كو یه‌زدانێ‌ مه‌زن نیعمه‌ته‌كا خودایی ب ڤێ‌ هه‌رێمێ‌ به‌خشییه‌ كو ئه‌وژی ئاسایش و ته‌ناهی و پێگه‌هه‌كێ‌ نایاب د هه‌موو بواراندا هه‌یه‌. بۆ ڤێ‌ دۆخا هاتییه‌ خولقاتدن ژی، بارزانی ده‌سته‌كێ‌ به‌رز و بلند هه‌بوویه‌ داكو ئه‌ڤ هه‌رێمه‌ بگه‌هیته‌ د ڤی ئاستێ‌ نهۆ یێ پێشه‌نگدا كو وه‌ك مێرگه‌كا ده‌وله‌مه‌نده‌ و هه‌موو گه‌لێ‌ ئیراقێ‌ و گه‌لێن دراوسێ‌ به‌خیلیێ‌ پێدبه‌ن و چاڤ پێنارابن!. لژێر سیبه‌را سه‌ركردایه‌تییا بارزانی و به‌رهنگاربوونا وی یا قاره‌مانانه‌ ل همبه‌رى هه‌موو ئه‌و ئاسته‌نگ و دژواریێن كه‌ڤتینه‌ د رێیا هه‌رێمێدا‌, هه‌ر دیسان ل ناڤخوه‌یی ژی مه‌ترسییا داعشێ، ئه‌وا ل جهێ‌ وێ‌ راوه‌ستاندی و نه‌هێلایی چو مه‌ترسییا وێ بگه‌هیته‌ هه‌رێمێ‌, وه‌ك وێ‌ یه‌كێیه‌ ده‌وله‌ته‌كا خودان به‌رگری ب دامه‌زرینیت و كه‌رامه‌ت و مافێن هه‌ڤوه‌لاتیێن وێ‌ تێدا پاراستی بن.

كوردستان وه‌ك وه‌لاته‌كێ‌ ئازاد و خودان ئاسایش دهێته‌ دیاركرن، نیعمه‌تا خێر و گه‌شه‌كرنێ‌ تێدایه‌, ئه‌ڤه‌ ژی ئه‌و ئارمانجا گران به‌هایه‌، ئه‌وا پترییا گه‌ل و حوكمه‌تێن ده‌ڤه‌رێ‌ هیڤییێ‌ بۆ دخوازن. پێدڤییه‌ هیچ كورده‌كی چو گۆمان نه‌بن ب شیانێن به‌رێز مه‌سعود بارزانی, چونكو ڕۆلێ‌ مه‌زنێ‌ ڤی كه‌سی لسه‌ر ئاستێ‌ به‌رپرسایه‌تییا وه‌لاتی و ئه‌خلاقی، یێ‌ بهێز و خوه‌راگربوو, ئه‌ڤ كه‌سه‌ شیایه‌ هه‌رێمێ‌ بپارێزیت ژ هه‌موو پیلانگیرییان و ئه‌وان كه‌سێن حه‌ز هه‌ی تێكدان و كاڤلكاریێ‌ بیننه‌ ناڤ هه‌رێمێ‌. سه‌ركردایه‌تییا مه‌سعود بارزانی جهێ‌ رێز و پێزانینێن هه‌موو كورده‌كییه‌, له‌و كورد وه‌ك هه‌یبه‌ت و پارێزه‌رێ‌ خوه‌ ته‌ماشه‌ لێ دكه‌ن د ده‌مێن سه‌خت و دژوار دا.

هه‌كه‌ر ئه‌و هه‌ڤالێن به‌رپرس ل سلێمانیێ‌ یێن تاكو نهۆ باسێ‌ سه‌رۆكایه‌تیێ‌ دكه‌ن, هه‌ر ئه‌و دوور ته‌ماشه‌ی به‌رژه‌وه‌ندییا پێشه‌رۆژا ڤی گه‌ل و وه‌لاتی بكن یان هنده‌ك ژ وان ل ڤێرێ‌ و وێراهه‌ ته‌ماعییا كورسییا ده‌ستهه‌لاتێ‌ گرتبن، هه‌موو كه‌س ئیراقا پشتی 2013 ێ‌ ب چاڤێ‌ خوه‌ دبینیت كو كاره‌سات و نه‌هامه‌تیێن هه‌ر كه‌سه‌كی بۆ ماوه‌یه‌كێ‌ دوور و درێژ بێده‌نگ دكه‌ت, د هه‌مبه‌ر دا ئه‌ڤ گه‌شه‌كرن و خێر و ئاسایشا ل كوردستانێ‌ هاتییه‌ بجهكرن، دهێته‌ دیتن، بوویه‌ سه‌ده‌مێ‌ بنه‌مایه‌كێ‌ جوان و جادده‌یه‌كا پاكژ، هه‌روه‌ها ملله‌ته‌ك هاتبیته‌ ڤه‌گۆهاستن به‌رب پێشكه‌ڤتن و سه‌رفیرازیێ‌, یا گرنگ و فه‌ر بۆ هه‌ر ئێك ژ سیاسه‌تمه‌دارێن كوردستانێ‌ شانازیێ‌ بكه‌ت و سه‌ر به‌رز بیت كو بارزانی ئه‌ڤ خه‌ونه‌ ب جوانترین شێوه‌ بجهئینایه‌. هه‌كه‌ر ئه‌م لژێر ده‌ستهه‌لاتدارییا ڤی سه‌ركرده‌یی هه‌ڤپشك و هاریكار بین، بۆ وان نابیته‌ چو كێماسی, به‌لكو به‌روڤاژی سه‌ربه‌رزی و به‌رپرسایه‌تییا وان ب جوانی دێ‌ هێته‌ دیاركرن و چو ژی ژ وان كێمنابیت!.

گه‌له‌ك سه‌یره‌ د هنده‌ك ده‌ماندا ئه‌ره‌بان گوهلێببیت كورد د ناڤخوه‌دا ناكۆكن لسه‌ر مه‌سه‌له‌یا سه‌رۆكاتییا هه‌رێمێ‌, د ده‌مكیدا پتر ژ بیست سالانه‌ بارزانی سه‌رۆكاتییا كوردان دكه‌ت و گه‌هاندینه‌ ڤێ‌ ئارامییا نهۆ و گه‌له‌ك ژ ڤان كه‌سان هێشتا هه‌ر نه‌هاتبوونه‌ مه‌یدانا سیاسه‌تێ‌, بتنێ‌ ئه‌ڤ ده‌مه‌ نه‌بیت كو د ڤێ‌ قۆناغا گه‌شه‌كرنێدا سودمه‌ند بووینه‌. باشتر بۆ ڤان لایه‌نان بێى‌ ناكۆكی و دوور ژ دولایه‌نیێ‌، هه‌ر بارزانی هه‌لبژارتبایه‌ بۆ سه‌رۆكاتییا هه‌رێمێ‌، داكو هه‌ر ب مه‌زنی بمینین و ده‌وله‌ت رێزێ‌ ل مه‌ بگرن و ل لایێ‌ گه‌لێن دونیایێ‌ ژی حساب بۆ مه‌ بهێته‌كرن.

ئه‌ڤ مێرگ و كه‌سكاتی و ئاسایش و ئارامییه‌، په‌ناگه‌هه‌كه‌ بۆ هه‌ر كه‌سه‌كێ‌ بڤێت لژێر ئێمناهییا وێ‌ هه‌ست ب سه‌رفیرازیێ‌ بكه‌ت. ئه‌و تشتێ‌ ئاشكرا سه‌باره‌ت ڤی سه‌ركرده‌ی, زه‌لامه‌كێ‌ ئازا و خودان ئیراده‌یه‌كا بهێزه‌, یه‌زدانێ‌ مه‌زن ژی هوشیارییه‌ك ب ڤی سه‌ركرده‌ی به‌خشییه‌ كو زۆر كه‌سێن كێم ب ڤی ره‌نگی هه‌نه‌, دیسان ئه‌و كه‌سایه‌تییه‌كێ‌ كوردپه‌روه‌ره‌، له‌و هه‌ژی وێ‌ یه‌كێیه‌ ببیته‌ سه‌ركرده‌یێ‌ پێشمه‌رگه‌ی. هه‌ر د ڤی ڕوویدا، هه‌رێم پاراستییه‌ و مێرگه‌كا ده‌وله‌مه‌ند بو چه‌سپاندییه‌, هه‌ر كورده‌ك وێ‌ هه‌ستێ‌ دكه‌ت كو نیعمه‌ته‌كا خوداییه‌ و چو تشته‌كێ‌ دی جهێ‌ وی ناگریت.

گه‌لێ‌ كورد ل هه‌رێما كوردستانێ‌، باشتر ژ هه‌ر كه‌سه‌كی مێژوویا ڤی سه‌ركرده‌ی دزانن, ئه‌ڤ سه‌ركرده‌یه‌ ژ هه‌ژی بلندترین پله‌یا وه‌فاداریێیه‌ ژ مه‌ پێخه‌مه‌ت بلندراگرتنا پێگه‌هێ‌ ڤی كه‌سی، وه‌ك سه‌ركرده‌یه‌كێ‌ كوردێ‌ مه‌زن. مێژوو ناڤێ‌ وی ل لاپه‌ره‌كێ‌ به‌رز تۆمار دكه‌ت و باسێ‌ چیرۆكا سه‌رۆكه‌كی دكه‌ت كو رێیا گه‌لێ‌ وی به‌ره‌ڤ سه‌رفیرازیێ‌ برییه‌, ئه‌و ژ هه‌ژی وێ‌ یه‌كێیه‌ گه‌لێ‌ كورد وه‌فاداربیت بۆ وی.
خودایێ‌ مه‌زن كوردستانێ‌ و گه‌ل سه‌ركردایه‌تییا وێ‌ بپارێزیت, ئومێدا سه‌ركرده‌یێن باش و خودان ویژدان ئه‌وه‌ به‌ره‌ڤ چاره‌سه‌رییان بچن كو ئه‌و ریێا بتنێ‌ یه‌ بۆ ئاڤاكرنا وه‌لاتی و ئالایێ‌ ڤێ‌ هه‌رێمێ‌ هه‌ر یێ‌ به‌رز و بلند بیت لژێر سیبه‌را ڤی سه‌ركرده‌یی, خودایێ‌ مه‌زن ڤی گه‌لی بپارێزیت ژ هه‌ر به‌لایه‌كێ‌.

بابه‌تێن ب ڤێ مژارێ ڤه‌ گرێدای