سلامەتییە خەلیل قەدشی

زێرەڤان تەمو

خویایە چینا رەوشەنبیر و ھونەرمەند و نڤیسکاران ھەردەم خودان کەد و پر خزمەت و داھێنانن بۆ جڤاکێ خۆ و ھەردەم قوربانیدەرێن جڤاکێ خۆ نە و مینا شەمالکێ خۆ دحەلینن و روناھییێ ددەنە دەردورێن خۆ، ل کوردستانێ ژی زۆر بەھرەدار و بەھرەمەند د ھەموو وار و بیاڤاندا ھەنە لێ دکارین بێژین پر بەرھەمترین و کێم دەرامەترین تەخێن جڤاکێ بەراورد دگەل بەھرەدارێن ولاتێن دیتر .

ب دیتنا من وەکو پێتڤی رۆل و خزمەت و خەمخۆریا وان ل بەرچاڤ نەھاتییە وەرگرتن و تەنانەت رەنگە زۆر کەس ژی ھەبن کو خودانێ چەندین بەرھەمێن نڤیسکی بن د وارێن جودا دا لێ ب نەبوونا ھیچ ژێدەرێن دارایی نەکاریت بەرھەمێ خۆ ب چاپ بگەھینیت و بێختە بەردەستێ خوینەر و خواندەڤانان ئەڤجا سەر باری کو ل چاخێن بەرێ دوژمنێن گەلێ مە دیرۆکا گەلێ کورد نڤیساندییە لدیڤ خواست و حەزا خۆ و بۆ بەرژەوەندیا خۆ، لێرە دپرسم زۆر فەر و گرنگە کار لسەر ڤێ ئێکێ بھێتەکرن کو خزمەت و خەبات و بەرھەم و بەرکارێ مە بێتە پاراستن و دیکیۆمێنتکرن د ھەموو وار و بیاڤاندا  کو ئەو ژی ب رێکا نڤیسکار و ھونەرمەندایە دگەلدا ژی دڤێت رۆلێ ڤان کەسان لبەرچاڤ بھێتە وەرگرتن رێز ل وێ خزمەتێ بھێتە گرتن.

یا من دڤێت بێژم و من مەرەم پێ (خەلیل قەدشی)یە کو رۆل و خزمەتەک ھەری مەزن پێشکێشکرییە و پشکداری ل پتر (٧٠٠ ) دراما یێن کومیدیێ دا کرییە ژبلی بەرنامێن دلڤەکەر و چەندین سەربۆر و پەند و ئامۆژگاری ب رێکا کارێن خۆ یێن ھونەری پێشکێشی جڤاکی ب رەنگەکێ گشتی ل کوردستانێ کرییە و ل بادینان ب تایبەتی.

ڤێ داویێ ئەکتەرێ بناڤ و بانگ و بەرنیاسێ کومێدیێ بادینان (خەلیل قەدشی) تووشی نەخۆشیێ بوویە وەکو ئەز ھایدار ل نەخوشخانێ یێ نڤاندی یە، دالەڤخوازین ژ خودێ مەزن کو ب زویترین دەم سلامەتیێ بۆ بھنێریت و ساخلەمییا ھونەرمەندێ مە باش ببیت و داوی نەخوشی بیت و تەمەنێ ھونەرمەندێ ناڤبری درێژبیت، پویتەدان ب ڤی بەھرەداری و کەسانێن رەوشەنبیر و نڤیسکار و ھونەرمەند دێ ھەست ب ھەبوونا خۆ کەن و دێ پتر رۆلێ خۆ گێرن د وان وار و بیاڤێن تێدا کار دکەن .

یا جھێ دەست خوشییێ ئەوە کو نڤیسینگەھا رێزدار (نێچیرڤان بارزانی) سەرۆکێ حکومەتا ھەرێما کوردستانێ ل دۆر نەخوشیا ھونەرمەندێ کومێدی خەلیل قەدشی ھاتە دەنگ و ھونەرمەد بخۆ ژی ھاتییە ھایدارکرن کو دێ لبن چاڤدێریا نڤیسینگەھێ بیت و یا پێدڤی بیت دێ بۆ ھێتە کرن.

کو ئەڤ چەندە گاڤەکا ھەری باش و د جھێ خۆ دایە ژبەرکو کەسانێن بڤی ئاوایی دێ ھەست ب خزمەت و خەباتا خۆ کەن، و دێ بیتە پالپشتیەک ژی کو کەسانێن د ڤی بیاڤی دا کار دکەن ھەست خزمەتا خۆ بکەن و ئومێدەوارین ئەڤ پرۆسەیە یا بەردەوام بیت و ھەر داھێنەرەکێ کورد ببیتە جھێ پویتە و بایەخدانا حکومەتا ھەرێما کوردستانێ ژبەرکو ھەر ئەون سەرکێشیا پێڤاژۆیا پەیڤێ و وەرارێ و پێشڤەچوونێ دکەن.

 

 

 

بابه‌تێن ب ڤێ مژارێ ڤه‌ گرێدای