سكرتێرێ جڤاتا وه‌زیران بۆ وار: ل مه‌ها ئێك دێ پڕۆژه‌یێ بودجه‌یا هه‌رێما كوردستانێ گه‌هیته‌ جڤاتا وه‌زیران

وار – دهۆک :

سكرتێرێ چڤاتا وه‌زیرێن هه‌رێما كوردستانێ بۆ وار رادگه‌هینیت؛ ‌د ده‌سپێكا سالا داهاتی دا ژ بۆ په‌سه‌ندكرنێ، بودجه‌یا 2015 یا هه‌رێما كوردستانێ دێ ئاراسته‌ی چڤاتا وه‌زیران بیت .
ئامانج ره‌حیم، سكرتێرێ چڤاتا وه‌زێرێن هه‌رێما كوردستانێ د داخۆیانییه‌كا تایبه‌ت دا بۆ وار راگه‌هاند؛ پشتی په‌سه‌ندكرنا پڕۆژه‌ قانوونا بودجه‌یا سالا 2015ێ یا ئیراقێ ژ ئالیێ جڤاتا وه‌زیران ڤه‌، ل هه‌رێما كوردستانێ ژی جڤاتا وه‌زیران مژوولی ئاماده‌كرنا پڕۆژه‌ قانوونا بودجه‌یا هه‌رێمێ یه‌ و نها ژ ئالیێ وه‌زاره‌تا دارایی و ئابووری ڤه‌ ژ ئالیێ تیمه‌كا تایبه‌تمه‌ند ڤه‌ دهێته‌ به‌رهه‌ڤكرن.
گۆت ژى: “پاش ڤێ ئه‌و پڕۆژه ‌قانوونه‌ دێ هێته‌ جڤاتا وه‌زیران و ب پڕانیا ده‌نگێن وه‌زیران دێ هێته‌ په‌سه‌ندكرن و پاش ژ بۆ په‌سه‌ندكرنا دوماهیێ دێ په‌ڕله‌مانێ كوردستانێ هێته‌ هنارتن”.
سكرتێرێ چڤاتا وه‌زیران ئه‌و یه‌ك ژی بۆ وار ئاشكرا كر، ژبه‌ر ره‌وشا ئالۆزا نها یا ئیراقێ ب گشتی و ب تایبه‌تی ل هه‌رێما كوردستانێ، ئه‌و نه‌شێن چ ده‌م و ژڤانێن دیاركری بۆ ب گه‌هشتنا بودجه‌یا 2015ێ بۆ جڤاتا وه‌زیران دیار بكه‌ن، لێ پێشبینی ئاماده‌ركرنا پڕۆژه ‌قانوونا وێ ژ ئالیێ وه‌زاره‌تا دارایی و ئابوورییا هه‌رێمێ ڤه،‌ تا مه‌ها ئێك یا سالا نوو ب دوماهی بهێت.
جڤاتا نوونه‌رێن ئیراقێ ل پێنجشه‌مبا بۆری خواندنا ئێكێ بۆ بودجه‌یا 2015ێ ب دوماهی ئینا پشتى كو جڤاتا وه‌زیران پڕۆژه‌یێ وێ ب 103 ملیار دۆلاران په‌سه‌ندكری.
ب وی ئاوایێ نوكه‌ ل به‌ر ده‌ستێ جڤاتا نوونه‌ران، پرۆژه‌یێ بودجه‌ی ل سه‌ر بنه‌مایێ بهایێ 60 دۆلاران بۆ ئێك به‌رمیلا پترۆلێ و هه‌روه‌سا ب قه‌باره‌یێ 20 ترلیۆن دیناران كورتهێنان بودجه‌یا سالا نوو هاتییه‌ دارێتن.
به‌هرا هه‌رێما كوردستانێ ژ بودجه‌یێ گشتیێ ئیراقێ 17%ێ یه‌ و ل گۆری قه‌باره‌یێ وێ به‌غدا دێ 23 ملیار دۆلاران بۆ هه‌رێما كوردستانێ هنێریت.

بابه‌تێن ب ڤێ مژارێ ڤه‌ گرێدای