سـه‌رهاتیێن حه‌زژێكرنا ژ ئێك لاییڤه‌

سـه‌رهاتیێن حه‌زژێكرنا ژ ئێك لاییڤه‌

Capture

وار – فه‌هیما ئیبراهیم :

ئه‌ڤ هه‌لویسته‌ ل نك گه‌له‌كان چێدبت و چێدبت ژی و به‌لكو سه‌رهاتیێن حه‌زژێكرنا ژ ئێك لاییڤه‌ گه‌له‌ك بن و ئه‌ڤه‌ ژی ئێك ژوانه‌ ل ڤێره‌ به‌رچاڤ دكه‌ین.
بێزار بووم ژ بێده‌نگیێ‌ ژ زمانێ‌ چاڤان، من وه‌سا هزردكر بێده‌نگییا من و چاڤێن من دێ‌ شێن راستییا دلێ‌ من بۆ ته‌ ئاشكرا كه‌ن. بێده‌نگ مام و دێ هه‌ر یا بێده‌نگ بم ژی، چنكو پێنوسێ‌ من بتنێ‌ د تاریێ‌ دا و ل سه‌ر لاپه‌رێن په‌رتووكا بیرهاتنێن من ئه‌ڤینا ته‌ دنڤیسن، من وه‌سا هزركر كو بێده‌نگیا من باشتره‌ ژ وێ‌ ئاخڤتنێ‌ یا تو تێنه‌گه‌هی، به‌لكو نه‌ ژبه‌ر لاوازییا كه‌سایه‌تییا خوه‌ یا بێده‌نگم، یان ژی هه‌ست ب هه‌بوونا ته‌ د ناڤ دل و جانێ‌ خوه‌ دا ناكه‌م، به‌لكو ژبه‌ر هندێ‌ بت كو رێزگرتن ل خویاتیا ته‌ دگرم هه‌روه‌سا رێزێ‌ ل هه‌ست و سۆزێن ته‌ دگرم كو چ جهێ‌ من دناڤ دا دیارنینه‌.
داخوازا لێبۆرنێ‌ ژ ته‌ دكه‌م كو بێ‌ ده‌ستوری هاتیمه‌ دناڤ ژیانا ته‌ دا و ته‌ هه‌موو هه‌ست و سۆزێن من داگیر كرین. دێ‌ ژیم دگه‌ل جیهانا خوه‌ یا ئاشۆپی یا كو تو قه‌هره‌مانێ‌ هه‌موو سه‌رهاتیێن وێ‌، دێ‌ پاراستنا وی كه‌م هه‌ڤركیێ‌ ژ بۆ مانا وێ‌ كه‌م، به‌لكو د جیهانه‌كێ‌ دا بژیم تو چ رێزێ‌ لێ‌ نه‌گری و ده‌م و جهی بیرهاتنێن مه‌ دگه‌ل ئێك نه‌بن، هه‌ر تشتێ‌ ل ده‌وربه‌رێن من نه‌بنه‌ شاهد ل سه‌ر ئه‌ڤینا مه‌ هه‌ست ب په‌یڤێن مه‌ دگه‌ل ئێك نه‌كه‌ن، و ژیان تێرا خه‌ونێن مه‌ پێكڤه‌ نه‌كه‌ت، لێ‌ دێ‌ هه‌ر ئه‌ڤینا ته‌ ددلێ‌ من مینا ئاگره‌كێ‌ هل و نه‌ ڤه‌مریای مینت، ڤۆلكانا دلێ‌ من ب دیتنا ته‌ دێ‌ فیرێت و هه‌ر دێ‌ په‌ژیێن وێ‌ بلند بن.
به‌لكو بێده‌نگی و ده‌ستبه‌ردان ژ ته‌ باشترین دیاری بت پێشكێشی ته‌ و خوه‌ دكه‌م دا كو مه‌ودایان كورت كه‌ن، نه‌خوه‌شی و داكه‌تن و بێزارییا ژ ده‌ستدانا ته‌ دێ من ئیخنه‌ د هه‌لویسته‌كی نه‌خوه‌ش دا، لێ‌ پێدڤییه‌ جاران چاڤێن خوه‌ ب نقینم و هزرێن خوه‌ د وان رۆژێن بۆری دا بكه‌م، ئه‌و رۆژێن به‌ری ئه‌ڤینا ته‌ زالبوونێ‌ لسه‌ر گیانێ‌ من بكه‌ت و ب ئێكجاری كارتێكرنێ‌ لسه‌ر ژیانا من بكه‌ن، مرۆڤه‌كی چ هه‌ست و سۆز به‌رامبه‌ر من نه‌بن، به‌لكو ب ئێكجاری ئاگه‌هـ ژ من نه‌بت، مرۆڤه‌كێ‌ هه‌ست ب په‌یڤێن من نه‌كه‌ت هه‌ست بێده‌نگیا من نه‌كه‌ت و هێلێن سۆر دناڤبه‌را مه‌ دا هه‌بن نه‌ جهـ و نه‌ ده‌سهه‌لات و نه‌ خه‌لك و نه‌ جڤاك رێگر بن دناڤبه‌را مه‌ دا.
دبت ده‌روونێ من یێ‌ ئارام نه‌بت، لێ‌ ئه‌ڤه‌ شێوازێ‌ ژیانا منه‌ و دێ‌ هه‌ر مینم عاشقا ته‌ د سه‌ر هندێ‌ را كو دزانم ئه‌ڤه‌ نه‌ دادییه‌ و نه‌ مافێ‌ منه‌، لێ‌ حه‌زژێكرنا ته‌ رۆژ بۆ رۆژێ‌ دێ‌ رژدیا من زێده‌تر لێ‌ كه‌ت كو ب ته‌ڤه‌ بهێمه‌ گرێدان. د سه‌ر هندێ‌ را كو یا پشتگه‌رمی ئه‌ڤینا ته‌ نینم د ڤێ‌ ژیانێ‌ دا تا ژیێ‌ خوه‌ هه‌موویێ یا بێبه‌هربم و د تارییا كوباری و مه‌زناهیا خوه‌ دا بژیم، دێ‌ هه‌ر حه‌زژێكرنا ته‌ نهینیا ژیانا من مینت. جاران د ره‌وشه‌كا ئالۆز دا دبۆرم گیانێ من نه‌شێت زالبوونێ‌ لسه‌ر هه‌ستێن من بكه‌ت، ده‌مێ‌ په‌یڤێن من شیان نه‌ بن ده‌ربرینێ‌ ژ هه‌ست و سۆزێن من بكه‌ن بێده‌نگیا من دێ‌ باشترین به‌رسڤبت كو په‌یڤێن من نه‌شیابن ده‌ربڕینێ‌ ژێ‌ بكه‌ن، دێ‌ بێده‌نگییا من بیته‌ گرنژینه‌كا هیڤیێ‌ بۆ پاشه‌رۆژه‌كا گه‌ش، ژبه‌ركو نه‌ گۆنه‌ها منه‌ كه‌ڤتیمه‌ د ئه‌ڤینه‌كا ئاشۆپی دا، نه‌ گۆنه‌ها منه‌ كه‌سێ‌ به‌رامبه‌ر د هه‌ست و سۆزێن من نه‌گه‌هت، لێ‌ بتنێ‌ من باوه‌ری یا ب هندێ‌ هه‌ی ئه‌و كه‌سێ‌ ژ دل حه‌زژێ‌ بكه‌م پێدڤییه‌ ب وێ‌ پله‌یا حه‌زژێكرنا من حه‌ز ژ من بكه‌ت و چ هه‌ڤپشك بۆ حه‌زژێكرنا من ددلێ‌ وی دا نه‌بن، شاشیا من ئه‌وه‌ من شیانیێن رووبرووبوونێ‌ نینن، ده‌مێ‌ كه‌فتیمه‌ د عشقا وی دا من نه‌شیا راستیا دلێ‌ خوه‌ بۆ ئاشكرا كه‌م به‌لكو شكه‌ستنا دلێ‌ من ژ ئه‌گه‌رێ‌ نه‌زانینا من بت، لێ‌ دێ‌ هه‌ول ده‌م د هه‌ر چركه‌یه‌كێ‌ دا وی ژبیربكه‌م، ژبه‌ركو ئه‌ڤینا ئێك لا ده‌رده‌كی بێ‌ ده‌رمانه‌.

بابه‌تێن ب ڤێ مژارێ ڤه‌ گرێدای