سترانا كوردى و سكسیسزم

سترانا كوردى و سكسیسزم

گۆتار – هه‌ڵمه‌ت كوێستانى

هونەرمەند سەعید گاباری رەخنە ل کرێتکرنا فۆلکلۆرێ کوردی ب رێیا گۆتنا پەیڤێن بێپەردە د سترانێن گۆڤەندان دا ژ ئالییێ هندەک سترانبێژان ڤە، یێن کو ب دەڤێ خوە ب خوە دوپات دکەن، کو تنێ پارە ئارمانجا وانە، گرتن.

  • جارێ یێ ئاگەهـ ژ ڤی بابەتی نەبیت، یێ کو ئەڤە چەندین حەفتییە ئازرییە، بلا تەماشەیی بەرنامەیێ بۆچی یێ تێلەڤزیۆنا وار بکەت.

یەک ژ وان سترانبێژان ب سڤکاتیپێکرنا ھەڤپیشەیێن خوە و پێشەنگێن سترانا کوردی بەرەڤانییێ ژ خوە دکەت و دبێژیت، بەریا وی ژی سترانێن بێپەردە ب بەژنوبالا رەگەزێ مێ ھاتینە گۆتن.

ژ ھەژی گۆتنێیە، کو ئاستێ رەوشت و رەوشەنبرییا ھەر ھونەرمەند/سترانبێژەکێ کو د وی بەرنامەیێ تێلەڤزیۆنا وار دا دەردکەڤیت، ب خوە دیار دبیت، بێ کو ئەز پێناسەیەکێ بدەمێ.

لێیا گرنگ د بابەتی دا شاشتێگەھشتنا ھونەری و ئازادیا ب ناڤ ھونەرمەندانە.

1- بلا، ببە سترانبێژ و گەر بخوازی تایبەتمەندیا خوە یا پیشەیی بکە سترانێن بێپەردە. ئەو ئازادی یە و نابیت بھێت سنۆردارکرن.

لێ… د چارچووڤەیێ بەرھەمێ خوە دا (ئەلبووم، سیدى، ڤیدیۆ…) وەبکە، مینا ئەحمەدێ نالبەند، وەکی ئەو سترانبێژ ب خوە ژی ئاماژە پێ ددەت. وی دەمی گوھدارێن تە ژی ئازادن ل دووڤ داخوازا خوە بریارێ ل سەر تە بدەن.

دەما ستران ل جھەکێ گشتی مینا شەھیانەکێ ھات گۆتن، ئانکو ل جھەکی، کو رازەمەندیا ھەموو ئامادەبووییان ل سەر سترانبێژ و سترانان نەھاتیە وەرگرتن، ئازادیا وان ھەموویان ل پێشیێ دھێت و ئەو نابیت سنۆردارکرنا ھونەری.

2- ببە ستراننڤیس، پەیڤان ب دووڤ دلێ خوە ژ بۆ دەربرینا ھەستێن خوە بنڤیسە.. دەستووری ئەو ماف نە تنێ ب نڤیسکاران داییە، ژبۆ ھەمویان پاراستییە.

لێ… دەما تە ئەو پەیڤێن تایبەت دانان سەر ئاوازەکا نە یا خوە و سترانا خوە ب کراسەکێ فۆلکلۆری پێچا، وی دەمی ژی مافێ گشتی یێ گەلەکی، ژبەر کو فۆلکلۆر پێناسەیا وی یە، ژ مافێ تە یێ ئازادیا رادەربرینێ بھێزترە.

ژ ئالیەکێ دی ژی ڤە ئەڤ بابەتە نە نوویە و ب بھا و پیرۆزییێن جڤاکیڤە گرێدایی یە.

دەما د سترانێن بەرێ دا باس ل ئەڤینییا کچەک و کورەکی دھات کرن، بێ گۆمان ژ بلی چیرۆکا وان یا ئەڤینیێ ئاماژە ب ھەستێن وان ل بەرانبەر ھەڤدوو ژی دھات دان و سکس ژی دبوو بابەتێ سترانان.

لێ… جودا یە، دەما سترانەک ب مەرەم تنێ ل سەر سینگوبەرێن کچ یان ژنەکێ دھێت گۆتن.

خالا دوماھییێ بەلکو ژ بەر بالادەستییا رەگەزێ نێر ھەم د جڤاکی ب گشتی دا، ھەم ژی د ھونەری دا یە و لەو پتر ژ ڤی رووی ڤە، باس ل ھەستێن وی دھێت کرن. ژ دەم بۆ دەمی ھەڤسەنگیا ئازادیا ژن و مێران د ناڤ کوردان دا ھاتیە گوھۆرین. بەلکو ل ناڤ جڤاکێ مە یێ نھا سکسیزم بەرفرەھترە ژ دەمەکێ دی.

لێ ب گشتی کولتۆرێ کوردی سکسیست نەبوویە، ھەرچەندە نھا ئەم خوەدان جڤاکەکێ سکسیستین. ل ئەڤێ ژی نە دێ سەندیکایا ھونەرمەندان رێگریێ کەت، گرنگە دەستوور و پاسەوانێن وی مە ژێ بپارێزن.

سکس سرۆشتی یە، چ دەستھەلات نەشێن مرۆڤی ژێ بکەن، تنێ سۆزییا مرۆڤی ب خوە نەبیت. لێ سکسیزم ئایدۆلۆژیەکە مرۆڤ پێ ل جیھانێ دنەریت. گەر جڤاک دروست ھات پەروەردەکرن، ئامادەبوییێن شەھیانان ب خوە ھەموو سترانان قەبوول ناکەن و پێدڤی ناکەت ھونەرمەندەکێ مەزن مینا سەعید گاباری ژی ژ خەمخۆرییێ، خوە بینیت بەرانبەر سترانبێژەکێ بێتۆرە و رووبروویی گەفان ببیت.

 

بابه‌تێن ب ڤێ مژارێ ڤه‌ گرێدای