زڤستان نعمەت بوو یان لەعنەت؟

عیماد ئالیخان

ژبەر دژواریا زڤستانا ئەڤ سالە و بەردەوام بارینا بەفر و بارانا کو رێژەیەکا مەزن تا نوکە باریە و چاڤەرێ دھێتە کرن ئەڤ رێژە ھێشتا زێدەتر لێبھێت، کۆ ژلایەکی ڤە مفایەکێ گەلەکێ باشە بۆ کەرتێ چاندنێ و جوتیاران، لێ ژ لایەکێ دیڤە زیانێن مەزن گەھاندینە ھژمارەکا ھاولاتیان ب رەنگەکێ گشتی، بۆ نموونە ھاتنە خوارا کەڤران ژ چیای بۆ سەر جادەیان کۆ د حالەتەکی دا کەسەکی گیانێ خوە ژ دەست دا ل سکرێ دھۆکێ سەرەرات ھندێ گەلەک روودانێن مادی ل دووڤ خوە ئینان و پەیدابوونا گەلەک روودانێن ھاتن و چوونێ، ھەروەسا ژ ئەنجامێ باران بارینان زیان ب گەلەک خانی و ئاڤاھیان کەفتیە و … ھتد. ھەر ژ ئەنجامێ باران بارینێن ئەڤ سالە كو ھەرێما کوردستانێ ب رەنگەکێ گشتی ڤەگرتی، کو بتنێ ل پارێزگەھا دھۆکێ تا نوکە پتر ژ ٨٠٠ ملم بارانێ بارینە و ئەڤ رێژە نە یا کێمە و سکرێ دھۆکێ ژ ئەنجامێ ئەڤان بارانان پربوویە، وەکو ئەم دزانین کۆ ژێدەرێ سەرەکی یێ ئاڤا ڤی سکری لسەر بەفر و بارانایە، لەوا رێڤەبەریا سکرێ دھۆکێ رێژەکا باشا ئاڤێ بەردایە و دجھێ وێ یێ ئاسایێ دا دەرباز بوویە کو ب ناڤێ رووبارێ دھۆکێ دھێتە نیاسین، لێ ھندەک ھاولاتیان ھژمارەکا کافیتیریا و گازینۆ ئەڤە بۆ ماوێ چەندین سالە ل سەر ڤی رووباری دروستکرینە و ژ ئەنجامێ بەردانا ئاڤێ ژ سکری بۆ ڤی رووباری زیان ب وان کافتیریا و گازینۆیان و … ھتد کەفتیە و زۆربەیا وان ب تمامی ژناڤچووینە، و ئەڤێ چەندێ نیگەرانی و نەرازیبوون ل پشت خوە ئینان و بوویە جھێ دلتەنگیا خودانێن وان گازینۆیان! ئەرێ جھێن شولەژێ چاوا دەستوری دایە ھاولاتیان کافیتیریا و گازینیۆیان ل جھەکێ ھوسا ڤەکەن؟ وەکو ئەم دزانین ئەو جھە یێ بەردانا ئاڤا سکرێ دھۆکێ یە و ھەردەمێ سکر پربوو ژ ئاڤێ دێ د وی رووباری را دەرباز بیت، لەوا نوکە ژی بسەر وان کافیتیریا و گازینۆیان دا ھاتیە بەردان؟ ئەرێ پێش وەخت جھێن شولەژێ خودانێن وان کافیتیریا و گازینۆیان یێن کو زیان ڤێ کەفتی ئاگەھدارکربوون کو دێ ئاڤا سکری ھێتە بەردان و زیان ب جھێن وان کەفیت؟ یان ھەر دەمێ ئاڤا سکری تژی بوو دێ ھێتە بەردان؟ یان ژی رەوایە جھێن ھوسا ببنە کافیتیریا و گازینۆ؟ ئەرێ دێ چارەنڤیسێ زەرەرمەندێن ڤان کافیتیریا و گازینۆیان چ بیت؟ یان ئەوێن زەرەرمەند دێ ژلایێ حکومەتێ ڤە ھێنە قەرەبووکرن؟ و کەسانێن کێمتر خەمی کری و بووینە ئەگەرێ پەیدابوونا ئەڤێ ئاریشێ دێ ھێنە سزادان؟ بێ گومان ژ ئەنجامێ ژناڤچوونا ڤان کافیتیریا و گازینۆیان زیانێن مەزنێن ئابووری ب گەلەک خێزانان کەفتیە یێن کو داھاتێ وان ل سەر ڤان گازینۆیان بوو، ژ ئەڤرۆ پێڤە دێ چاوا پێدڤیێن ژیانا خوە یا رۆژانە پەیداکەن؟ کو کارێ وان و ھەموو کەل و پەلێن وان ژناڤچووینە! باشتر ئەوە ئێدی ئەو جھە نەبنە کافیتیریا و گازینۆ و بلا بتنێ بۆ دەربازبوونا ئاڤێ بیت، ژبەرکو نەیا ئاسایی یە د ماستەرپلانێ دا رووبار بیت و د راستیێ دا گازینۆ و کافیتیریا ل سەر بھێنە دانان ژلایێ خەلکی ڤە، و جھێن شولەژێ بلا رێکێ و دەستوریێ نەدەنە چ کەسەکی جھەکێ وەکی رووبارێ دھۆکێ بۆ ھەر چ مەبەست بیت بھێتە بکارئینان و کارتێکرنێن نێگەتیڤ ل دووڤ دا پەیدا ببن نموونە ژی ژناڤچوونا ھژمارەکا کافێتیریا و گازینۆ ئەوێن لسەر ھاتینە دانان. سکرێ دھۆکێ ل سالا ١٩٨٠ دەست ب ئاڤاکرنا وی ھاتبوو کرن و ل سالا ١٩٨٧ ئاڤ تێدا ھاتە عومبارکرن و ژێدەرێ سەرەکی یێ ئاڤێ یە بۆ ھژمارەکا مەزنا تاخ و گەرەکێن پارێزگەھا دھۆکێ

بابه‌تێن ب ڤێ مژارێ ڤه‌ گرێدای