زاڤایێ‌ خوه‌ د نه‌خوه‌شخانه‌یێڤه‌ قوتا و سه‌قه‌تكر

زاڤایێ‌ خوه‌ د نه‌خوه‌شخانه‌یێڤه‌ قوتا و سه‌قه‌تكر

 

cvakkkkkrrrrrr

وار – دهۆک :

پشتی دو برایان دگه‌ل پسمامه‌كێ‌ خوه‌، سه‌را خوه‌شكا خوه‌ د نه‌خوه‌شخانه‌یێ‌ ڤه‌ داى، زاڤایێ‌ خوه‌ ب گرانی قوتا و تا 50%ێ عه‌جز بۆ چێكرى، دادگه‌ها تاوانێن دهۆكێ‌ بڕیاردا هه‌ردو برا ئه‌وێن ب ناڤێن (گ) و (ك) دگه‌ل پسمامی ئه‌وێ‌ ب ناڤێ‌ (ز) بۆ هه‌یاما سێ‌ هه‌یڤان حوكمببن، ئه‌ڤه‌ د ده‌مه‌كی دا كو گونه‌هباران دگۆت (زاڤایێ‌ مه‌ ب تووڕه‌كرنا كه‌سوكارا مه‌، ئه‌م گه‌له‌ك تووڕه‌ كربووین و مه‌ هزر دكر سه‌را وی جه‌لتێ‌ ل كه‌سوكارا مه‌ دا).
سكالاكه‌ری بۆ دادگه‌ها تاوانان دیاركر كو به‌ری رۆژا روودانێ،‌ وی و هه‌ڤژینا خوه‌ وه‌كی گه‌له‌ك هه‌ڤژینان كێشه‌ ل گه‌ل ئێك هه‌بوون و گۆت: ”ل رۆژا روودانێ‌ جه‌لته‌كێ‌ ل هه‌ڤژینا من دا، ئه‌ڤجا من هه‌ڤژینا خوه‌ بره‌ نه‌خوه‌شخانه‌یێ‌، ل وێرێ‌ هه‌ردو برایێن وێ‌ (گ) و (ك) دگه‌ل پسمامێ‌ وێ‌ (ز) هه‌وارا هه‌ڤژینا من هاتن، ل ده‌مه‌كی نۆشداران گۆت ڤێ‌ ژنێ‌ ببه‌نه‌ نه‌خوه‌شخانه‌یا هه‌وارهاتنێ‌ ئه‌و دێ‌ پتر شێن چاره‌سه‌رییا وێ‌ كه‌ن، ئینا من ژی ده‌ست هاڤێته‌ هه‌ڤژینا خوه‌، داكو ل ترومبێللا خوه‌ سیاربكه‌م و ببه‌م، لێ‌ گونه‌هباران قه‌بوول نه‌كرن و گۆتن دێ‌ ب ترومبێلا هه‌وارهاتنێ‌ به‌ین، ئینا من ژی ئه‌و چه‌نده‌ قه‌بوول نه‌كر، ئاخڤتنه‌ك ژ من و ئێك ژ وان، دئه‌نجامدا هه‌ر سێیان د نه‌خوه‌شخانه‌یێ‌ ڤه‌ دانا من و ئه‌ز ب گرانی قوتام و بریندار كرم، ئانكو تبله‌كا من شكاند و دربه‌ك ل دفنا من دا و ژ گوهان ڤه‌ ئه‌ز هێڕكرم، ژبه‌ر ڤێ‌ چه‌ندێ‌ من ل قۆناغا ڤه‌كۆلینێ‌ سكالا ب دژی وان تۆماركر، لێ‌ نوكه‌ ئه‌ز یێ‌ ل وان بۆریم و ناخوازم بهێنه‌ سزادان”.

ژ لایێ‌ خوه‌ ڤه‌ راپۆرتا نۆشدارى بۆ دادگه‌هێ‌ دا زانین كو ژ ئه‌نجامێ‌ وان دربێن خزمێن سكالاكه‌ری، ل رۆژا روودانێ‌ تبله‌كا وی شكه‌ست بوو و دفنا وی وه‌رمت بوو و ژ گوهان ڤه‌ هێڕببوو، له‌و 50%ێ عه‌جز بۆ وی چێبوو.
هه‌ر ئێك ژ گونه‌هباران (گ) و (ك) و (ز) ئێك ئێكه‌ ل به‌رامبه‌ر سه‌رۆكێ‌ دادگه‌هێ‌ و ده‌سته‌كا دادوه‌ران راوه‌ستییان و هه‌ر ئێكی ب ره‌نگه‌كی به‌ره‌ڤانی ژ خوه‌ كر و گۆتن، ”هندی هند سكالاكه‌ری به‌ری روودانێ‌ ئه‌و ژنا مه‌ دایه‌ وی تووڕه‌دكر، له‌و ئه‌م گه‌له‌ك تووڕه‌ كربووین و مه‌ هزر دكر ئه‌و جه‌لتا ل كه‌سوكارا مه‌ دای، ژ ئه‌نجامێ‌ قه‌هرێن وی بوویه‌، له‌و مه‌ ئه‌و قوتا، هه‌كه‌ وه‌كو دی هه‌موو ده‌مان مه‌ باشی بۆ زاڤایێ‌ خوه‌ دڤێت، ئه‌ڤجا ئه‌م دبێ‌ گونه‌هین”.
داواكارێ‌ گشتی یێ‌ دادگه‌ها تاوانان داخوازا سزایه‌كێ‌ سڤك بۆ گونه‌هباران ژ دادگه‌هێ‌ كر، ل دووماهیێ‌ دادگه‌ها تاوانان ل گۆر ماددێ‌ 412 برگا ژماره‌ 2 ژ قانوونا سزایێن ئیراقێ‌، بڕیاردا هه‌ر ئێك ژ گونه‌هباران (گ) و (ك) و (ز) بۆ هه‌یاما‌ سێ‌ هه‌یڤان بهێنه‌ حوكمكرن.

بابه‌تێن ب ڤێ مژارێ ڤه‌ گرێدای