رێڤەبەریا وەبەرھێنانێ بتنێ ناڤە!

رێڤەبەریا وەبەرھێنانێ بتنێ ناڤە!

عيماد ئالیخان

زۆربەیا یەکەیێن ئاکنجیبوونێ ل پارێزگەھا دھۆکێ کار تێدا ھاتینە راوەستاندن بێی کو بزانین ئەگەر چنە، بەرامبەر ھندێ ل پارێزگەھێن ھەولێر و سلێمانیێ بەردەوام یەکەیێن ئاکنجیبوونێ د ئاڤاکرنێ دانە وەکو ئەم ددەزگەھێن راگەھاندنێ دا ریکلامێن وان دبینین. بۆچی ھندەک پرۆژە ل دھۆکێ بۆ زێدەتر ژ ٧ سالانە کار تێدا ھاتیە راوەستان و رێڤەبەریا وەبەرھێنانێ دیڤچوونەکا جدی لسەر ئەگەرێن راوەستاندنا وان پرۆژا ناکەت؟! د رۆژێن بۆری دا و د بەشەکێ داخۆیانیا رێڤەبەرێ وەبەرھێنانێ ل پارێزگەھا دھۆکێ بۆ ئێک ژ کەنالێن راگەھاندنێ لسەر ئەگەرێن گیرۆبوونا یەکەیێن ئاکنجیبوونێ و نە تمامیا وان بۆ نەپێگیریا و کێمتر خەمیا خەلکی دیارکر! وەکی جەنابێ وی ئاماژە ب ئاخڤتنا خوە دای کو ل سالا ٢٠١١ ھندەک رێنما بو وان ھاتبوون کو ھاولاتی ب رێکا بانکا قستێن خوە بدەن، ھەروەسا د بەشەکێ وێ داخۆیانیێ دا دبێژیت «ھندی خەلک یێ ھاریکار نەبیت دگەل دەزگەھێن حکومەتێ ب پێگیریکرن ب رێنمایا دێ ئەڤ ئاریشە دووبارەدبن!!» من دڤێت بەحسێ پرۆژەیێ ئارام ستی بکەم و بو رێڤەبەرێ وەبەرھێنانێ رۆن و ئاشکەرا بکەم کو زۆربەیا خەلکی یێن کو شوقە ژ ڤی پرۆژەیێ ئاکنجیبوونێ بخو تۆمارکرین ب رێکێن یاسایی مامەلە ب رێڤەبرینە و ب رێکا بەنکا کوردستان یا نێڤ دەولەتی قستێن خوە داینە و بەلگە ژی یێن ددەستێ مەدا، ھەروەسا ددەزگەھێن راگەھاندنێ دا ریکلاما ڤان شوقەیان دھاتنە کرن ژ رۆژنامە و تلفزیۆن تاکو سالا ٢٠١٣، ئەرێ بو جەنابێ تە رێگری ل بەلاڤکرنا ریکلامێن وی پرۆژەی نەدگرت؟! مادەم بۆ تە ل سالا ٢٠١١ ھندەک رێنما ھاتبوون کو چ کەس ڤان شوقەیان بخو تومارنەکەت؟! و پشتی ڤێ مێژوویێ ژنوو ھەوە ھندەک رێنما د دەزگەھێن راگەھاندنێ دا بەلاڤکرن و لافیتە ھەلاویستن داکو ھاولاتێ چ شوقەیان ژ ڤی پرۆژەی تۆمارنەکەن!! ھەروەسا مەبەستا تە ب وێ گۆتنا جەنابێ تە گۆتی چیە کو خەلک نەیێ ھاریکارە دگەل دەزگەھێن حکومەتێ؟! ئەگەر ئەڤ شوقە ب رێکێن نەیاسایی و بێ دەستوری ھاتبنە ئاڤاکرن پا چاوا بەشەکێ وی پرۆژەی ئاڤابوویە و د بەرامبەر دا ھەوە چ پێرابوون دگەل وەبەرھێنەری نەکرن، ددەمەکی دا ئەگەر خانیکەکێ بچووک و بێ دەستۆری ژلایێ ھاولاتیەکی ڤە بھێتە ئاڤاکرن ئێکسەر ژلایی دەزگەھێن حکومەتێ ڤە دھێتە ھەلوەشاندن و پێرابوونێن یاسایی دگەل خودانی دھێنە کرن، و ئەڤ پرۆژەیێ ھندە مەزن و بەرچاڤ کو روویەکئ کرێت دایە باژێری و ھێلایە نیڤەروو و ھەیکەل و چ پێرابوونێن یاسایی دگەل خۆدانێ پرۆژەی و کەسانێن کێمتر خەم ھەتا نھا نەھاتیەکرن؟! ھیڤیا مە ژ رێڤەبەریا وەبەرھێنانێ و کەسانێن شولەژێ ئەوە کۆ چارەیەکا دووماھی بۆ ڤی پرۆژەی بینن و زێدەتر بلا خەلک نەبنە جھێ سەردابرنێ چونکی خەلک بێ زاربووینە و کەسێن کێمتر خەم بگەھنە سزایێ خوە ب رێکێن یاسایی.

بابه‌تێن ب ڤێ مژارێ ڤه‌ گرێدای