ریپا دارایى: باشترین چاره‌سه‌رى، ساده‌ترین چاره‌سه‌رییه‌.

ب.: فاضل عمر

ریپ یان كریز یان قه‌یران دبێژنه‌ ره‌وشه‌كا هند ئالۆز و شه‌پرزه‌، ته‌نگاڤ و ته‌نگژى و پل، كو نه‌ به‌س ب سانه‌هى چاره‌ نابت، به‌لكو نه‌دووره‌ ئه‌نجامێن مالوێرانى ل په‌ى بهێن، هه‌لبه‌ت هه‌كه‌ر نه‌هێته‌ چاره‌كرن.
دو تشتان وا ل من كر، ئه‌ز ژى مایێ خوه‌ د شۆله‌كى بكه‌م، ئه‌ز هوورهووركێن وى نه‌زانم، هه‌كه‌رچى ئه‌ز هه‌رده‌م پشته‌ڤانێ تایبه‌تمه‌ندىیێ و شه‌هره‌زاییێمه‌؛
1. هه‌ڤاله‌كێ كوردپه‌روه‌ر، هنده‌ك دره‌وێن عه‌بادى لدۆر هەرێمێ بۆ فێسبووكێ من هنارتبوون، و هه‌كه‌ر ئه‌وى ئه‌و دره‌وه‌ وه‌كو راستى باوه‌ر نه‌كربانه‌ بۆ من نه‌دهنارتن… ئانكو ره‌وشا هه‌یى یان ریپا هه‌یى گه‌هشتىیه‌ خودانێن مالێ ژى، وه‌ختێ كوردپه‌روه‌ره‌كى پتر باوه‌رى ب دژمنى هه‌بت ژ خودانێن مالێ، ئانكو گلۆپێ سۆر هلبوویه‌ و بۆڕیزانێ لێدایه‌.
2. من گوهێ خوه‌ ددا به‌رنامه‌یێ (له‌گه‌ل ره‌نج) د رووداوێ دا، كو هه‌مى ستوونێن چاره‌كرنا قه‌یرانێ كۆمكربوون و ئه‌وان پرۆژه‌یه‌كێ چاره‌كرنێ د پرۆژه‌یه‌كى وه‌ردكر، تاكو راده‌یه‌كێ، په‌ڕله‌مانتاره‌كى گۆت: من ئه‌نجومه‌نێ وه‌زیران پرۆژه‌بارانكرىیه‌!
ئه‌ز هزر دكه‌م؛ باشترین چاره‌سه‌رى، ساده‌ترین چاره‌سه‌رىیه‌. لێ، تشتێ ساده‌ و سانه‌هى، هه‌رده‌م به‌رگومانه‌ كو چاره‌سه‌رى بت، چونكى هه‌مى دبێژن ماكى ئه‌ڤێ نزانت!؟ ب گۆتنه‌كا دى، چاره‌سه‌رىیا ساده‌، هند سانه‌هىیه‌ كه‌س باوه‌رناكه‌ت چاره‌سه‌رى بت.
چاره‌سه‌رىیا ساده‌ چىیه‌؟
حوكمه‌تا هه‌رێمێ بڕیارێ بده‌ت؛ سندۆقێن پاره‌ى (بانكێن هه‌رێمێ) بكه‌ته‌ بانكێن دروست، و ده‌ینێن خه‌لكى لسه‌ر خوه‌ بكه‌ته‌ مال. و ده‌ستهه‌لاتێ بده‌ته‌ بانكان، ب كێماتى دو شۆلان بكه‌ن:
ئێك؛ هه‌یڤانه‌ هه‌ركه‌سى ماف هه‌بت هندى مووچه‌یێ نهۆ وه‌ردگرت ژ ئه‌وى پاره‌یێ لسه‌ر ناڤێ وى یه‌ ڤه‌كێشت.
دو؛ خه‌لك ئازاد بت كڕین و فرۆشتنێ د بانكێ دا پێ بكه‌ت.
ب دیتنا من ئه‌ڤه‌ دێ پتر ژ ئامانجه‌كێ هنگێڤت:
• خه‌لك دێ دلته‌نا بت كو پاره‌یێ وان ناچت، لێ دێ گیرۆ بت.
• خه‌لك دێ فێرى سیسته‌مێ بانكێ بت و نه‌دووره‌ هنده‌ك ئه‌وێن پاره‌یێن خوه‌ ڤه‌شارتین، ل هه‌ژمارا خوه‌یا بانكى زێده‌ بكه‌ن.
• خه‌لكى ماف هه‌بت ئه‌وى پاره‌ى لێك بگوهۆڕن. هۆسا لڤین دێ كه‌ڤته‌ بازاڕى، و مه‌ بڤێت نه‌ڤێت، دێ شۆل و بازرگانى ب ئه‌وى دراڤێ هه‌لپه‌سارتى هێته‌ كرن.
• حوكمه‌ت كرێ و سزایێن خوه‌ (هه‌قێ كاره‌ڤێ و ئاڤێ و باجێ و سزایان) ئێكسه‌ر ژ بانكێ وه‌رگرت، هه‌لبه‌ت پشتى ئاگه‌هداركرنا خودانێ هه‌ژمارێ.
ب دیتنا من، هه‌كه‌ر ئه‌ڤێ مه‌ ژ ریپێ خلاس نه‌كه‌ت، دێ باندۆرا وێ سڤك كه‌ت. ئێك ئاڕێشه‌ دى مینت:
هنده‌ك كه‌سێن تایبه‌تمه‌ند و شه‌هره‌زا، باندۆرا ئه‌ڤى پاره‌یێ نه‌هه‌یى یان پاره‌یێ (نه‌كاش) بخوینن و بزانن كه‌نگى حوكمه‌تا هه‌رێمێ دێ شێت (هێدى هێدى) ئه‌وى پاره‌یێ (نه‌كاش) بكه‌ته‌ (كاش).
دێ دوباره‌ بێژم؛ باوه‌ر بكه‌ن، باشترین چاره‌سه‌رى ساده‌ترین چاره‌سه‌رییه‌.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.