رۆژهه‌لاتا كوردستانێ..18كه‌س د خوه‌نیشاندانان دا برینداربوون

رۆژهه‌لاتا كوردستانێ..18كه‌س د خوه‌نیشاندانان دا برینداربوون

وار – دهۆک :

ل مهابادا روژهه‌لاتا كوردستانێ خوه‌نیشاندانێن مه‌زن ل هه‌مبه‌ر شه‌هیدكرنا كچه‌كا كورد هاتنه‌ كرن و تێدا په‌ڤچوون و ئالوزى دناڤبه‌را خونیشانده‌ران و هێزێن ئه‌منى دا په‌یدابوو و د ئه‌نجامدا 18 وه‌لاتى برینداربوون.

خونیشاندانا وه‌لاتیێن باژارێ مهابادێ بۆ وێ یه‌كێ بوو كو دوڤچوون بۆ كه‌یسا وێ كچا مهابادى یا ب ناڤێ (فه‌ریناز خوسره‌وانى) بهێته‌ كرن یاكو به‌رى چه‌ند روژان ژ ترسا ده‌ستدرێژیا سكسى یا به‌رپرسه‌كێ ئه‌منى ل قاتێ چارێ یێ هوتێلا تارا خو هاڤێتبوو خار و ژیانا خو ژ ده‌ست دابوو.

د خونیشاندانێ دا خه‌لكه‌كێ زور هاتنه‌ سه‌ر جاده‌یان و ئاگربه‌ردایه‌ هوتێلا تارا و سۆت‌، هێزێن پۆلیسان ژى بو به‌لاڤه‌كرنا خونیشانده‌ران گازا روندك رێژ بكارئینایه‌ و ئالوزى دناڤبه‌را خونیشانده‌ر و پولیساندا چێبوویه‌ و د ئه‌نجامدا 18 وه‌لاتى برینداربوون‌.

هه‌ر شڤێدى هه‌ژماره‌كا كه‌سێن نه‌نیاس هێرشى ئاڤاهیێ هه‌والگریێ ئیتلاعاتا ئیرانێ ل مهابادێ كر و ئه‌و ئاڤاهى ژى سۆت، حكومه‌تا ئیرانێ ژى هه‌ژماره‌كا مه‌زنا پۆلیسان ژ باژارێن دى ره‌وانه‌یى مهابادێ كرن و رێكارێن ئاسایشێ یێن دژوار گرتنه‌ به‌ر.

هه‌ڤده‌م بریاره‌ ئه‌ڤرۆ، ل چه‌ند باژاره‌كێن رۆژهه‌لاتا كودستانێ و دیسان چه‌ند ده‌ڤه‌ره‌كێن باشوورێ كوردستانێ، خوه‌نیشاندان بۆ پشته‌ڤانییا كوردێن مهابادێ بهێنه‌ كرن.

به‌رى چه‌ند رۆژه‌كان، كچا مهابادى (فه‌ریناز خوسره‌وانى) یا ته‌مه‌ن 26 سالى، وه‌ك كارگۆزار ل هوتێلا تارا كاردكر، ژ ترسا ده‌ستدرێژیا سكسى ژ ئالیێ به‌رپرسه‌كێ ئه‌منى ڤه‌، خو ل قاتێ چارێ یێ هوتێلێ هاڤێتبوو خار و ژیانا خوه‌ ژ ده‌ستدابوو‌ و كه‌سه‌ك ژى ب كوشتا وێ ژ ئالیێ پولیسان ڤه‌ هاتبوو گرتن.

 

بابه‌تێن ب ڤێ مژارێ ڤه‌ گرێدای