رۆژا ئالایێ‌ كوردستانێ‌

 

محه‌مه‌د ئیبراهیم ئامێدی :

هه‌رسال، جه‌ماوه‌رێ‌ كوردستانێ‌ ب رێز و نه‌وازش، رۆژا 17 كانوونا ئێكێ‌ وه‌ك رۆژا ئالایێ‌ كوردستانێ ساخ دكه‌ن. لێ‌ ئه‌ڤ ساله‌، ملله‌تێ كورد سیمایه‌كێ‌ هه‌ستیار و دژوار هه‌یه‌ و بۆ جیهانێ‌ دسه‌لمینیت كو رێزگرتنا ڤی ئالای چه‌ند یا مه‌زنه‌. ملله‌تێ كورد ب تام و كه‌یفخوه‌شییا بلندكرنا ڤی ئالایێ‌ پیرۆز و مێژوویی ل به‌رۆكێن شه‌ڕ دژى داعش لسه‌رده‌ستێن‌ پێشمه‌رگه‌یێن قاره‌مان و پارێزه‌رێن نیشتیمانى ل ده‌ڤه‌رێن كوردستانیێن نوو رزگاركری ڤێ بیره‌وه‌ریێ ساخ دكه‌ن، چنكو نهۆ گشت ملله‌تێ كورد دژی زۆرداری و تیرۆرستێن داعشێ ل به‌رۆكه‌كێ‌ به‌رفره‌هـ و درێژ كو دگه‌هیته‌ 1080 كیلۆمه‌تران دشه‌ڕیدایه‌، دئه‌نجامدا ب سه‌دان عه‌گیدێن پاله‌وان یێ خوینا خوه‌ یا پاك دكه‌نه‌ قۆربان بۆ ئاخا كوردستانێ‌ و به‌رپه‌رێن تۆمارا بزاڤا رزگاریخوازییا كوردی ب جانفیدایێ دنه‌خشینن. ئه‌ڤ به‌رخوه‌دانا ملله‌تێ كورد و پێشمه‌رگه‌یان ل همبه‌رى تیرۆرێ، ب چو ئاست و رامانان ناهێته‌ گوتن و هه‌لسه‌نگاندن.
هه‌ژی ئاماژێیه‌ كو هه‌ر داڤه‌كا ڤی ئالایێ‌ پیرۆز، رامان و سه‌ربۆڕ و قۆناغێن بزاڤ و خه‌باتا ته‌ڤایا ملله‌تێ‌ كورده‌، ب خوینا هزاران شه‌هیدێن كوردستانێ‌ و قۆربانیێن مه‌زن هاتییه‌ نیگاركرن و نه‌خشه‌كرن و دورین، ب هزروبیرێن كوردایه‌تیێ‌ و تبلێن خه‌باتكه‌ر و دلسۆزان داڤ ب داڤ هاتییه‌ دورین و پێكئینان و پاراستن، هه‌ر ژ ده‌ستێ‌ پێشه‌وا (قازی محه‌مه‌د) سه‌رۆكێ‌ كۆمارا كوردستانێ‌ ل مهاباد بۆ ده‌ستێ‌ بابێ‌ نه‌ته‌وه‌یا كورد (بارزانی مسته‌فا) ل 16/12/1946 هاتییه‌ راده‌ستكرن… ئه‌ڤرۆ ژی پشتی سه‌رهلدانا ئادارا سالا 1991 یا پیرۆز، لژێر سیبه‌را ڤى ئالایێ‌ پیرۆز په‌رله‌مان و حوكمه‌تا هه‌رێما كوردستانێ‌ و هه‌موو رێكخراوێن پیشه‌یی و جه‌ماوه‌ری كار دكه‌ن. ئالایه‌كێ‌ میرییه‌ و دوورشمێ‌ ملله‌تێ‌ كورده‌ ل سه‌رانسه‌ری كوردستانا مه‌زن و جیهانێ‌ جهه‌كێ‌ تایبه‌ت هه‌یه‌ دناڤ دلێ‌ كورد و كوردستانیاندا. رێزگرتن و ڤینا ڤی ئالای چو توخیب و سینۆر لجه‌م هه‌میان و رۆح و جه‌رگێ‌ ملله‌تییه‌ و ئاماده‌نه‌ بۆ جانفیدایى پێخه‌مه‌ت هه‌رده‌م یێ‌ به‌رز و بلند بیت.
لسه‌ر هه‌موو جهـ و لسه‌ر سینگ و ملان دێ‌ مینیت هه‌رده‌م دوورشمێ‌ مێژوو و خه‌باتا نه‌ته‌وه‌یا كورد لسه‌رئاستێ‌ ناڤخوه‌یی و جیهانێ، ئێك ژ ره‌گه‌ز و بنه‌مایێن سه‌ره‌كیێن ده‌وله‌تبوونا كوردان هه‌ر ئه‌ڤ ئالایه‌ یه‌، ب ئانه‌هییا خودایێ‌ مه‌زن و دلۆڤان، دێ هه‌ر گه‌هینه‌ ڤێ ئارمانجێ، چنكو نهۆ ملله‌تێ كورد خودانێ سه‌رۆكێ‌ هه‌رێما كوردستانێ‌ رێزدار مه‌سعود بارزانی یه‌، خه‌مخور و دلسۆز و پالپشتێ خه‌لكێ‌ مه‌ یێ‌ كوردستانێیه‌ بۆ بجهبوونا ڤێ خه‌ونێ كو رۆژه‌كێ ئالایێ كوردستانێ لناڤ ئالایێن جیهانێ بلند بكه‌ت. مه‌ باوه‌رى هه‌یه‌ كو ب قاره‌مانییا پێشمه‌رگه‌یێ كوردستانێ‌، دێ هه‌ر سه‌ركه‌ڤتن بۆ گه‌لێ‌ كوردستانێ‌ بیت.

بابه‌تێن ب ڤێ مژارێ ڤه‌ گرێدای