د ڤەکۆلینەکا نوو دا: دێ چاوا زانی تو هه‌لگرێ پەنجەشێرا پرۆستاتێی؟

د ڤەکۆلینەکا نوو دا: دێ چاوا زانی تو هه‌لگرێ پەنجەشێرا پرۆستاتێی؟

Capture

وار – دهۆک :

تیمێ به‌رپرس ل زانینگه‌ها “ڤه‌کۆلینێن په‌نجه‌شێری” ل باژارێ “له‌نده‌ن” ئه‌و چه‌نده‌ دیارکر کو نوکه‌ دشیاندایه‌ ده‌لیڤه‌یا تووشبوونا زه‌لامان ب په‌نجه‌شێرا پرۆستاتان به‌روه‌خت بهێته‌ ده‌ستنشانکرن ب رێیا ئه‌نجامدانا پشکنینێن جینی، هه‌روه‌کی پشکنینێن جینی یێن دهێنه‌ ئه‌نجامدان بۆ به‌روه‌خت ده‌ستنیشانکرنا په‌نجه‌شێرا مه‌مکان لده‌ف ئافره‌تان.
د ده‌مه‌کی دا کو تیمێ ناڤبری شیان 14 گوهۆرینێن جینی ده‌ستنیشان بکه‌ن یێن کو د گرێداینه‌ ب تووشبوونا زالامان ب پیسترین جورێن په‌نجه‌شێرێن پرۆستاتی. ب ڤێ یه‌کێ؛ ئه‌ڤ ڤه‌دیتنه‌ دبیته‌ ده‌ستپێکه‌ک بۆ راپه‌رینه‌کێ ل وه‌لاتێ بریتانیا بۆ چاڤدانا ساخله‌مییا زه‌لامان ب تایبه‌ت دژی په‌نجه‌شێرا پرۆستاتان.
هه‌ژی گوتنێیه‌، په‌نجه‌شێرا پرۆستاتان به‌ربه‌لاڤترین په‌نجه‌شێرا زه‌لامانه‌ ل هژماره‌کا زۆرا وه‌لاتان ل سه‌رانسه‌ری جیهانێ، یا کو بریتانیا ژی ئێک ژ وان وه‌لاتانه‌، و سالانه‌ پتر ژ 40 هزار که‌سان تووش دبیت، لێ نه‌ هه‌ر نه‌خوه‌شه‌ک پێدڤی ب چاره‌سه‌رییه‌کا بنبڕی دبیت کو ببیته‌ ئه‌گه‌رێ گه‌له‌ک کارتێکرنێن لایه‌نی. ده‌ستنیشانکرنا زه‌لامێن مه‌ترسییا تووشبوونێ ب په‌نجه‌شێرێن ب مه‌ترسی یێن پرۆستاتی، دیسان یێن کو پێدڤی ب چاره‌کرنێ هه‌نه‌؛ هه‌ڤرکییه‌کا مه‌زنه‌.
د ڤه‌کۆلینێدا، پشکنین ل سه‌ر خوونا 192 زه‌لامان هاتنه‌ ئه‌نجامدان یێن کو تووشی په‌نجه‌شێرا پرۆستاتان بووین، و ب کێمی سێ که‌سانێن خێزانا وی و به‌راوردی دناڤبه‌را جینێن وان هاته‌ ئه‌نجامدان. د ڤێ یه‌کێ دا، پشکنین لسه‌ر گوهۆرینێن ب مه‌ترسی یێن جینان هاته‌ ئه‌نجامدان، و ژ ژوان جینان ژی؛ جینێ BRCA یێ کو دهێته‌ گرێدان ب په‌نجه‌شێرا مه‌مکان و هێکدانێن ئافره‌تان. و ئه‌نجامێ پشکنینێ ژی هاته‌ به‌لاڤکرن کو “7% ژ زه‌لامان ب کێمی ئێک ژ 14 جینان هه‌یه‌ یێن گرێدای ب په‌یدابوونا په‌نجه‌شێرا زه‌لامان”. دیسان دا خۆیاکرن کو هه‌ر ئه‌ڤ که‌سه‌ بوون یێن کو په‌نجه‌شێرا پرۆستاتان ب له‌ز به‌لاڤ دبوو له‌شێ وان.
نۆشدار “سۆفیا کوتی جارای” بۆ که‌ناڵێ BBC دیارکر: ئه‌ز د وێ باوه‌رێدا مه‌ کو د ماوه‌یێ دو تا سێ سالان ئه‌ڤ پشکنینه‌ ل سه‌رانسه‌رێ جیهانێ به‌لاڤببیت و بشێین خزمه‌تا زه‌لامان بکه‌ین به‌روه‌خت ژ ده‌ستپێکرنا په‌نجه‌شێرا پرۆستاتان.
مفایێ سه‌ره‌کی یێ ئه‌ڤێ ڤه‌دیتنێ ژی؛ زوو ده‌ستنیشانکرنا وان زه‌لامانه‌ یێن کو رابردوویه‌کێ په‌نجه‌شێرا پرۆستاتان د ناڤ خێزانا وان دا هه‌مبوویه‌ مینا بابێ وان تووش ببیت یان ژی باپیر و هه‌تا دووماهییێ.

ژ ماڵپه‌رێ BBC News

بابه‌تێن ب ڤێ مژارێ ڤه‌ گرێدای