د چارسالێن داهاتی دا دێ چ ل پەیوەندیێن هەولێر و بەغدا هێن؟

بیلال ئیحسان

ئەم هەمی باش دزانین هەر بارودۆخەکێ هەبیت، ئەگەر یێ خراب بیت، دێ سێ ئەنجام بۆ هەبن، ئێک یان دێ ئەو بارودوخ چێبیت، دو یان دێ خرابتر بیت، سێ یان دێ مینیت ناڤبەرا هەردووکان دا، جارجار دێ چێبیت و جارجار خراب، یا گرنگ ل ڤێرێ ئایا پشتی ڤان هەلبژارتنا دێ پەیوەندێن هەرێمێ دگەل عیراقێ ئەرینی بن یان نە، هەمی بۆچوون و پێشبینێن مە بۆ هندێ دچن، کو د چار سالێن داهاتی دا، دێ پەیوەندیێن هەرێمێ دگەل بەغدا مینن هەلاویستی، جارجار دێ دباش و ئەرینی بن و جارجار نەرینی و نەباش، بەلگەیێن مە ژی لسەر ڤێ چەندێ ئەون، کو پارتێن مە یێن هەرێمی نە خودان بەرنامەکێ هەڤپشک و ئێک ئاراستەنە. راستە ئەم گەلەگ گو‌‌‌‌‌هلێ دبین کو کەسێن ئاسای، یان پەرلەمانتار یێ دبێژیت پێدڤیە ئەم د ئێک گرتی بین و پێکڤە بەرەڤانیێ ژ مافێن کوردان بکەین، بەلێ ئەڤە هەمی ئاخفتنێن رۆتینی نە، یا گرنگ ئەوە کا واقع ب درستاهی چاوایە. یا رۆهن و ئاشکەرایە، کو پارتێن مە یێن هەرێما کوردستانێ لسەر دو لایان دابەش بووینە، لایانەک کو ژ پارتی و ئێکەتی و یەکگرتوو پێک دهێن، ڤان دڤێن بەردەوامیێ بدەنە پرۆسا ریفراندۆمێ و کاربکەن بو جودابوونێ ژ دەولەتا عیراقێ، دبەرامبەر دا، لایەنێ دی، کو ژ نەوەی نوێ و گۆران و هەڤپەیمانی بۆ دیمۆکراسی و دادپەروەری، کو ڤانا دڤێت کاربکەن بو ئاڤەدانکرنا عیراقێ ب گشتی و هەرێما کوردستانێ ب تایبەتی ، نەهێلانا گەندەلیێ و خوشگوزەرانیا خەلکێ لەورا ژی ئەم دبێژین پەیوەندێن هەرێم و عیراقێ دێ مینن هەلاویستی دناڤبەرا ئەرینی و نەرینی یێ دا. سەبارەت پارتێن مە یێن سیاسی ل هەرێما کوردستانێ و هەڤرکیێن وان، براستی هەڤرکیێن پارتێن سیاسی تشتەکێ ئاسای یە و ل پرانیا وەڵاتان هەنە، و ئەم دێ ب پشت راستیڤە ژی بیژین، هەڤرکی لسەر دەستهەلاتێ هەردەم دێ هەبت و چ جار ناراوەستیت، نموونە پارتەک بێت هەرێما کوردستانێ ژبۆ خەلکێ بکەت بەحەشت و هەمی جورێن خوشگوزەرانیێ بۆ دابین بکەت، ل وی دەمێ تو دێ هەر ببینی کو ئوپۆزسیون هەیە و یا دبیژیت خەلکێ ئەگەر ئەم بێنە سەر دەستهەلاتێ دێ هێشتا خوشتر کەین. براستی هەڤرکیا پارتێن سیاسی تشتەکێ باشە، ژبەرکو هندی ئۆپۆزسیۆن ب هێز ببیت دێ دکتاتوری لاواز بیت، هندی ئۆپۆزسیۆن لاواز بیت، یان هەر نەمینیت، دێ دکتاتوری گەشە بکەت. بەلێ یا مە دڤێت ژ خەلکێ خوە ئەوە، دهەڤرکییێ بگەهن و جوداکارییێ بکەن دناڤبەرا هەڤرک و دوژمنێ خوە دا، جهێ داخێ یە، هێشتا پارتێن مە یێن سیاسی و خەلکێ مە جوداکاری نەکریە دناڤبەرا هەڤرک و دوژمنێ خوە دا، دبینن کا پارتێن مە و خەلکێ مە، چەند گۆتنێن نە شرین و ئێک دو تومەتباردکن و دهاڤێژن ئێک ب توندی، دەمێ دچنە بەغدا، ستۆیێ خوە خار دکەن بۆ عەرەبان، واتە تێگەهشتنا مە بۆ هەڤرک و دوژمنی بەروڤاژییە. هیڤیا من ژ هەر تاکەکێ کورد ئەوە، خوە د ژیانا سیاسی یا درستاهی بگەهینیت، دەمێ لایەنگریا پارتەکێ دکەت، دبەرامبەر دا رێزێ ل برایێ خوە یێ دی، یێ کورد بگریت کا ئەو لایەنگرێ کیش پارتێ یە، بەس هووسا بهاڤێژن ئێک و ئێک دو نەشرین بکەن، خوە وەک دوژمنێن ئێک نیشان بدەن، نە وەک هەڤرکێن ئێک.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.