د رۆژا جیهانییا ئاشتیێ دا جڤاتا خانمێن كوردستانێ داخوازا دیاركرنا چاره‌نڤیسێ ژنێن ره‌ڤاندى دكه‌ت

د رۆژا جیهانییا ئاشتیێ دا جڤاتا خانمێن كوردستانێ داخوازا دیاركرنا چاره‌نڤیسێ ژنێن ره‌ڤاندى دكه‌ت

Capture

وار – دهۆک :

دوهى، ئانكو 21ى ئیلۆنێ ڕۆژا جیهانییا ئاشتیێیه‌ د جیهانێ دا، ب ڤێ هه‌لكه‌ڤتێ جڤاتا بلندا کاروبارێن خانمان ل هه‌رێما كوردستانێ، رادگەهینن کو پێدڤییە د ڤێ رۆژێ دا کار بهێته‌كرن بۆ ئازادكرن و دیاركرنا چاره‌نڤیسێ وان هه‌موو ژنێن هاتینه‌ ڕه‌ڤاندن، ئه‌ڤه‌ ژى بۆ پاراستنا ئاشتییا جڤاكى و ره‌نگاوره‌نگى و به‌رفرهیێ د جڤاكێ كوردستانێ دا.
هەر د وێ په‌یاما جڤاتا بلندا كاروبارێن جانمان دا هاتییه‌، ”نه‌ته‌وه‌یێن ئێكگرتى داخوازێ دكه‌ت هه‌موو نه‌ته‌وه‌ و گه‌لێن جیهانى پێگیربن ب ئاگربه‌ست و ڕاگرتنا كارێن دوژمنكارانه‌، ب رێیا ره‌وشه‌نبیركرن و به‌لاڤكرنا هۆشیارییا ئاشتیێ لده‌ف وه‌لاتییان، سه‌باره‌ت ب وان پرسێن كو په‌یوه‌ندى ب ئاشتیێ ڤه‌ هه‌ین، ڤێ رۆژێ بلند ڕابگرن”.
هەروەسا ئه‌و جڤاته‌ دبێژیت: ”ئه‌ڤ ساله‌ ژى ب درووشمێ (ئاشتی مافێ گه‌لانه‌)، مه‌ رۆژا جیهانییا ئاشتیێ بلند ڕاگرت، ئه‌م د ده‌مه‌كى دا ڤێ هه‌لكه‌ڤتا رۆژا ئاشتییا جیهانی ساخدكه‌ین، پشكه‌كا زێده‌یا ڤێ ده‌ڤه‌رێ شەڕ و توندوتیژیێ درێژى هه‌یه‌ و گرۆپێ تیرۆریستیێ داعش گه‌له‌ك تاوانكاری ل دژی ژنان و زاڕۆیان و جڤاكى ب گشتى كرینه‌ و ب ‌ده‌هان ژنێن ئێزدى و كریستیان و پێكهاته‌یێن دى ب كۆله‌ گرتینه‌ و ده‌ستدرێژى لسه‌ر وان كرینه‌ و كڕین و فرۆشتن ب وان كرینه‌”.
د دووماهییا وێ په‌یاما خوه‌ دا، جڤاتا بلندا كاروبارێن خانمێن هه‌رێما كوردستانێ، نڤیسییه‌؛ ”بلا د ڤێ رۆژێ دا هه‌موو بزاڤێن مه‌ بۆ ئازادكرن و دیاركرنا چاره‌نڤیسێ هه‌موو وان ژنێن بیت كو هاتینه‌ ڕه‌ڤاندن، بۆ پاراستنا ئاشتییا جڤاكى و ره‌نگاوره‌نگی و فره‌ پێكهاته‌ییا د جڤاكێ كوردستانێ دا، ئه‌ڤه‌ ژى ببیته‌ ژێده‌رێ پێشكه‌ڤتن و به‌خته‌وه‌رییا هه‌موویان، ب تایبه‌تى ژن و زاڕۆیان. ب هه‌لكه‌ڤتا رۆژا ئاشتییا جیهانێ، پێدڤییه‌ هه‌موو شیانێن خوه‌ بكاربینین بۆ وێ ئێكێ كو بشێین ڤێ قۆناغێ ب سه‌ركه‌ڤتییانه‌ ده‌رباز بكه‌ین”.
نەتەوەیێن ئێكگرتى، دوهى 21ی ئیلۆنێ دیاركرییه‌ وه‌كو رۆژا جیهانییا ئاشتی و ته‌بایی و ڤیانێ د ناڤبه‌را گه‌لێن جیهانێ دا. ل سالا 2001ێ كۆمه‌له‌یا گشتییا نه‌ته‌وه‌یێن ئێكگرتى ب‌ هه‌موو ده‌نگان بڕیارا ژماره‌ 8282/55 په‌سه‌ندكر، بۆ وێ ئێكێ كو رۆژا جیهانییا ئاشتیێ ب فه‌رمی د هه‌موو جیهانێ دا بچه‌سپیت، كو رۆژه‌ك بیت بۆ راگرتنا توندوتیژی و ئاگربه‌ستێ د شه‌ڕان دا.

بابه‌تێن ب ڤێ مژارێ ڤه‌ گرێدای