د ره‌وشه‌كا نه‌رێنى دا دهۆك سـه‌ر‌كه‌ڤت و پێشڤه‌هاته‌ سـه‌رێ لیستێ

د ره‌وشه‌كا نه‌رێنى دا دهۆك سـه‌ر‌كه‌ڤت و پێشڤه‌هاته‌ سـه‌رێ لیستێ

Capture

وار – دهۆک :

د نه‌باشترین ره‌وشدا تیما ته‌پاپێی یا یانه‌یا دهۆك شیا سه‌ركه‌ڤتنه‌كا گرنگ لسه‌ر مێڤانا خۆ یانه‌یا حدوود تۆماربكه‌ت ب گۆله‌كێ بێی به‌رامبه‌ر، د یارییا واندا ئه‌وا دوهی ژ چوارچووڤێ گه‌ڕا پێنجێ ژ كۆما دووێ یا خولا ئیراقێ بۆ یانه‌یێن پلا نایاب ئه‌وا ل یاریگه‌ها یانه‌یا دهۆك هاتیه‌كرن.
دڤێ یاریێ دا ئه‌وا یاریكه‌رێن دهۆكێ ئه‌و ئاستێ چاڤه‌ڕێكری د پرانییا خوله‌كێن نیڤا ئێكێ دا نیشان نه‌دایی و دیاربووی تا راده‌یه‌كێ یاریكه‌ر لبن گڤاشتنێن ده‌رۆنی بووین، هه‌مبه‌ری وێ تیما حدوود خۆ دیاركر تیمه‌كا رێكخستی، به‌لێ هه‌تا خوله‌كا 30ێ چو مه‌ترسی لسه‌ر گۆلێن هه‌ردو تیمان نه‌بوو هه‌تا خوله‌كا 31ێ گۆلا ئێكێ و سه‌ركه‌ڤتنێ یا تیما دهۆكێ هاتی ب لێدانا په‌نه‌رتیێ ئه‌وا ژلایێ ستێرا وێ سالح سدیر ئه‌وێ شیایی گۆلا ئێكێ بوو تیما خۆ تۆماربكه‌ت، پشتی ڤێ گۆلێ ئاستێ یاریێ هاته‌ گوهۆڕین و یاریكه‌رێن حدوود هنده‌ك بزاڤێن كێم هه‌بوون، هه‌مبه‌ری وێ گڤاشتنێن دهۆكێ د به‌رده‌وامبوون و د خوله‌كا 37ێ ده‌لیڤه‌یه‌كا گۆلكرنێ سالح سدێری ژ ده‌ستدا ده‌مێ ئه‌و هه‌مبه‌ری گۆلجی و ته‌پا وی سه‌ر ستوینا گۆلێ را چووی.
دنیڤا دووێ دا ئاستێ یاریێ باشتر لێهات وهه‌ردو تیمان رێكخستنه‌كا باشتر ئێخسته‌ لسه‌ر رێزێن خۆ، دیاربووژی تا راده‌یه‌كێ باش یاریكه‌رێن دهۆكێ لبن گڤاشتنێن ده‌رۆنی ده‌رڤه‌تبوون، دخوله‌كا 50ێ ئێكه‌م بزاڤ دڤێ نیڤێدا هاته‌ پێش ئه‌وژی ژ ته‌په‌كا شووت فاولێ یا سالح سدیری ب ستوینا گۆلێ كه‌ڤت و چوو ده‌رڤه‌، مه‌ترسیترین ده‌لیڤه‌یێن گۆلكرنێ بو هه‌ردو تیمان چێبووین دڤێ نیڤی دا ئه‌وژی یێ یاریكه‌رێ حدوود عه‌باس فاخر ب شوته‌كا فاولێ ته‌پا وی ب ستوینا گۆلێ كه‌ڤت، به‌رسفا دهۆكێ دخوله‌كا 90ێ دابوو ده‌مێ هێرشبرێ وێ ئه‌حمه‌د دونی شوته‌كا بهێز دانایه‌ گۆلێ و ب ستوینا گۆلێ كه‌ڤتی، یاریی ب سه‌ركه‌ڤتنا دهۆكێ بدوماهی هات.
لدۆر ڤێ یاریێ باسم قاسم راهێنه‌رێ دهۆكێ گۆت، هه‌رچه‌نده‌ مه‌ سه‌ركه‌ڤتنه‌كا ژ هه‌ژی تۆماركر، به‌لێ ئه‌گه‌ر ئه‌و ده‌لیڤه‌یێن گۆلكرنێ مفا ژێ وه‌رگرتبان ئه‌ز باوه‌رم دا گۆلێن مه‌ زێده‌تربن، یاریكه‌ران ئاستێ مه‌ ژێ دڤیایی نیشان نه‌دا بتایبه‌تی دنیڤا ئێكێ دا، سه‌ره‌رایی ڤێ یه‌كێ هێشتا ئه‌ز ژ ئاستێ تیمێ ب گشتی بوو خولێ نه‌یێ رازیمه، هیڤییا من ئه‌وه‌ ب پشته‌ڤانییا كارگێریێ و جه‌ماوه‌ری یاریی بوو یاریی تیما مه‌ باشتر بیت و ژ گڤاشتنێن ده‌رۆنی بده‌ركه‌ڤیت.
ژلای ێخۆڤه‌ عه‌لی وه‌هاب لسه‌ر ئاستێ یاریكه‌رێن خۆ یێ رازییه‌ و گۆت، مه‌ یاریی هه‌مبه‌ری تیمه‌كا خودان شیان و بهێز دخولێ دا كر، تیما مه‌ هه‌ژارترین تیمه‌ دخولێ دا یاریكه‌رێن مه‌ هه‌موو كه‌نجن و مه‌ پیشه‌كار نینن، به‌لێ ئاسته‌كێ مه‌زن نیشاندا و ئه‌م نێزیكی وه‌كهه‌ڤیێ بووین، هه‌رچه‌وابیت پیروزباهییا تیما دهۆكێ دكه‌م.‌
بڤی ئه‌نجامی یانه‌یا دهۆك پێشڤه‌هاته‌ سه‌رێ لیستێ ب 10 خالان ب چار یارییان، حدوود پاشڤه‌چوو رێزا چارێ ب حه‌فت خالان، ته‌له‌به‌ ب 9 خالان لرێزا دووێ و به‌غدا حه‌فت خالان لرێزا سێیێ دهێت وكێمترییا دو یارییان.

بابه‌تێن ب ڤێ مژارێ ڤه‌ گرێدای