د دێربیێ پارێزگه‌هێ دا زاخۆ دێ مێڤاندارییا دهۆكێ كه‌ت

د دێربیێ پارێزگه‌هێ دا زاخۆ دێ مێڤاندارییا دهۆكێ كه‌ت

وار – تاهر رێكانى :

چاڤه‌رێیه‌ ئه‌ڤرۆ یاریێن گه‌را 16ێ ژ قۆناغا دووێ یا خولا هه‌رێما كوردستانێ یا ته‌پاپێى لسه‌ر ئاستێ یانه‌یێن پلا نایاب بهێنه‌كرن، ئه‌ڤرۆ سێ یارى دێ هێنه‌ كرن و بهێزترین یارى دێ دێربیێ پارێزگه‌ها دهۆكێ بیت، ده‌مێ یانه‌یا زاخۆ ل یاریگه‌ها ده‌لال سه‌ركێشا خولێ یانه‌یا دهۆك مێڤاندكه‌ت، هه‌ر وه‌سان یانه‌یێن نه‌ورۆز و سلێمانیێ دێ مێڤاندارییا كه‌ركووك و هندرین كه‌ن، ژلایه‌كێ دویڤه‌ بڕیاره‌ سوباهى سێ یاریێن مایێ ژى بهێنه‌كرن، ل یاریگه‌ها زێره‌ڤانیێ خۆدانێن ئه‌ردى دێ مێڤاندارییا پێشمه‌رگه‌هێ هه‌ولێرێ كه‌ت، هه‌ر وه‌سان شێروانه‌ و هه‌ولێر دێ بنه‌ مێڤانێن پێشمه‌رگه‌هێ سلێمانیێ و برایه‌تى، هه‌موو یارى لده‌مژمێر 3:00 ئێڤارى دێ هێنه‌ كرن.
ده‌رباره‌ى بۆچوونێن یاریكه‌ر و راهێنه‌رێن هه‌رسێ یانه‌یێن پارێزگه‌هێ بۆ یاریێن وان یێن ڤێ گه‌رێ بڤى ره‌نگى دبێژن:
لده‌ستپێكێ زه‌كى عوبێد هاریكارێ راهێنه‌رێ یانه‌یا دهۆك دبێژیت، براستى یارییا دێربیێ گرنگییه‌كا تایبه‌ت یا هه‌ى، دوور ژ هندێ مرۆڤ هزر د ئه‌نجامێن وێ یێن بۆریدا بكه‌ت، له‌وا بۆ ڤێ یاریێ مه‌ به‌رهه‌ڤیێن باش یێن كرین و چوو كێماسى دناڤ رێزێن تیما مه‌دا نینن و مۆرالا یاریكه‌ران گه‌له‌ك یا بلنده‌ و بتایبه‌ت پشتى د یارییا خولا ئیراقێ دا ئاسته‌كێ مه‌زن پێشكێشكرى، گه‌شبینى دناڤ رێزێن تیمێدا هه‌نه‌، هه‌رچه‌نده‌ من رێز بۆ یاریكه‌ر و كادرێ راهێنانا یانه‌یا زاخۆ هه‌نه‌، لێ ئه‌م یێ ل وێ باوه‌رى كو 75% سه‌ركه‌ڤتن دێ به‌هرا دهۆكێ بیت و به‌رده‌وامیێ ده‌ینه‌ ئه‌نجامێن خۆ یێن باش دخولێدا.
هه‌ر وه‌سان ئه‌یۆب ئه‌یاد یاریكه‌رێ یانه‌یا زێره‌ڤانیێ لدۆر یارییا وان به‌رامبه‌ر یانه‌یا پێشمه‌رگه‌هێ هه‌ولێرێ دبێژیت‌، براستى مه‌ به‌رهه‌ڤیێن خۆ ژ هه‌موو لایان ڤه‌ گه‌له‌ك باش یێن كرین و مه‌ چ پێگهورێن دى نینن ژ سه‌ركه‌ڤتنێ پێڤه‌تر، ژبه‌ركو سێ خالێن ڤێ یاریێ خالێن سه‌ركێشیا خولێ نه‌، دیسان ئه‌یۆبى دیاركر كو مۆرالا یاریكه‌رێن مه‌ هه‌موویان یا بلنده‌ و گه‌شبینن كو دێ سه‌ركه‌ڤتن بۆ تیما مه‌ بیت، داكو ژ نێزیكترین هه‌ڤركا خۆ دوور نه‌كه‌ڤین و هه‌ر وه‌سان دێ چاڤێ مه‌ ل ئه‌نجامێ دێربیێ پارێزگه‌هێ بیت.
ژلایه‌كێ دویڤه‌ شڤان محه‌مه‌د یاریكه‌رێ یانه‌یا زاخۆ دبێژیت، براستى یارییا مه‌ دگه‌ل سه‌ركێشا خولێ دێ گه‌له‌ك یا ب زه‌حمه‌ت بیت و مه‌ به‌رهه‌ڤیێن خۆ باش یێن كرین و هه‌رچه‌نده‌ هنده‌ك یاریكه‌رێن مه‌ ژ نوو ژبه‌سرا ڤه‌گه‌ریانه‌ و د وه‌ستاینه‌، لێ هه‌ر چه‌وا بیت دێ هه‌موو بزاڤان كه‌ین خالێن ڤێ یاریێ بده‌ستخۆڤه‌بینین و به‌رده‌وامیێ بده‌ینه‌ ئه‌نجامێن خۆ یێن باش و پاراستنا رێزبه‌ندا خۆ بكه‌ین، له‌وا ب چوو ره‌نگان نابیت ئه‌م خالێن ڤێ یاریێ ژ ده‌ستخۆبده‌ین.
لدوماهیێ شرۆڤه‌كارێ وه‌رزشى وه‌حید ره‌شید لدۆر یارییا دێربیێ پارێزگه‌ها دهۆكێ و یانه‌یا زێره‌ڤانیێ به‌رامبه‌ر یانه‌یا پێشمه‌رگه‌هێ هه‌ولێرێ دبێژیت: ده‌رباره‌ى دێربیێ پارێزگه‌هێ براستى دێ یارییه‌كا بهێز هێته‌ كرن و ئه‌نجامێ ڤێی اریێ بۆ یانه‌یا دهۆك گه‌له‌ك یێ گرنگه‌، ژبه‌ركو ژ ده‌ستدانا خالێن ڤێی اریێ دێ د به‌رژه‌وه‌ندیا یانه‌یا زێره‌ڤانیێ دا بیت، لێ ئه‌ز دبینم نوكه‌ ره‌وشا یانه‌یا دهۆك تاراده‌كێ یا باشه‌ و بتایبه‌ت پشتى ئه‌و ئاستێ د یارییا خولا ئیراقێ دا پێشكێشكرى و گهورینێن د كارگێرییا یانه‌یێ دا هاتینه‌ كرن تا راده‌كێ مۆرالا یاریكه‌ران یا بلندكرى، ده‌رباره‌ى زاخۆ ژى ناڤبرى گۆت، زاخۆ یا ژ دۆراندنه‌كێ ڤه‌گه‌ریاى و ئه‌وژى دێ هه‌موو شیانێن خۆ مه‌زێخیت داكو جه‌ماوه‌رێ ژ خۆ رازیبكه‌ت، لێ هه‌ر چه‌وا بیت ئه‌ز دبینم دهۆك یا نێزیكتره‌ خالێن ڤێ یاریێ بده‌ستخۆڤه‌ بینیت و هند ب ساناهى خالێن یاریێ ناده‌ته‌ زاخۆ، ده‌رباره‌ى یاریا زێره‌ڤانیێ و پێشمه‌رگه‌هێ هه‌ولێرێ براستى ئه‌ڤ یارییه‌ دهێته‌ هژمارتن ژ یاریێن بهێز یێن ڤێ گه‌رێ، یاژمنڤه‌ گه‌شبینى دناڤ رێزێن یاریكه‌رێن زێره‌ڤانیێ دا په‌یدابووینه‌ و بتایبه‌ت پشتى وێ سه‌ركه‌ڤتنا ژ ده‌رڤه‌ى یاریگه‌ها خۆ لسه‌ر یانه‌یا ئارارات ئیناى، ئه‌ڤه‌ دێ بوو بیته‌ پالده‌ره‌ك كو به‌رده‌وامیێ بده‌ته‌ ئه‌نجامێن خۆ یێن باش، لێ یانه‌یا پێشمه‌رگه‌ ژى هند بساناهى خۆ راده‌ستێ یاریكه‌رێن زێره‌ڤانیێ بكه‌ت و ئه‌نجامێ پێشكێشى وان بكه‌ت، ئه‌ز دبینم ئه‌ڤ یارییه‌ ب وه‌كهه‌ڤى ب دوماهیك بهێت.

بابه‌تێن ب ڤێ مژارێ ڤه‌ گرێدای