د‌ هه‌ر 40 چركه‌یان دا كه‌سه‌ك خوه‌ د‌كوژیت

د‌ هه‌ر 40 چركه‌یان دا كه‌سه‌ك خوه‌ د‌كوژیت

Capture

وار – دهۆک :

رێكخراوا ساخله‌مییا جیهانی سالانه‌ 10ی ئیلۆنێ ب رۆژا جیهانییا به‌رهنگاربوونا خوه‌كوشتنێ دیاركرییه‌، ڤێ رێكخراوێ د راپۆرتا خوه‌ یا ئه‌ڤ ساله‌ راگه‌هاند، سالانه‌ 800 هزار كه‌س ل جیهاندا خوه‌ دكوژن، د‌ هه‌ر 40 چركه‌یان ژى دا كه‌سه‌ك خوه‌ د‌كوژیت.
د چار سالێن بۆرى دا ل هه‌رێما كوردستانێ 658 ژنان خوه‌ كوشتییه‌.
ئه‌ڤه‌ د ده‌مه‌كى دایه‌ كو گه‌له‌ك كه‌س هه‌نه‌ ب هیڤیا وێ ئێكێنه‌ كو رۆژه‌ك ژ ژیێ وان زێده‌بیت، لێ هنده‌ك كه‌س ژى هه‌نه‌ ب‌ ده‌ستێن خوه‌ دووماهیێ ب ژیانا خوه‌ دئینن.
خوه‌كوشتن یان مرنا ده‌ستكر، ل هه‌رێما كوردستانێ بوویه‌ دیارده‌، زه‌لام پتر ب رێیا خوه‌ هه‌لاویستن و گولله‌یان خوه‌ دكوژن، ژن ژى پتر خوه‌ دسوژن.
لسه‌ر ئاستێ جیهانێ بۆ كێمبوونا خوه‌كوشتنێ، گه‌له‌ك چالاكی دهێنه‌كرن، ئه‌ڤ ساله‌ ب رێیا پایسكلسواریێ ڤه‌ لسه‌ر‌ جادده‌ و د كۆلانان دا هۆشیاریێ به‌لاڤدكه‌ن‌.
ڕێڤه‌به‌رێ به‌رهنگاربوونا تووندوتیژییا دژى ژنان ل‌ هه‌ولێرێ، هیڤى ب وێ ئێكێ هه‌یه‌ كو‌ ئه‌ڤ ساله‌ خوه‌كوشتن ب هه‌ڤبه‌رى دگه‌ل سالا بۆرى لگۆره‌ى‌ ئامارێن وان كێمكرییه‌، كو بۆ رووداو دبێژیت: ”ل‌ 6 مه‌هێن سالا 2014ێ، 19 خوه‌سۆتن و 7 خوه‌كوشتنا ژنان هه‌بووینه‌، لێ ل شه‌ش مه‌هێن ده‌ستپێكا سالا 2013ێ، 28 خوه‌سۆتن و 13 خه‌ندقاندن ل هه‌ولێرێ هه‌بوون.
ل چار سالێن بۆرى، ل هه‌رێما كوردستانێ 483 ژنان خوه‌ سۆتییه‌،175 ژنان ژى خوه‌ كوشتییه‌، ئه‌ڤه‌ ب تنێ ئامارا وان ژنانه‌، كو ب ئاوایه‌كێ فه‌رمی ڕێڤه‌به‌رییا به‌رهنگاربوونا توندوتیژییا دژى ژنان به‌لاڤكرین.
ئێك ژ وان كه‌سێن كو بزاڤا خوه‌كوشتنێ كرى، كه‌سه‌كێ نابینایه‌، كو نوكه‌ خودانێن ئێكه‌مین باوه‌رنامه‌یا ماسته‌رێیه‌ ل هه‌رێما كوردستانێ، ڤى نابیناى دو جاران هزر ل خوه‌كوشتنێ كرییه‌.
خوه‌كوشتن د پترییا ئاینان دا هاتییه‌ ره‌تكرن و ئاینێ ئیسلامێ ژى ب حه‌رامی ددانیت.
ئه‌و كه‌سێن خوه‌ دكوژن، هێجه‌تا وان ئه‌وه‌، د ژیانا وان دا گه‌له‌ك كێشه‌ هه‌نه‌ و بێهیڤى بووینه‌، ئه‌ڤه‌ د ده‌مه‌كى دایه‌ پترییا كه‌سێن سه‌ركه‌ڤتیێن جیهانێ پترین گرفت هاتینه‌ د رێیا وان دا، وه‌كو چاوا د فلمان دا ئه‌كته‌رێن سه‌ركه‌ڤتى ئه‌و كه‌سنه‌ كو بسه‌ر پترین نه‌هامه‌تییان دا سه‌ردكه‌ڤن.
ئه‌ڤه‌ ژیانا مه‌یه‌، نوكه‌ د ناڤ خیڤه‌تان دا دژین، نان و ئاڤا ڤه‌خوارنا مه‌ یا كێمه‌، مه‌ حه‌مام نینه‌، هه‌تا مه‌ ته‌والێته‌كا باش ژى نینه‌، ژیانه‌كا نه‌چارییه‌، لێ دگه‌ل وێ ئێكێ ژى، من چو جاران هزر د خوه‌كوشتنێ دا نه‌كرییه‌، من ژیان گه‌له‌ك دڤێت، لێ هه‌كه‌ر دووپشكێن ده‌وروبه‌رێن خیڤه‌تان مه‌ نه‌كوژن. ئه‌ڤه‌ بۆچوونا ئاواره‌یه‌كییه‌ كو بۆ رووداو ئاخڤتییه‌.

بابه‌تێن ب ڤێ مژارێ ڤه‌ گرێدای