دێ چاوا به‌ره‌ڤ كنارێن به‌خته‌وه‌ریێ چى؟

دێ چاوا به‌ره‌ڤ كنارێن به‌خته‌وه‌ریێ چى؟

وار – دهوك :

وه‌ستیان و ماندووبوونێ د نوكه‌یا مه‌ دا وه‌ كرییه‌ ئه‌و رێیه‌ به‌رزه‌بن كو ده‌رگه‌هێ به‌خته‌وه‌ریێ تێدا دهێنه‌ ڤه‌كرن، دزانین كو تو ماندووى، بێهێزى، كاروبارێن رۆژانه‌ تو بێزاركرى، لێ ئه‌ڤه‌ گرفته‌ك نینن، هه‌كه‌ر ب تنێ بۆ ساته‌كێ ژى بوویه‌ د كێمترین ده‌مێن خوه‌ دا هزر ل ده‌ستكه‌ڤت و ڤه‌دیتنا وان رێیان بكه‌ڤه‌ كو پێنگاڤێ به‌ره‌ڤ به‌خته‌وه‌ریێ دهاڤێژن.
ئاسۆدەییێ بكە نەریت:
هه‌رده‌م وه‌سا ل خوه‌ بنێڕه‌ ئه‌وا كو تو دكه‌ى مفا بۆ ته‌ ب خوه‌ و ده‌وروبه‌ر و خێزانا ته‌ هه‌نه‌، ب باوه‌رى ڤه‌ كاربكه‌، دل ل دلێ وان بده‌ كو هه‌ست ب شكه‌ستن یان كێماسیێن خوه‌ دكه‌ن، سوپاسییا خوه‌ بكه‌ كو ته‌ رێیه‌كا باش گرتییه‌ به‌ر سینگێ خوه‌ و تو دشێى مفاى بگه‌هینیه‌ جڤاكێ خوه‌.
كه‌سه‌ك ڤه‌كرى به‌ ل همبه‌رى هه‌موو كه‌سان:
بلا په‌یوه‌ندیێن ته‌، ته‌ ب وى ئاراسته‌ى ببه‌ن كو دیار بیت و ژ دلێ ڤه‌ خوه‌ش و شرین بیت، ده‌رگه‌هێ په‌یوه‌ندیێن خوه‌ لسه‌ر چو كه‌سه‌كى نه‌دائێخه‌ كو هاتییه‌ دیتنا ته‌ بۆ كاره‌كى یان هه‌وجه‌یه‌كێ، ژبه‌ركو ژیان رێیه‌كا دوباره‌یه‌ و توو ژى دێ چییه‌ به‌ر ده‌رگه‌هێ هه‌موو وان كه‌سێن هاتینه‌ به‌ر ده‌رگه‌هێ ته‌، ئه‌ڤجا ب گرنژین ڤه‌ پێشوازیێ ل هه‌ر كه‌سه‌كى بكه‌ كو دهێته‌ به‌ر سینگێ ته‌ و دهێته‌ دیتنا ته‌ یان ژى تو ب خوه‌ سه‌ره‌دانا وان دكه‌ى، تو خوه‌ ل ئاستێ هه‌ر ئێك ژ وان كه‌سان بدانه‌ كو ب جوداهییا قله‌ و پایه‌یێن جڤاكیێن خوه‌ ڤه‌ دهێنه‌ لده‌ف ته‌.
ئیلهام بەخش بە:
چو جاران ژ نیگه‌رانییان نه‌ڕه‌ڤه‌، ئه‌و كه‌سێن ژى كو د نیگه‌رانیێ دا دبینى، وان هانبده‌ كو به‌ره‌ڤ باشتربوونێ ڤه‌ بچن، نه‌كو وان بهه‌ڕفینه‌، تو بێژه‌ وان هه‌كه‌ر ده‌ستێن هه‌وه‌ ناگه‌هنه‌ هه‌یڤێ، هوون دشێن ده‌ستێن خوه‌ بگه‌هیننه‌ ستێران، دیسان ل بیرا ته‌ نه‌چیت بێژه‌ خوه‌ ب خوه‌ ژى، چو جاران بێ هیڤى نابم.
سستیێ بده‌ ره‌خه‌كى:
كارێن خوه‌ یێن ئه‌ڤرۆ بۆ سوبه‌هى نه‌هێله‌، خاڤ و سستیێ بده‌ته‌ ره‌خه‌كى و خوه‌ ژێ قورتالبكه‌، هه‌رده‌م لێپرسینێ د گه‌ل خوه‌ دا بكه‌، بزانه‌ ته‌ چو كرییه‌ كو باش بووینه‌ و شاشى و خرابیێن خوه‌ بینه‌ به‌ر چاڤێن خوه‌ و ژ باشیێن خوه‌ باشیێ پتر وه‌ربگره‌ و ژ خرابى و شاشیێن خوه‌ ژى سه‌ربۆران بۆ خوه‌ وه‌ربگره‌.

بابه‌تێن ب ڤێ مژارێ ڤه‌ گرێدای