دیروکا کوردان.. ئەنتی کورد و خەبات و خیانەت!

سالح زێباری

ھەلدانەڤا رووپەلێن دیروکا کوردستانێ ب ھەمی قویناغێن خوە ڤە، چەند ھەڤپشکی ل ڤان قویناغان ھەنە وەکی خەبات و خیانەت و ھیڤیبوون و روحا بەرڤانیێ. کو پرانیا وان ڤەدگەرن بۆ وی چەندێ کو کورد و کوردستان پارڤەکری بوویە ل سەر دەولەتێن دەڤەرێ. ھەر ژ شەرێ چالدێرانا ١٥١٤دناڤبەرا ئوسمانی و سەفەویا ھەتا رێکەفتنامێن ناڤبەرا وان کو ل سەر دەشت و دول و کەلھێن کوردستانێ بوین، شەرێ جیھانی یێ ئێکێ (١٩١٤ – ١٩١٨) و ئەو کونگرە و پەیماننامێن بەری شەری و پشتی شەری ھەمی ل سەر ھندێ رێککەفتی بوون کو کوردستانێ ل سەر دەولەتێن ھەفسی وەکی تورکیا و ئیران و عیراق و سوریا پارڤە بکەن و دیف بەرژەوەندیێن سیاسی و ئابوری و ئیمپریالیزمیێن وەلاتێن سەردەستێن جیھانێ.
پشتی بەلاڤبونا سیاسەتا رەتکرنا کوردستانێ و تێگەھێ (ئەنتی کورد = دژی کورد) و ب کردار جینوساید کرنا گەلێ کورد ل ھەر چار وەلاتێن رەگەزپەرست، وی دەمی دا کورد ژی بێدەنگ نەبوویە و ھەردەم خەبات کریە بۆ ئازادی و سەربەستی و رزگاریا وەلاتی ل بن دەستیێ، بەلێ ل گەل ڤێ خەباتا ئەزەلی کو ل گەل پارڤەکرنا وەلاتی دروست بووی، دەردێ خیانەتێ ل پرانیا شورەش و بزاڤێن کوردی دایە و ب (١٦ئوکتوبەرێ ) ڤە. ل دیروکێ دا گەلێ کورد زیانەک مەزن ل خیانەتێ دیتە و بەردەوام ژی ھاتیە رەشکرن بەلێ پەروەردەیا ھندەک کەس و ئالیان ب وی ئاوایی ھاتیە کرن کو خیانەت ل بەر شیرین بویە ھەمی ژی ژ بەر تولڤەکرن ل نەیارەکێ سیاسی!! میرگەھێن کوردی ل سوران بگرە ھەتا بوتان و بادینان و بابان و ئەردەلان و دیڤدا شورەشێن شێخ و سەید و مەلایێن کوردستانێ ژی ھەر دیسان ل دەردێ خیانەتێ دەرباز نەبووینە، دربێن مەزن ڤێکەفتینە؟!
لێرە دا دوو پرسیار دئێنە کرن، بۆچی خیانەت؟ ئەرێ گەرەنتی ھەیە خیانەت نەئێتە دووبارە کرن؟.
خیانەت کرن ڤەدگەریت بۆ پەروەردە و رەوشت و ئاستێ تێگەھشتنا تاکی ھەتا جڤاکی. ھەروەسا نەبوونا ھەستێ نەتەوایەتی و ھەبوونا ترسەکا مەزن ل دوژمنی و نەبوونا روحا بەرەڤانیێ و نەبوونا خەما وەلاتی و وەلاتیان و نەبوونا ھوشیاریا سیاسی و رازیبوون ب دەسەلاتا بیانیا و باوەری ئینان ب سوزێن بیانیا و بەرژەوەندیا خوە و حزب و بنەمالێ و نەبوونا شیانا قەبوولکرنا بەرامبەرێ خوەیێ کورد و نەبوونا باوەریێ ب خوە و دەسەلاتا کوردی و ھەروەسا ھەتا نھا وەک پێتڤی ستراتیجیەتەکا سیاسی بۆ پاشەرۆژ و ئاڤاکرنا وەلاتەک دیر ژ خیانەتێ ب دروستی نەبوویە.. ھتد!
ل سەر گەرەنتیا دووبارە نەبونا خیانەتێ! ئەگەر ئەڤ پرسە ل بەری (١٦ئوکتوبەرێ) ل چ تاکەکێ کورد ھاتبا کرن دا بەرسڤا وی ئەو بیت (کورد پشتی خوینا ڤان شەھید و ئازادیا کوردستانێ چ جارێن دیتر خیانەتێ ل ھەڤدو ناکەن!). بەلێ بەروڤاژی دەرکەفت و بدیتنا من دانانا ستراتیجەتەکێ کو لادان لێ خیانەت بیت ھەتا دەولەتا کوردی دئێتە ئاڤاکرن، ھەروەسا لادانا ڤان گرێ کویرێن ناڤبەرا سەرکردە و ئالیێن کورد دا بۆ ھندێ دەرگەھێ خیانەتێ ڤە نەبیت، ژ بەرکو خیانەت ل ڤی دەرگەھی دقوتیت دەستپێکێ.
پشتی کو گەلێ کورد ل خەونا سەربەخۆیێ نیزیک بووی و ب پرۆسا ریفراندوما دیموکراسی شیای رایا گەلی وەربگریت و ب زۆرینا رەھا گەلێ کورد ب کەرکوکی و شنگالیان ڤە دەنگ ب بەلێ بۆ سەربەخویێ دا. بەلێ ئەقلیەتا بەغدا و حەشدا مەزھەبی و خیانەتا گرۆپێ خوشباوەر و سوحبەت خوشا و گلوپێ کەسکێ ئەمریکی و ئەوروپی شیان دربەکێ ل ڤێ دەستکەفتێ بدەت، بەلێ خەونا سەربەخویێ ژ بیرا چ کوردەکێ ناچیت و کورد دێ ب سەربەخویێ گەھیت چ نیزیک یان دویر.
ل داویێ دا فەرە ھەمی ئالیێن کوردستانی ھاریکاریا حکومەتا ھەرێما کوردستانێ بکەن بۆ ھندێ بشێت ب زووترین دەم کوردستانێ ل ڤێ کریزێ دەرباز بکەت کو نە ھەژیێ ڤێ چەندێ یە پشتی مەزنترین رێکخراوا تیرورستی شکاندی و تازە ب چەکێ ئەمریکی ھێرش ل سەر بێتە کرن. ھەروەکی دیار سەروکێ حکومەتا ھەرێما کوردستانێ نێچیرڤان بارزانی بۆ چەندین جارانە داخازا دیالۆگێ دکەت ل بەغدا بۆ ھندێ زێدەتر خوینا ھەردو ئالیان نەئێتە رێشتن و ئەو پرسگرێکێن ھەیژی ب دانوستاندن بێنە چارەسەرکرن کو ل سەر ھەمیان را (ماددێ ١٤٠) دەستورێ عیراقێ یە کو تایبەتە ب دەڤەرێن کوردستانێن دەرڤەی ھەرێمێ. بەلێ بەغدا ھەتا نھا نەھاتیە پێش بۆ دەستپێکرنا دانوستاندنەکا جدی و دیف دەستورێ عیراقێ کو ھەر رۆژ دەنگێ ھندێ بلند دبیت ئەم ل گەل جێ بەجێ کرنا دەستورێ عیراقێ ینە، بۆ پرۆپاگندێن ھەلبژاردنا.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.