دۆزا سكالانڤیسان

دۆزا سكالانڤیسان

وارڤان

گه‌له‌ك جاران، بۆ من گومان چێ دبت كو هنده‌ك تشت، ب ده‌ست و ئنیه‌ته‌ك خراب، خوه‌هر و ڤیچ دهێنه‌ چێكرن یان كرن، داكو فه‌رته‌نه‌ ژێ په‌یدا ببت و مێش ببته‌ گامێش.. و پشتى دلئێشانه‌كا مه‌زن، تشته‌كێ نیڤه‌ڕۆ بهێته‌ كرن.

نووترین نموونه‌، دۆزا ئه‌لكترۆنیكرنا سیسته‌مێ سكالانڤێسینێ و كاروبارێن دادگه‌هانه‌. بێگومان، كه‌سێ ئاڕێشه‌ دگه‌ل ئه‌لكترۆنیكرن نینه‌. مه‌ بڤێت نه‌ڤێت، پێلا پێشكه‌ڤتنێیه‌، ئیرۆ نه‌، سوبه‌ دێ هه‌ر گه‌هت.

جارێ دا بپرسین، ئێك؛ سكالانڤێسین چ جۆره‌ شۆله‌‌؟ ئانكو شۆله‌كێ میرییه‌ یان شۆله‌كێ خوماله‌. دو؛ شۆله‌كێ هه‌وجه‌ى شه‌هره‌زایى و بسپۆریه‌كا تایبه‌ته‌ یان هه‌ر كه‌سه‌ك دشێت بكه‌ت؟ ب گۆتنه‌كا دى، كاره‌كه‌ بۆ نه‌خوانده‌واران تنێ دهێته‌كرن یان بۆ هه‌میان؟

وا دیاره‌، سكالانڤێسین كاره‌كێ میرى نینه‌ و بۆ هه‌میانه‌.

قۆناغا دى ئه‌وه‌؛ دێ چاوا ئه‌ڤ كاره‌ هێته‌ سه‌رده‌مكرن و گونجاندن دگه‌ل ته‌كنۆلۆجیا نوو؟ هه‌كه‌ر ئارمانج ئه‌وه‌.

بۆ ئه‌ڤێ، چاره‌یه‌كا ساده‌تر و بێئاڕێشه‌تر و بێفه‌رته‌نه‌تر و بێنانبڕین هه‌یه‌، ئه‌و ژى دادگه‌هـ نه‌ كۆمپانیه‌ك، لسه‌ر سكالانڤیسان سیسته‌مێ ئه‌لكترۆنى بسه‌پینت. ئانكو، وه‌خته‌كى (سێ مه‌هان بۆ نموونه‌) بده‌ته‌ سكالانڤیسان، كو سیسته‌مێ ئه‌لكترۆنى بكاربینن و ب یێ دادگه‌هێڤه‌ بهێنه‌ گرێدان. ب دیتنا من، ئه‌ڤه‌ یان هه‌ر كارێ سكالانڤێسینێ نه‌هێلابان، دا ره‌وان ب رێڤه‌ چت و كه‌سێ گازنده‌ژى نه‌دكرن.

لێ رێكخستنا شۆلى ببته‌ پاوانكرن و نانبڕین و كێمكرنا ده‌لیڤه‌یێن شۆلى، گومانێ دئێخته‌ سه‌ر هه‌مى پرۆسێسێ و ئارمانجا وێ. نه‌خاسمه‌، ئه‌ڤه‌ چه‌ندین سالن، ب هه‌زاران هه‌لگرێن باوه‌رنامه‌یێن بلند و زانكۆیان نه‌هاتینه‌ دامه‌زراندن.. سكالانڤیس ژى دێ چنه‌ سه‌ر.

دێ ئێك مژار مینت، خزمه‌تا ڤیئایپى VIP. بۆ ئه‌ڤێ، بلا كۆمپانیه‌ك بۆ خوه‌ دگه‌ل سكالانڤیسان پێ راببت، و سه‌رۆ نه‌ئێشه‌! هه‌ركه‌سێ بڤێت شۆلێ خوه‌ ب رێكێن رۆتینى بكه‌ت، دێ ژ سكالانڤێسى ده‌ستپێكه‌ت، یێ بڤێت به‌رانبه‌ر پاره‌یه‌كى كه‌سه‌كێ دى/ كۆمپانیه‌ك شۆلێ وى/وێ بكه‌ت، دێ چته‌ كۆمپانییێ.

بۆچى شۆلێن ب سانه‌هى دهێنه‌ ئالۆزكرن؟ پرسیاره‌كا بێبه‌رسڤه‌.

بابه‌تێن ب ڤێ مژارێ ڤه‌ گرێدای