دووربینی د سیاسەتێ دا

دووربینی د سیاسەتێ دا

به‌هرۆز زێبارى

ئێک ژ خالێن ھەرە گرنگ د سیاسەتێ دا دووربینیە،  ئانکو ھزرکرن و پلان دانان و سەرەدەری کرن د ناڤـ سیاسەتێ دا پێتڤی ب دارشتنەکا دومدرێژ و کویر ھەیە، ب واتا ھزرکرن و دانانا پلانەکێ بو ئەڤرۆ و سوبەھی، دا کو بشێن ب سەرکەفتیانە ل ھەمی کاودانان دەرباز بن و ژ ئەگەرێ روودانا ھەر بارودوخەکێ نەچاڤەرێکری چارەیەک ھەبیت بۆ دەربازبوونێ.
یا خویایە کو رۆژ بۆ رۆژێ گەفێن تورکیا بۆ سەر روژئاڤایێ کوردستانێ زێدەتر دبن و د ڤان روژان دا مەترسیەکا مەزن ل سەر رۆژئاڤایێ کوردستانێ ھەیە ژلایێ تورکیاڤە. یا ئەڤرۆ ئەم دبینین و گوھـ لێ دبین سەبارەت رۆژئاڤایێ کوردستانێ جھێ دلگرانیێ یە بۆ ھەر کوردەکێ لێ ئەڤـ کاودانەژی بو چەند ئەگەرەکان ڤەدزڤرن. ئێک ژ ئەگەرێن سەرەکی ھەلویست و سەرەدەریکرنا سەرکردێن رۆژئاڤایە د ماوەیێ چەند سالێن بوری ژ پەیرەوکرنا ئایدۆلۆژیەتا پەکەکێ و سەرەدەریکرنا وان د بوویەرێن رووژێ دا ڤەدەر ژ ھزرکرنا پاشەرۆژا وێ دەڤەرێ و نەبوونا پلانێن پێش وەخت بۆ دەرباز بوون ژ ھەر ئاریشە و ئالوزیەکێ.
بەریا سێ سالان رێزدار نێچیرڤان بارزانی سەروکێ حکومەتا ھەرێما کوردستانێ د پانێلەکێ دا ل زانکۆیا ئەمریکی ل دھوکێ راگەھاندبوو (ئەگەر دەستھەلاتا روژئاڤایێ کوردستانێ خو ژ سیاسەت و ئایدولوژیەتا پەکەکێ قورتال نەکەت، تورکیا دێ ڤێ یەکێ کەتە بەھانەیەک و ھێرشی روژئاڤا کەت). د وی دەمی دا رێزدار نێچیرڤان بارزانی باش د زانی کو بەردەوامبوونا سەرکردێن رۆژئاڤا ل سەر وێ چەندێ دێ بیتە ئەگەرێ رویدانا ئالوزیان و تنێ دێ کوردێن روژئاڤا باجا شاشی و ھەلویستێن سەرکردێن ناڤبری دەن. چ گومان تێدا نینە کو رێزدار نێچیرڤان بارزانی د وی دەمی دا ئەڤـ بوچوونە ب ھەروە نەگۆتیە، ئانکو ب حوکمێ شەھرەزایی و دووربینیا وی بۆ بارودوخێن دەڤەرێ ب گشتی و روژئاڤایێ کوردستانێ ب تایبەتی و بەردەوامیا سیاسەتا شاش یا حزبێن رۆژئاڤا (وەک پەیەدە و ھەسەدە) دێ ئەڤـ بارودوخە لێ پەیدابن، و ئەڤرۆ ئەم دبینین ئەو بۆچوون یا دبیتە راستی. لێ ب مخابنی ڤە حزب و سەرکردێن دەستھەلاتدارێن روژئاڤایێ کوردستانێ ڤەدەر ژ وێ چەندێ کو پێداچوونەکێ د ھەلویستێن خۆ بکەن لێ ب بەروڤاژی دژایەتیا ڤێ بۆچوونێ کر و ب کرنک وەرنەگرت.
ل بەرواری (٢٢/٧/٢٠١٣) سەروک مسعوود بارزانی د کومبوونەکا بەرفرەھـ دا د گەل ھەژمارەکا زورا پارتێن سیاسی یێن ھەر چار پارچێن کوردستانێ داخازا بەستنا کونگرا نەتەوەیی کر بۆ پتر ب ھێز بوون و ئێکگرتن و ئێک گۆتاریا کوردان، لێ ھەر ل وی دەمی ژی پەکەکە و حزب و سەرکردێن نزیک ژ وێ رێگربوون ژ بەستنا کونگرەی.
ئەگەر ئەم بەراوردەکا کورت د ناڤبەرا سەرکردێن رۆژئاڤا و باشورێ کوردستانێ بکەین د ڤان سێ چار سالێن بوری دا سەبارەت بوویەرێن روژئاڤایێ کوردستانێ. بۆ مە دیار دبیت کو سەرکردێن باشورێ کوردستانێ مینا رێزدار نێچیرڤان بارزانی دووربینتر و کویرتر پێشبینیا رویدانا بەرھەلست و کارڤەدانێن تورکیا کریە ل ھەمبەر سیاسەتا پەیەدێ ل دەڤەرێ. نھا ژی کو رۆژئاڤا کەفتیە بەر ئێرش و گەفێن تورکیا سەرکردێن روژئاڤا داخازا بەستنا کونگرا نەتەوەیی دکەن و ترسا وان ئەوە کو ھەڤپەیمانێن وان ئیدی پشتا خو لێ کریە و چ پشتەڤان نەماینە و مەترسیا ل ناڤچوونا دەستھەلاتا وان ھەیە ل دەڤەرێ. چونکی یا خۆیایە ژ لایێ نێڤدەولەتی ڤە پەکەکە وەک رێکخراوەکا تیروریستی دھێتە ھەژمارتن، و ھەر حزبەک یان دەستھەلاتەک سیاسەت و ئایدولوژیا پەکەکێ پەیرەو بکەت دێ یا بێ بەھر بیت ژ ھاریکاری و پشتەڤانیا راستەراست یا نێڤدەولەتی، نەخاسمە ل وەلاتەکێ وەکی سوریا کو جھێ ململانێ یا دەولەتێن زلھێزێن جیھانێ یە.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.