دهۆك ب هیڤیه‌ دلێ جه‌ماوه‌رێ خۆ ل ده‌ستپێكا خولێ گه‌ش بكه‌ت

دهۆك ب هیڤیه‌ دلێ جه‌ماوه‌رێ خۆ ل ده‌ستپێكا خولێ گه‌ش بكه‌ت

وار – دهوك :

چاڤه‌ڕێیه‌ ئه‌ڤرۆ و سوبه‌هی كارۆانێ خولا ئیراقێ و وه‌رزێ نوو یێ 2015/2016ێ یا ته‌پاپێی بۆ یانه‌یێن پلا نایاب بهێته‌ كرن، هه‌ردو یانه‌یێن پارێزگه‌هێ دهۆك و زاخۆ نوونه‌رێن پارێزگه‌هێ بكه‌ڤنه‌ د هه‌ڤڕكییان دا، ژ كۆما ئێكێ ئه‌ڤرۆ ل ده‌مژمێر(3:30) پشتی نیڤرۆ تیما دهۆكێ دێ ئێكه‌م یارییا خۆ د ناڤ ئه‌رد و جه‌ماوه‌رێ خۆ دێ مێڤاندارییا یانه‌یا نه‌ف ئه‌لجنۆب یا به‌سرایی ل یاریگه‌ها خۆ یا سه‌ره‌كی كه‌ت، سوبه‌هی تیما زاخۆ بێی جه‌ماوه‌ر دێ یارییا خۆ دگه‌ل مێڤانا خۆ یانه‌یا مینا یا به‌سرایی كه‌ت، زاخۆ دێ ژ ده‌رڤه‌یێ باژێرێ خۆ و بێی جه‌ماوه‌ر یاریێ كه‌ت ژبه‌ر سزایێن ئێكه‌تییا ئیراقێ ل سه‌ر یانه‌یا زاخۆ، لدۆر دوماهی به‌رهه‌ڤیێن تیما دهۆكێ و هه‌ڤڕكا وێ نه‌فت ئه‌لجنۆب بۆ یارییا ئه‌ڤرۆ رۆژنامه‌یا وار بۆچوونێن جودا وه‌رگرتینه‌ ئه‌وێن د ڤێ راپۆرتێ دا بۆ خوانده‌ڤانان دیاردكه‌ن.

سائیر جه‌سام راهێنه‌رێ دهۆكێ گۆت، ده‌ستپێكا ئێكه‌م هه‌ر یارییه‌كا د خولێ دا دێ بۆ هه‌ر تیمه‌كا یا بزه‌حمه‌ت بیت، هه‌رچه‌نده‌ مه‌ به‌رهه‌ڤیێن باش كرینه‌ پشتی كه‌مپه‌یه‌كێ راهێنانێ و پشتبه‌ستن ل سه‌ر كوڕێن پارێزگه‌هێ، دبیت هاتنا پیشه‌كاران د ده‌مه‌كێ كێم دان هاتینه‌ و ئه‌ڤرۆ بكه‌ڤنه‌ لبن گڤاشتنان وتا راده‌یه‌كی ده‌رۆنێ وان به‌رهه‌ڤ نه‌بیت، به‌لێ مه‌ د ماوه‌یێ بۆریدا هه‌موو بزاڤ كرینه‌ ژ هه‌موو لایه‌نانڤه‌ د به‌رهه‌ڤبن، ژلایه‌كێ دویڤه‌ سائیری هیڤی خواست جه‌ماوه‌رێ دهۆكێ رۆلێ خۆ بینت و پشته‌ڤانییا تیما یانه‌یێ بكه‌ت ب تایبه‌تی رێژه‌یا85% یاریكه‌ره‌كێ باژێرییه‌ و هه‌موو ژی دێ ب زاخه‌كا مه‌زن هێنه‌ دناڤ یاریێ دا، هه‌روه‌سان سائیر دیاركر كو ئه‌وان ئێك ئارمانج هه‌یه‌ سه‌ره‌رایی ئه‌و هه‌ڤڕكیێ د خولێ دا نا كه‌ن به‌لێ بۆ هه‌ر یارییه‌كێ تیما خۆ كێمتر نابینن و دێ بۆ سه‌ركه‌ڤتنێ و خالێن یاریێ كه‌ن، لدوماهیێ هیڤی و ئۆمێدێن خۆ دیاركرن كو بشێن د ئێكه‌م یاری دا سه‌ركه‌ڤتنێ تۆماربكه‌ن و ببیته‌ پالده‌ره‌ك و ده‌ستپێكه‌كا باش بۆ تیمێ و خوونێن گه‌رم یێن كوڕێن باژێری.

عیماد عوده‌ راهێنه‌رێ تیما یانه‌یا نه‌فت ئه‌لجنۆب گۆت، یارییا مه‌ دگه‌ل دهۆكێ ب سانه‌هی نابیت ب تایبه‌تی ئه‌م دێ د ناڤ ئه‌رد و جه‌ماوه‌رێ وێ دا كه‌ین، به‌لێ ئه‌م یێن هاتین بۆ سێ خالێن یاریێ و دێ بۆ سه‌ركه‌ڤتنێ هێنه‌ دناڤ یاریگه‌هێ دا، ژبۆ ده‌ستپێكه‌ك بۆ كۆمڤه‌كرنا خالان و به‌ره‌ڤ ئارمانجا خۆ یا ناسناڤی ئه‌وا ده‌مێ وێ گیرۆبووی، تیما دهۆكێ پێكهاتییه‌كێ گه‌نج هه‌یه‌ و پرانییا وێ كورێن باژێرێ وێ نه‌، هه‌رچه‌نده‌ دبیت كێم شاره‌زاهی هه‌بیت، به‌لێ چه‌كێ وان دلسۆزییه و پشته‌ڤانییا جه‌ماوه‌رییه‌، مه‌ رێك و پلانێن خۆ هه‌نه‌ بۆ تۆماركرنا گۆلان، هیڤییا من ئه‌وه‌ یارییه‌كا خووش بیت جه‌ماوه‌ری خوشیێ ژێ بینن و ئه‌م سێ خالێن یاریێ بده‌ستخۆڤه‌بینن.

ژ یاریێن دی یێن هه‌مان كۆم،(نه‌فت ئه‌لوه‌سه‌ت×ته‌له‌به‌)، (كه‌رخ× زه‌ورا)، (نه‌فت× كاره‌با)، (نه‌فت میسان× سه‌ماوه‌)
یاریین كۆما دووێ سوبه‌هی سیشه‌مبی (زاخۆ× مینا)، (هه‌ولێر×به‌غدا)، (سیناعه‌×حدوود)، ( كه‌ربه‌لا× نه‌جه‌ف)، (شورته‌× جه‌ویه‌).
تێ زانین خولا ئیراقێ ب پشكدارییا 20 یانه‌یێن پلا نایاب دهێته‌ كرن ئه‌وێن هاتینه‌ دابه‌شكرن لسه‌ر دو كۆمان، كۆما ئێكێ پێكهاتییه‌ ژ یانه‌یێن(دهۆك، ته‌له‌به‌، زه‌ورا، نه‌فت ئه‌لوه‌ست(قاره‌مانا وه‌رزێ بۆری)، كه‌رخ، نه‌فت، كاره‌با، نه‌فت ئه‌لجنۆب، سه‌ماوه‌ و نه‌فت میسان). كۆما دووێ،(زاخۆ، جه‌ویه‌، هه‌ولێر، شورته‌، به‌غدا، سیناعه‌، مینا، كه‌ربه‌لا، حدوود و نه‌جه‌ف)، یاریێن هه‌ردو كۆما ب شێوه‌یێ خول دو قۆناغ دهێنه‌كرن هه‌ر چار تیمێن ئێكێ دێ ده‌ربازبنه‌ قۆناغا چارگۆشه‌یا زێرین و ژ هه‌ر كۆمه‌كێ تیما دوماهیێ دێ پاشڤه‌چیته‌ پلا ئێكێ.

بابه‌تێن ب ڤێ مژارێ ڤه‌ گرێدای