دهۆك ب سه‌ردكه‌ڤیت و هۆژداریێ دده‌ته‌ جه‌وییه‌ و مینایێ

دهۆك ب سه‌ردكه‌ڤیت و هۆژداریێ دده‌ته‌ جه‌وییه‌ و مینایێ

وار – دهۆک :

تیما ته‌پاپێی یا یانه‌یا دهۆك هیڤیێن خۆ بۆ قۆناغا چارگۆشه‌یا زێرین گه‌شكرن، پشتی د یارییا شه‌ڤا ئێكشه‌مبییا بۆری دا سه‌ركه‌ڤتنه‌كا گرنگ لسه‌ر مێڤانا خۆ یانه‌یا نه‌فت ئه‌لجنۆب یا به‌سرایی تۆماربكه‌ت ب گۆله‌كی بێی به‌رامبه‌ر، دیارییا واندا ئه‌وا چۆراچووڤه‌یێ كۆما دووێ ژ یاریێن گه‌ڕا پێنجێ ژ قۆناغا دوماهییا خولا ئیراقی یا ته‌پاپێی بۆ یانه‌یێن پلانایاب ل یاریگه‌ها یانه‌یا دهۆك هاتیه‌كرن.
هه‌ر ژده‌ستپێكا نیڤا ئێكێ دا یاریكه‌رێن تیما یانه‌یا دهۆكێ ده‌ست ب گڤاشتنان كر لسه‌ر گۆلا نه‌فت ئه‌لجنۆب و پلانێن راهێنه‌ری ژی دیاربوو كو بتنێ ئێرشبرنه‌ ژبۆ بده‌ستڤه‌ئینانا خالێن یاریێ و زڤڕین بۆ هه‌ڤڕكییا بده‌ستڤه‌ئینانا ئێك ژ پلێتا ده‌بازبوونێ بۆ یاریێن دوماهیێ. ئێكه‌م بزاڤ یا دهۆكێ ژلایێ ئۆسامه‌ محه‌مه‌د بوو د خوله‌كا 6ێ دا، دیڤدا دخوله‌كا 9ێ دا وه‌لید سه‌لمان چه‌نسێ خۆ د شۆته‌كی دا دیاركر، دماوه‌یێ ڤی نیڤی دا ئێرشێن یاریكه‌رێن دهۆكێ لسه‌ر یانه‌یا نه‌فت ئه‌لجنۆب زێده‌تر بوون و چه‌ندین ده‌لیڤه‌یێن گۆلكرنێ ژ ده‌ستدان ئه‌وژی ژبه‌ر كێم شاره‌زاهییا یاریكه‌رێن دهۆكێ، همبه‌رێ وێ یاریكه‌رێن نه‌فتێ هنده‌ك بزاڤێن كێم هه‌بوون، ئه‌ڤ نیڤه‌ بێی گۆل بدوماهی هات.
دنیڤا دووێ دا و پشتی بۆرینا دو خوله‌كان و ژ پاسه‌كا یاریكه‌ر ئه‌حمه‌د جاسمی ئێرشبرێ دهۆكێ وه‌لید سه‌لمان شیا گۆله‌كا جوان ب سه‌ری تۆماربكه‌ت، پشتی ڤێ گۆلی ئاستی یاریێ بهێزترلێهات، یاریكه‌رێن نه‌فتێ بزاڤكرن بۆ راستڤه‌كرنا ئه‌نجامێ یاریێ و یێن دهۆكێ لسه‌ر سنۆرێ گۆله‌كێ قایل نه‌بوون به‌لكۆ بزاڤێن تۆماركرنا گۆلا دووێ دكرن، هه‌ر دڤێ یاریێ دا هه‌موو یاریكه‌رێن دهۆكێ ئاسته‌كی مه‌زن نیشاندا ب تایبه‌تی هێلا به‌رگریێ، دڤێ نیڤێدا بتنێ دۆ ده‌لیڤه‌یێن مسۆگه‌ر یێن گۆلكرنێ ژهه‌ردو تیما چوو، د خوله‌كا 86ێ كامیران خالد یاریكه‌رێ دهۆكێ دده‌ڤه‌را په‌نه‌لتیێ دا گۆلا دووی ژ ده‌ستدا، دیسان ئیرشبرێ نه‌فت ئه‌لجنۆب حسین كه‌ریم دخوله‌كا87ێ دا ده‌لیڤه‌یا گۆلێ ژده‌ستدا. یاری ب سه‌ركه‌ڤتنا دهۆكێ بدوماهی هات و ئێكه‌م سه‌ركه‌ڤتن د ڤێ قۆناغێ دا تۆماركر و هیڤیێن پلێتا ئێك ژی اریێن دوماهیێ گه‌شترلێكرن.
لدۆر ڤێ ئه‌نجامی خالد موشیر كاپتنێ یانه‌یا دهۆك گۆت، لده‌ستپێكێ پیروزبیت بۆ جه‌ماوه‌رێ یانه‌یا دهۆكێ، ئه‌م ژ هه‌ژی سه‌ركه‌ڤتنی بووین و ئاسته‌كی مه‌زن نیشاندا، هه‌رچه‌نده‌ دیاریێن بۆری ژی دا هه‌مان ئاست نیشان دا به‌لی بێی چه‌نسی ژی ئه‌گه‌ربوو، دیارییا نه‌فتێ دا مه‌ هه‌موو یاریكه‌ران رژدی لسه‌ر ئێك ئه‌نجام كربوو وئه‌م شیایین ئارمانجا خۆ بجهـ بینن، ئه‌ڤ سه‌ركه‌ڤتنه‌ هیڤیێن مه‌ بۆ هه‌ڤڕكیێ لسه‌ر پلێته‌كا یارییا دوماهیی گه‌شكرن، یارییا بهێت چاره‌نڤیسه‌ بۆ ده‌ربازبوونێ و یا بهێزه‌، هیڤییا مه‌ ئه‌وه‌ بشێن سه‌ركه‌ڤتنی تۆماربكه‌ین.
ژلایێ خۆڤه‌ عوده‌ی تالب گۆلچیێ نه‌فت ئه‌لجنۆب گۆت، یارییه‌كا بهێز و خووش بوو، هه‌رچه‌نده‌ ئاستێ یاریكه‌رین مه‌ دباشن نه‌بوون، ژ ده‌ستدانا گۆلان یا دیاربوو، همبه‌ری وی یاریكه‌رێن دهۆكێ ئاسته‌كی مه‌زن نیشان دا ئه‌ز ده‌ستخووشیێ ل وان دكه‌م و پیرووزباهییا یانه‌یێ و جه‌ماوه‌رێ دلسۆزی دهۆكی دكه‌م، هه‌رچه‌نده‌ ب خه‌له‌تییه‌كا هێلا به‌رگریێ تیما مه‌ هاته‌ تۆماركرن به‌لێ دهۆك ژ هه‌ژی سه‌ركه‌ڤتنی بوو.
ژلایه‌كێ دیڤه‌ و د هه‌مان كۆم دا هه‌ردو یانه‌یین مینا و جه‌وییه‌ بێی گۆل وه‌كهه‌ڤبوون، بڤان ئه‌نجامان یانه‌یا دهۆك پیشڤه‌هاته‌ رێزا سێیی ب پینچ خالان و نه‌فت ئه‌لجنۆب ب هه‌مان خال وكێمترییا گۆلان پاشڤه‌چوو رێزا چارێ، مینا ب هه‌فت خالان لسه‌رێ لیستێ دهێت و جه‌وییه‌ ب هه‌مان خال كێمترییا گۆلان لرێزا دووی دهێت.

بابه‌تێن ب ڤێ مژارێ ڤه‌ گرێدای