دناڤبەرا رەش و سپی دا!

سالح زێباری

رەخنەگرتن ل کەتوارێ ھەیی و پێشکێش کرنا ئەلتەناتیفەک ھەژی و باش و مفادار، وەرگرتنا مەزنترین بەرپرسیاریەتی و ئەرک و خزمەت و کارە ل دەڤ نڤیسەر و خواندنەڤان و روشنبیرێن وەلاتی. لێ مخابن رەخنەگرتن و پێشکێش کرنا بەدیلێ باشتر و پێشنیارێن راست ژی وەکی دەھان پرسێن دیتر کەفتیە ناڤ کێشمە کێشا سیاسی و ھەڤرکییا تەسکا حزبایەتی و کەسی و بەرژەوەندیێن ئابووری.
ھەبوونا ھژمارەیەک زۆر ژ خوەدیێ قەلەم و ئالیێن سیاسی و کەسێن سەربەخۆ ژی پرۆسەیا سیاسی د ھەمی بیاڤەکێ دا بەرەڤ پێش دبەت و زەنگینتر لێ دکەت، لێ یا جھێ سەر راوەستیانێ و سەرنجا ئەکادیمیست و خوەدی ویژدانان ئەوە کو تو رەوشێ! وەکی تابلویەکێ رەش و رەش یان وەکی کەلێ بەفرێ سپی ببینی! و ھەمی گرۆڤەیان گۆری نەرین و دیتن و بەرژەوەندیا خوە بکەی و ل راستیێ دوور بکەڤی و ببیە بەندەیێ ھزر و بەرژەوەندیێن خوەیێن کورە.
ئەڤ گۆتارا من پشتی وێ چەندێ ھات کو ھندەک کەسان ھەمی چاکیێن سازیێن حکومی ب خراب وەسف دکەن تایبەت د نھا دا کو سوپاس بۆ خودێ پرۆژەیان ب رێژەیەکا بەرفرەهـ دەستپێکرییە و ئایندەیەک گەشتر د رێدایە س، ھەر وەکی دگۆت (ئەوا ل سەر خرابی بنیات کربیت خراب و باتلە!) ئەرێ ئەوا د رۆژەڤێ دا ھەمی باتلە؟! ب ھیچ ئاوایەکێ نابیت خوەدی قەلەمەک ھەبیت ئەڤێ ھەرێما ئەم وەکی گزیرتەیەک ژ ئارامیێ ددەینە نیاسین د ناڤا دەریایەک ژ کوشتن و تیرۆر و خوینرێشتنێ ب سفرێ ھەڤبەر بکەت. لێ دھەمان دەمدا نابیت ئەوێن کو ل سەر رەوشێ دنڤیسن و بەرەڤانیێ ژێ دکەن کەتوارێ مە ب بھەشتا سەر ئەردی وەسف بکەن.
بو ھندێ دناڤبەرا رەش و سپی دا رەنگێن دی ژی ببینین فەرە د گۆتار و گۆتن و نڤیسانێن خوە دا ئیماژەیێ ب چەند خالێن گرنگ بکەین کو د خزمەتا وێ رەوشێ بن ئەوا ب خوینا شەھیدان بەرھەم ھاتی و ب دبلۆماسیەتا سەرکەفتیانە ھاتییە پاراستن پشتی وێ کریزا کو ئارمانج ژێ نەھێلانا ڤی کیانێ سیاسی و دەستوری بوو .
– بۆ ھندێ د بەرامبەر خوینا شەھیدان و خەباتا پێشمەرگەین قەھرەمان و کوردسنتانیێن خۆراگر سەربلند و بێ وەفا دەرنەچین، فەرە د گۆتارێن خوەدا ھێلا نەتەوەی و نیشتیمانی و پرسێن گرێدای ب ئاسایشا نەتەوەی گرنگیێ پێ بدەین .
– ھەروەسا بۆ ھندێ وەلاتەک ئاڤەدان تر و ب ھێزتر ئاڤا ببیت بەردەوام فەرە گرنگیی ب وان چالاکی و کارێن حکومەتێ بێتە دان. ئەگەر پار سال بکەین نموونە و ل ھزرا دوست و دوژمنێن کوردا دا نەبوو کوردستانەک دێ ھەبیتەڤە بیتە قیبلەتا وەفدێن سیاسی بۆ کوردستانێ. کەسێ ھزر نەدکر دێ کوردستان پێگەھێ خوە زڤرینیت. کەسێ نەدانابی دێ ئابووری باشتر ژێ ئێت. د ڤێرە دا ویژدان دبیتە دادڤان و بریارێ ل سەر رەوشێ ددەت .
– ھەروەسا کارێ گرنگ تایبەت بۆ روشنبیران پێشکێشکرنا پێشنیار و رەخنەیێن ھەژی و مفادار و بنیاتنەرن، بۆ ھندێ ھەمی تاکێن جڤاکی مفای ژێ وەربگرن د گەل حکومەتێ.
ب ھەبوونا ڤان خالان دگەل چەند تێبینی و خالێن دیتر ھەمی تاکەک ژ وان گۆتار و نڤیسین و بەرنامەیان مفادار دبیت و ل داویێ ژی حکومەتەک بھێز ئاڤا دبیت کو شیانێن پاراستنا ھەمی تاکەکێ ھەبیت و مفای بۆ خوەدی مافی ڤەگەرینیت. لێ ئەگەر بەروڤاژی بۆ رەوش ب وو رەنگ بتنێ ھاتنە دیتن ژ بال خەلکێ گشتی و سیاسی و روشنبیران ڤە وی دەمی نە ب باشیێ بدروستی دئێتە گۆتن دەست خوش و سەرکەفتی بی! نە ب خرابیێ ژی دئێتە گۆتن ستوپ و بەسە ئەوا تو دکەی دەرئەنجامێن خراب ھەنە و ئەڤ وەلاتە کەشتیەکە و ب نقومبوونا وێ ئەم ھەمی ژ ناڤدچین! باش و خراب خوەدی ئالیگر دبن و ل ئەنجامێ ڤێ چەندێ دەست وەردانێن بیانی و بێ ھیڤیبوونا جڤاکی تایبەت گەنجان و تێکچوونا رەوشێ و حکومەت ژی ل باش و خرابان وەردبیت و ھەمی پرسەک دبیتە مزایدەیا سیاسی و حزبی.
لەوما فەرە ل داویێ بیرا خوە ژ خەونا ئەحمەدێ خانێ بینین و دەمێ د گوت (گەر دی مە ھەبا ئیتیفاقەک…) ب راستی ژی ئیتیفاقا مە سەرێ ژووری نەبیت وی دەمی ئەم دێ ل جھێ سور و زەر و کەسک و شین.. تنێ رەش و سپی بینین و دەرگەەهـ دێ ل سەر پشتێ بن بۆ ھەمی نەخوشی و دەردەسەریەکێ.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.