دا سنۆرێ‌ د ناڤبه‌را هه‌رێما كوردستانێ‌ و رۆژئاڤایێ‌ دا كوردستانێ‌ هه‌لینین

ئیحسان ئامێدى :

روودان گه‌له‌كن و بارودوخ د ئالوزن و ره‌وش به‌ره‌ڤ په‌قینێن مه‌زنترن ل ده‌ڤه‌را روژهه‌لاتا ناڤین، مرۆڤ نه‌شێت ب دروستاهی ژمێژوویه‌كێ‌ یان ل جهه‌كی ده‌ستپێبكه‌ت كا ژ كه‌نگی وه‌ره‌ ئه‌ڤ بارودوخه‌ هوسا ئالوزبوویه‌!؟ خاله‌كا هه‌ڤپشك د بیركرن و بوچوونێن جڤاكێن ڤێ‌ ده‌ڤه‌رێ‌ دا هه‌یه‌ ئه‌و ژی هه‌میشه‌ هه‌می ئالوزی و گرفت و شه‌ڕێن قه‌ومین دئێخنه‌ پال لایه‌نێن ده‌ره‌كی و وه‌سا نیشا دده‌ن كو ئه‌ڤ ملله‌تانه‌ دبێ‌ گونه‌هن و هه‌ر تشته‌ك ب سه‌ری هاتبیت ئه‌نجامێن ده‌ستدرێژی و پیلان و مایتێكرنێن ده‌ره‌كینه‌!.
چه‌رخێن به‌ری بوسرمانه‌تیێ‌ كومه‌كا هوز و خێلێن ڤێ‌ ده‌ڤه‌رێ‌ بسه‌روستۆیێن ئێكڤه‌بوون و شه‌ڕكرن و تالانكرن سروشتێ‌ وان بوو، و د هاتنه‌ په‌رچقاندن ل بن پێت هێزێن ئمپراتوریێن فارسی و بیزه‌نتی و پشتی سه‌رهلدانا بسرمانه‌تیێ هێزه‌كا دیتر ژی كه‌ڤته‌ د مه‌یدانا شه‌ڕ و ململانێ‌ دا،و ئێدی ئه‌و ئمپراتوریه‌تێن به‌رێ ب شه‌ر و كوشتنێ‌ هاتنه‌ ژناڤبرن و ئمپراتوریه‌تا ئیسلامی لسه‌ر كه‌له‌خ و كلوخێن وان و ب قوربانیدانا مروڤێن خۆ هاته‌ ئاڤاكرن! و بدرێژاهیا مێژوویا پتر ژ هزارو چارسه‌د سالێن ته‌مه‌نێ‌ ڤێ‌ ئمپراتوریه‌تێ‌ و لژێرناڤ و ده‌ستهه‌لات و پێكهاتێن جوراوجور سیمایێ‌ كوشتنێ‌ و ژ ناڤبرنێ‌ و خوینڕشتنێ‌ دناڤ خۆدا و دگه‌ل یێن دیتر پێناڤی به‌رفره‌هكرنا سنورێ‌ ده‌ستهه‌لاتا خه‌لیفه‌ی و سولتانی یێ‌ تێدا زالبوو!، ئه‌ڤجا ژی قه‌وارێن سیاسی و میرنشین و ده‌وله‌ت و ئمپراتوریه‌ت كو پێكڤه‌ هه‌بوون هه‌ر بسه‌رو ستۆیێن هه‌ڤدو ڤه‌بوون زیده‌باری شه‌ڕێن به‌رفره‌هكرنێ‌ و به‌رگریكرنێ‌! و دبیت ئه‌ڤه‌ سروشتی جڤاكێ‌ مرۆڤی بیت لهه‌می قولاچێن جیهانێ‌!.
هێز و شه‌ڕكرن كاریگه‌رترین هوكار و فاكته‌رێن پێكئینانا قه‌وارین سیاسی بوونه‌ و هه‌ر ئه‌و هوكاربوونه‌ بووینه‌ هویێن ده‌ستنیشانكرنا سنورێن قه‌واره‌یان و ده‌ستهه‌لاتداران،خۆ ئه‌گه‌ر ل به‌راهیێ‌ به‌رگری ژی بو هه‌بیت ژلایێ‌ خه‌لكێ‌ ناڤخۆ و ره‌خودورا لێ‌ ل دوماهیێ‌ هه‌ر ده‌نگێ‌ هێزێ‌ و ترساندنێ‌ و گه‌فكرنێ‌ سه‌ركه‌ڤتیه‌!.
پشتی هه‌رفتنا دوماهی ئمپراتوره‌تا ئیسلامی یا بناڤێ‌ ئوسمانلی سه‌ر ژنوو ب هوكارێن هێزێ‌ كۆمه‌كا قه‌وارێن دیترێن نه‌ته‌وه‌یی لێ‌ دروستبوون ئه‌ڤجا ژی كورد نه‌شیان ب قه‌واره‌كێ‌ سیاسیێ‌ سه‌ربه‌خۆ شادببن و كوردستان هاته‌ڤه‌ داگیركرن و دابه‌شكرن ڤه‌ و كه‌ڤته‌ به‌ر لێمشته‌كا دی یا سیاسه‌تێن بو‌هژاندنا نه‌ته‌وه‌یی ژ لایێ‌ نه‌ته‌وه‌یێن بالا ده‌ست یێن فارسی و توركی و عه‌ره‌بیڤه‌!.
ئه‌ڤ نه‌ته‌وه‌یێن دیتر شیان وێ‌ هێزێ‌ په‌یداكه‌ن كو مافێ بده‌نه‌ خۆ دا بۆ خۆ قه‌وارێن سه‌ربه‌خۆ و میرنشین و ده‌وله‌ت و ئمپراتوریه‌تا ئاڤاكه‌ن و به‌رفره‌هكه‌ن لسه‌ر كه‌له‌خێن یێن دیتر، و هوڤانه‌ترین و درنده‌ترین شیوازێن كوشتنێ‌ بوو سه‌ركوتكرن و متكرنا داخوازێن ئازادیێ‌ لسه‌ر كوردستانێ‌ بكارئینان و سه‌پاندن،ئێدی ئه‌ڤ ملله‌تێ‌ ئاشتیخواز و ته‌نا بێ‌ به‌هر ما ڤه‌ ژ هه‌ر مافه‌كی!.
ریكه‌ڤتنا ئه‌رزروم و زهاو و سایكسپیكو و سیڤه‌ر و لوزان و حه‌تا یا جه‌زائیر و دناڤرا چه‌ندێن دیتر هه‌می دژی هه‌بوونا نه‌ته‌وه‌یا كوردستانێ‌ بوونه‌، لێ‌ ڤی ملله‌تی ژی ل هه‌ر قوناغه‌كێ‌ دا بشیوازه‌كی هه‌بونا خۆ پاراستیه‌ و نیشا دایه‌، و ده‌ر ئه‌نجامێ‌ ب ده‌هان شۆڕش و سه‌رهلدانا و سه‌ره‌رای كۆما گه‌ف و مه‌ترسی و هه‌ره‌شه‌ و ده‌ستدرێژیا ل سالا 1991ی هه‌رێما كوردستانێ‌ ل باشورێ‌ كوردستانێ‌ هاته‌ دامه‌زراندن دچارچوڤێ‌ سنورێ‌ ده‌وله‌تا ئیراقێ‌ یا هه‌ڤگرتی دا و دامه‌زراوێن خۆ یێن حكمرانیێ‌ دامه‌زراندن، لێ‌ هه‌ر لڤێ‌ پارچا كوردستانێ‌ ده‌ڤه‌ره‌كا مه‌زن ژێ‌ هاتبوویه‌ ژێ‌ ڤه‌قه‌تاندن تا سه‌رهلدانا ده‌وله‌تا ئیسلامی لسه‌ر سنورێ‌ باشورێ‌ هه‌ریمێ‌ ل سالا 2014 كو بحكمێ‌ هێزێ‌ و شه‌ری چه‌ندین ده‌ڤه‌رێن كوردستانێ‌ داگیركرن و ئالایێ‌ خویێ‌ ره‌ش لێ‌ چه‌قاندی،و خوشبه‌ختانه‌ هه‌ر بحكمێ‌ هیزێ‌ گه‌لێ‌ كوردستانێ‌ پتریا وان ده‌ڤه‌ران رزگاركرن و ڤه‌گه‌راندنه‌ڤه‌ ئه‌ڤجا ژی تا نوكه‌ دانپێدانه‌كا فه‌رمی ب ڤان ده‌ڤه‌را نه‌هاتیه‌كرن كو پارچه‌كه‌ ژ هه‌رێما كوردستانێ‌ هه‌روه‌كو هه‌رێما كوردستانێ‌ ژی نه‌هاتیه‌ هژمارتن پارچه‌ك ژ كوردستانا مه‌زن!!..
نوكه‌ پارچه‌كا دی یا كوردستانێ‌ ئه‌وا كو دبێژنێ‌ روژئاڤایێ‌ كوردستانێ‌ بهێزا كوردی هاتیه‌ رزگاركرن و ڤێ‌ پارچا كوردستانێ‌ هه‌ڤسنوره‌كێ‌ درێژ هه‌یه‌ دگه‌ل هه‌رێما كوردستانێ‌ كو ئه‌م دشیێن بێژین تاكه‌ سنورێ‌ ته‌نا و ئارام و دلنیایه‌ بۆ وێ‌ پارچێ‌ هه‌ر وه‌كو بۆ هه‌رێمێ‌ ژی، لێ‌ تشتێ‌ سه‌یر ئه‌وه‌ حه‌تا نوكه‌ ده‌ستهه‌لاتدارێن هه‌ردوو پارچان رێزه‌كا مه‌زن لوی سنورێ‌ ده‌ستچێكرێ‌ دژمنان دانای د گرن و هه‌روه‌كو سنورێ‌ فه‌رمیێ‌ دوو وه‌لاتا پاراستیه‌ و سه‌ره‌ده‌ریێ‌ دگه‌لدا دكه‌ن!، ئه‌ڤروكه‌ به‌رپسیارا ڤی سنوری ژ هه‌ردوو لایان ڤه‌ كوردستانی یه‌ لێ‌ هێشتا ئه‌و ئیراده‌ چێنه‌بوویه‌ ئه‌ڤ سنوره‌ بهێته‌ راكرن و ئازادانه‌ خه‌لكێ‌ هه‌ردوو پارچا وه‌كو خه‌لكێ‌ ئیك وه‌لات هاتوچوویا هه‌ڤدوو بكه‌ن!.
نوكه‌ روژئاڤایی كوردستانێ‌ ل ژێر هه‌ره‌شێن ده‌وله‌تا ئیسلامی و توركیا هاتیه‌ دورپێچكرن له‌وا ئه‌ركه‌كێ‌ نه‌ته‌وه‌یی و مروڤیێ‌ ره‌وایه‌ ئه‌ڤ سنوره‌ بهێته‌ راكرن و نه‌مینیت و خه‌لكێ‌ باشوری و روژئاڤایێ‌ وه‌كو هه‌ڤوه‌لاتیێن ئیك وه‌لات سه‌ره‌ده‌ریێ‌ دگه‌ل هه‌ڤدوو بكه‌ن!.
ئیراده‌ و هێز و شیانێن بجهئینانا ئیرادێ‌ لبورینا ده‌می ژیواره‌كی چێدكه‌ت و سه‌ره‌ده‌ری دگه‌ل دهێته‌ كرن ژ به‌ر هندێ‌ كو ئه‌ڤ ده‌رفه‌تا زێرین هاتی، به‌رپسیاریه‌كا نه‌ته‌وه‌یا مێژووی دكه‌ڤیته‌ سه‌ر ده‌ستهه‌لاتێن هه‌ر دوو پارچه‌یان كو ب ئه‌ركێ‌ خو یێ‌ نه‌ته‌وه‌یی راببن و بو جیهانێ‌ خویاكه‌ین ئه‌م ئێك نه‌ته‌وه‌ینه‌.
ده‌وله‌تا ئیسلامی یا تیرۆریستی یا نه‌ قه‌بیلكری لئاستێ‌ جیهانێ‌ و هه‌رێمایه‌تیی شیابوو خۆ ده‌وله‌ته‌كێ‌ لسه‌ر هنده‌ك خاكا ئیراقێ‌ و هنده‌ك خاكا سوریایێ‌ چێكه‌ت و وی سنوری نیڤده‌وله‌تی راكه‌ت و بحكمێ‌ هێزا خۆ یا تیرۆریستی خۆ بسه‌پینیت و وه‌كو ئیك وه‌لات خۆ بدامه‌زرینیت، ئه‌رێ‌ ما ئه‌ڤ شیوازه‌ بوو كوردستانێ‌ ژی دروست نینه‌ زیده‌باری هندێ‌ كو كوردستانێ‌ ژی هوكارێن هێزی و حه‌زكرنێ‌ هه‌نه‌ و ئه‌ڤه‌ مافه‌كێ‌ ره‌وا و پیرۆزه‌ !!
هنری كیسنجه‌ر كو د كتێبا خۆ یا نوو دا ئه‌وا بناڤێ‌ سیسته‌مێ‌ جیهانی دا دبێژیت (ئه‌ڤ ململانێیه‌ دێ‌ سه‌ر ژنوو نه‌خشێ‌ سیاسیێ‌ سوریایێ‌ و به‌لكی یێ‌ ده‌ڤه‌رێ‌ ژی چیكه‌ت، كورد یێن شیاین بۆ خۆ یه‌كه‌یه‌كا سه‌ربه‌خۆ لسه‌ر سنورێ‌ توركیایێ‌ چێكه‌ن، یه‌كه‌یه‌كه‌ دبیت لبورینا وه‌ختی دا هه‌ڤبگریت دگه‌ل یه‌كه‌یا كوردیا سه‌ربه‌خۆ ل ئیراقێ‌.
كاربده‌ستێن حكومه‌تا توركیا دبێژن ئه‌م نا هێلین ده‌وله‌ته‌كا كوردی ل باكورێ‌ سوریا و ل سه‌ر سنورێ‌ وێ‌ چیبیت، هه‌روه‌كو دوه‌ختی دا دگوت ئه‌م ناهێلین قه‌واره‌كێ‌ كوردی ل باكورێ‌ ئیراقێ‌ ژی چێبیت!، لێ‌ وه‌كو مرۆڤ هه‌بیت و یاریكه‌ره‌كێ‌ باش بیت و هێز و ئیراده‌ هه‌بیت وی ده‌می دێ‌ ئه‌و كارتێكرن هه‌بیت كو هه‌ر نه‌خشه‌كی جوگرافیێ‌ سیاسیی نوو بهێته‌ چێكرن بیاڤه‌ك بۆ وێ‌ هه‌بونا بهێز و یا ره‌وا هه‌بیت.
ئه‌ڤه‌ قوناغه‌كا میژوویا گرنگه‌ و د شیانا كوردستانێ‌ دایه‌ ل باشوری و ل روژئاڤا بریارێن خو یێن وێره‌كانه‌ بده‌ن و خۆ وه‌كو ئێك نه‌ته‌وه‌ و ئێك گه‌ل نیشا بده‌ن و وی دورهێلی چێكه‌ن كو بشێت خۆ ب سه‌پینیت وه‌كو ئێك قه‌وارێ‌ سیاسیی نه‌ته‌وه‌یی.
ب حوكمێ‌ هوكارێن ده‌وله‌تا ئیسلامی دروستكرین ئه‌ڤرۆ ده‌ستهه‌لاتێن به‌رێ‌ ل به‌غدا و دیمه‌شقێ‌ حوكم ل باشۆر و رۆژئاڤایی كوردستانێ‌ دكر ئه‌و ده‌ستهه‌لات نه‌ماینه‌ هه‌روه‌كو شیانێن پاراستن و هاریكاریكرنێ‌ ژی لێ‌ نه‌ماینه‌ له‌وا ئێدی بهانه‌یێ‌ مانه‌ڤه‌یێ‌ دگه‌ل وان وه‌لاتان نه‌ماینه‌ به‌روڤاژی بهانه‌یێ‌ هه‌ڤبوون و لیكدانه‌ڤه‌یێ‌ جهێ‌ خۆ كریه‌ تنێ‌ دهێته‌ خواستن كار بۆ بهێته‌ كرن دا لبورینا ده‌می ببیته‌ ژیواره‌ك و وه‌لاته‌كێ‌ سه‌ربه‌خۆ ژ ڤان هه‌ر دو پارچه‌یا چێببیت.
ده‌وله‌تا سه‌ربه‌خۆ مافێ‌ چاره‌نوسێ‌ گه‌لانه‌ و ده‌ربرینه‌ ژ ئیرادا ئازاد یا ملله‌تان و ئه‌ڤه‌ ئه‌ركێ‌ نه‌ته‌وه‌یی و نیشتیمانیێ‌ خودانێن وه‌لاتی بخۆیه‌ و نابیت ملله‌ت خۆ ل هندێ‌ بگریت كو لایه‌نه‌كی ده‌ره‌كی بریاره‌كا هوسا بو بده‌ت و خێره‌كێ‌ دگه‌لدا بكه‌ت، ئه‌ڤه‌ ئیرادا ملله‌تیه‌ و ملله‌ت بخۆ هێز وشیانێن بجهئینانا ڤێ‌ ئیرادی دابیندكه‌ت و بجهدئینیت و جیهانا دیتر ژی دانپیدانێ‌ پێدكه‌ت و سه‌ره‌ده‌ریێ‌ دگه‌لدا دكه‌ت.

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.