دانپێدان ب واقعى ده‌رمانه‌

ته‌حسین ناڤشكى

دڤێت نها ژ هه‌ر ده‌مه‌كێ دى زێده‌تر ده‌ستهه‌لاتا هه‌رێما كوردستانێ، تایبه‌ت (پارتى) خوه‌ ژ هزرا تیۆرییا كلاسيكييا پیلاندانانێ (نظرية المؤامرة) رزگاربكه‌ت و باش بزانت كو هه‌كه‌ ئه‌و هزركه‌ن واقعێ ئه‌ڤرۆ وه‌ك په‌رییا نۆكه‌یه‌، هینگێ یان ئه‌و د ڤى واقعى دا نینن یان خوه‌دخاپینن و نه‌ڤێن خوه‌ د راستیێ بگه‌هینن؛ ژ به‌ر كو رابوونا رێژه‌یه‌كا به‌رچاڤا مۆچه‌خوه‌رێن ده‌ڤه‌را (به‌هدینان)ژى تایبه‌ت مامۆستا و نۆشدار وه‌ك دو چینێن گرنگێن جڤاكى؛ مینا ده‌ڤه‌رێن سۆران به‌رامبه‌ر ده‌ستهه‌لاتێ و داخوازكرنا مافێن خوه‌ یێن ره‌وا نه‌تشته‌كێ نۆرماله‌ كو بهێت په‌روایزكرن. پێدڤییه‌ سه‌ركرداتییا (پارتى) ب جددى لسه‌ر ڤێ وه‌رچه‌رخانا نوو د دیرۆكا به‌هدینان دا رابوه‌ستت و ل رێكێن چاره‌كرنا لۆژیكى و شارستانى و دوورى توندوتیژیێ بگه‌ڕیێت و بزانت كو ده‌وله‌ت سه‌رێ 27 سالێن سیسته‌مێ حوكمرانییا سه‌قه‌ت، كێر گه‌هشتییه‌ سه‌ر هه‌ستى، ژ به‌ر كو خلاس خوه‌نیشاندان و نه‌رازیبوون بوونه‌ كولتۆرێ ده‌ڤه‌ره‌كا به‌رییا روودانێ خه‌لكێ وێ تنێ ب دزى بۆ خوه‌ دئاخڤتن و پرانییا كادرو لایه‌نگرێن گه‌نده‌ل ئه‌ڤ واقعه‌ به‌ره‌ڤاژى بۆ خه‌لكه‌كى و سه‌ركرداتییا خوه‌ دياردكر و سه‌ركرداتیێ ژى ده‌ست بۆ وان كاله‌فام و بێوژدانان دقوتان و ره‌خه‌نه‌گر و وه‌فادارێن دژى دره‌وان ژى ب سه‌رداچۆیى و خائین دهه‌ژمارتن. دێ ڤێجا هڕكه‌نێ! ئه‌و ره‌فتارێن نه‌شارستانى یێن كو به‌رى دو رۆژان دگه‌رما خوه‌نیشاندانان دا دگه‌ل هنده‌ك مامۆستایان هاتینه‌ كرن ژ لایێ هنده‌ك پۆلیسێن ده‌ستهه‌لاتێڤه‌، وسا دیاردكه‌ت كو دێ ب ته‌په‌سه‌ركرن و تۆپزى راستیێ به‌رزه‌كه‌ن و ل به‌ر چاڤێن خه‌لكه‌كى مژداركه‌ن. گیان ئه‌و ده‌م قه‌شیا، ده‌وله‌تسه‌رێ شۆڕشا ته‌كنۆلۆژى و سینۆربه‌زین، نوكه‌ ئه‌و وه‌هم نه‌ما.. واته‌ هه‌كه‌ ده‌ستهه‌لات هه‌مى میدیایێن راگه‌هاندنێ قه‌ده‌غه‌ بكه‌ت ئه‌و نه‌شێت چاڤكێن كامیره‌یێن مۆبایلان كۆره‌كه‌ت كو هه‌ر كه‌سه‌كى نها جیهان هه‌مى زیندى (مباشر) د ده‌ستى دانه‌ و روودانان ب چركه‌یان وه‌ك شیانێن (ئه‌فریتێن سلێمان پێغه‌مبه‌ر)ى روودانان بۆ سه‌رانسه‌رى زه‌مینێ ‌ ڤه‌د‌گوهێزن! دانپێدانا ده‌ستهه‌لاتا هه‌رێمێ ب واقعى ده‌رمانه‌ و ره‌نگه‌ كو ژ ڤێ ته‌نگاڤیێ ده‌ربازبكه‌ت. هه‌لبه‌ت ئه‌ڤه‌ ژى هند ب ساناهى نابت. ل پێشیێ: دڤێت ده‌ستهه‌لاتێ ئیراده‌كا جددى هه‌بت و داهاتێ هه‌رێمێ ب شه‌فافى بۆ خه‌لكى دیاربكه‌ت و هه‌مى حزبێن هه‌رێمێ سه‌رپه‌رشتییا وى داهاتى بكه‌ن، هه‌تا كو هه‌لبژارتن دهێنه‌ ئه‌نجامدان. ل دووڤ وى داهاتى مووچه‌یێن مووچه‌خو‌ران بده‌نێ. ل وى ده‌مى باوه‌رناكم، هه‌كه‌ بۆ خه‌لكى باوه‌رى چێبوو كو ب راستا داهاتێ هه‌رێمێ ئه‌وه‌ یێ هه‌یى گه‌له‌ك نه‌رزایبن؛ هه‌كه‌ هه‌رئێكى بۆ نموونه‌: 15- 20% ژ مووچه‌یێ وى هاته‌ بڕین. یا دووێ: دڤێت هه‌مى سامانێن سروشتى راده‌ستى وه‌زاره‌تا سامانێن سروشتى ببن و ئه‌و ته‌سه‌رفێ تێدابكه‌ت و ئێدى بیرێن پترۆلێ یێن كه‌سۆكى نه‌مینن. یا سێیێ: ده‌مێ هه‌لبژارتنێن هه‌رێمێ ب زووترین ده‌م بهێـت دیاركرن و ده‌ستهه‌لات مایێ خوه‌ د سندۆقێن ده‌نگدانێ نه‌كه‌ت و ملله‌ت بریاڕا خوه‌ بده‌ت و رێز ل ئه‌نجامان بهێت گرتن. خالا دى: یه‌كه‌یێن هێزێن نها یێن پێشمه‌رگه‌ى بهێن هه‌لوه‌شاندن و له‌شكه‌ره‌كى نه‌ته‌وه‌یى و تنێ (وه‌لائا) وى بۆ كوردستانێ بت بهێت دامه‌زراندن دا كو به‌رگیریێ ژ هه‌ر خه‌ته‌ره‌كا نه‌خوازتى بكه‌ت. خالا چارێ: دڤێت پارتى و ئێكه‌تى و حزبێن دى ژى ئیراده‌كا جددى هه‌بت كو ب ده‌هان هزاران مووچه‌خورێن بندیواران نه‌هێلن داكو داهاتێ هه‌رێمێ تێرا ئیدارا وێ و كه‌سانێن هه‌ژى مووچه‌ى بكه‌ت. خاله‌كه‌كا دى: دڤێت ب زووترین ده‌م (ده‌سته‌یا نه‌زاهێ) ب دورستى رۆلێ خوه‌ ببینت و ل دووڤ میكانزما (ته‌ ئه‌ڤ سامان و ده‌ستكه‌ڤتییه‌ ژ كیڤه‌ هیناینه؟!‌) كاربكه‌ت و هه‌مى مالێ دزى و گه‌نده‌لى تێدا هاتییه‌ كرن بۆ گه‌نجینا هه‌رێمێ بزڤڕينن. ئه‌وا مایى من نه‌گۆتى، هه‌كه‌ ده‌ستهه‌لاتا هه‌رێمێ دانپێدانێ ب ڤى واقعى نه‌كه‌ت، ئه‌ز باوه‌ردكم دێ چاره‌نڤیسێ مه‌ ژى وه‌ك یێ سووریا و یه‌مه‌نێ و ده‌ڤه‌رێن دى یێن ف به‌ر بهارا عه‌ره‌بى كه‌تین لێ هێت و پاشى هینگێ چاره‌كرنا ره‌وشێ دێ بته‌ گازییا دووڤ گورگى و ره‌وش دێ به‌ره‌ڤ ئاراسته‌یه‌كا نه‌دیار چت و دێ بێژین خوه‌زیێن رۆژا گوینێ!

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.