داعش پڕۆژه‌یێ گوهۆڕینا دیرۆكێیه‌

عه‌بدوللا جه‌عفه‌ر كۆڤلی :

هندی كو دیرۆكا بسورمانه‌تیێیه‌، یاكو تژی سه‌روه‌ری و سه‌ركه‌ڤتن، د گه‌له‌ك ویستگه‌هاندا روودانێن جودا بخوه‌ڤه‌ دیتینه‌، ژ وان ژی؛ ده‌ركه‌ڤتنا گرۆپێن هشكباوه‌ر ب هزركرن و كریارێن خوه‌ كو دوورن ژ پره‌نسیپێن بسورمانه‌تیێ، چنكو ئه‌و یه‌ك د ئایه‌تێن قورئانێ و فه‌رمۆده‌یێن پێغمبه‌ریدا ئاشكرایه‌ كو دخوازن ناڤه‌ندگه‌ری و نه‌رمی و بۆچوونا یێن دیتر بهێته‌ وه‌رگرتن، دیاربوونا وان كۆمان، سه‌ختترین سه‌رده‌م بخوه‌ڤه‌ دیتن ژ كوشتن و بنده‌ستكرن و وێرانكرن و سۆتنا هه‌ر تشته‌كێ ژیانا مرۆڤان لسه‌ر هاتبیته‌ ئاڤاكرن، زێده‌باری وێرانكرنا هه‌ر تشته‌كێ په‌یوه‌ندی ب ئاڤه‌دانییا شارستانییه‌تا دیرۆك و چه‌ڤه‌نگ و زانستێن جوداڤه‌ هه‌یی.
د چوارچۆڤه‌یێ رێزبه‌ندییا ڤان هه‌موو كۆماندا، ئه‌ڤ كۆما ژ رێ ده‌ركه‌ڤتی كو ناڤێ خوه‌ كرییه‌ (داعش) كو كورتكرییا ناڤێ (ده‌وله‌تا ئیسلامی ل ئیراقێ و شامێ)ـێیه‌، ئه‌و ژبه‌ر هنده‌ك ئه‌گه‌رێن جودا شییا ده‌ستێ خوه‌ دانیته‌ سه‌ر ئه‌رده‌كێ به‌رفره‌هـ ل ئیراقێ و سووریێ و ده‌ستهه‌لاتا خوه‌ لێ بجهـ بكه‌ت، و خوه‌ بهه‌ژمێریت وه‌ك نوونه‌را شه‌رعییا وه‌لاتییان، رابوویه‌ ب بجهكرنا ناڤه‌رۆكا ئایه‌تێن قورئانێ و فه‌رموده‌یێن پێغمبه‌ری (هه‌ر وه‌كو ئه‌و دبێژن)، لێ ئه‌و یه‌ك گه‌له‌ك دووره‌ ژ باوه‌ریێن دینێ بسورمانه‌تیێ، چنكو وێ ده‌وله‌تا خوه‌ لسه‌ر كلۆخ و خوون و ره‌نگێن جودا یێن كوشتن و سه‌رژێكرن و خاچكرنا مرۆڤان لپێش چاڤێن مرۆڤان دانایه‌، زێده‌باری بڕینا ده‌ست و پێیان ب به‌هانه‌یێن گه‌له‌ك بێ مانا، به‌رنامه‌یێ وان ب ڤێ یه‌كٍێ ژی نه‌راوه‌سیا، رابوون ب به‌رنامه‌ و نه‌خشێن خوه‌، مرۆڤان ژ بۆریێ وی دشوون و ناڤه‌رۆكا دیرۆكا مرۆڤایه‌تیێ شێلی دكه‌ن، ئانكو ئه‌و رابوون ب وێرانكرنا مزگه‌فت و دێر و جهێن په‌رستنا خودێ كو دیرۆكا وان بۆ به‌ری ب سه‌دان سالان ڤه‌دگه‌رییا، هه‌روه‌سا رابوون ب وێرانكا قه‌برێن پێغمبه‌ر و ئیمامان كو خودێ ئه‌و پێغمبه‌ر و ئیمام بۆ نیشاندانا رێیا راست بۆ مرۆڤان هنارتبوون، ل ڤێ دوماهیێ ژی، رابوون ب وێرانكرنا هه‌موو شوونوار و موزه‌خانه‌یان كو گرێدانا وان یا دیرۆكی هه‌ڤبه‌نده‌ ب بابوباپیرێن وان بخوه‌ڤه‌ كو وان هه‌موو رێز بۆ دگرتن و ئه‌و دپاراستن، ئه‌م ژی شانازیێ ب وان ده‌ستكه‌ڤتێن مرۆڤاتیێ یێن كو مرۆڤێن به‌رێ چێكرین دكه‌ین، چنكو وان خزمه‌ته‌كا هێژا پێشكێشی مه‌ كرییه‌، تاكو ئه‌م گه‌هشتینه‌ رۆژا ئه‌ڤرۆ، له‌و ئه‌م وه‌سا دبینین كو ڤه‌ڕوونا مرۆڤان ژ دیرۆك و بۆریێ وان، ڤه‌گه‌راندنا وانانه‌ بۆ ده‌ستپێكا دیرۆكێ.
هندی ئه‌ردێ ئیراقێیه‌، وه‌سا دهێته‌ دیتن كو ل هه‌موو سه‌رده‌مان، لاندكا دیرۆكا مرۆڤایه‌تێ بوویه‌، لێ لسه‌رده‌مێ داعشێ، بوویه‌ ئیراقه‌كا بێی دیرۆك كو مه‌ره‌ما وان پێ ئه‌وه‌ مرۆڤه‌كى چێبكه‌ن یێ ڤه‌روو ژ هه‌موو به‌هایێن دیرۆكێ، داكو ئه‌و گرێدایی بۆریێ خوه‌ نه‌بن، ئانكو داكو ئه‌و بشێن ب رێیا ریهێن خوه‌ یێن درێژ و ده‌رسوكێن ره‌ش و نه‌خشێن خوه‌، مرۆڤێ سه‌رده‌م بكه‌نه‌ ئێسیرێ خوه‌، وان دڤێت مرۆڤێ نهۆ ژ هه‌موو جیهانا ده‌رڤه‌ دابڕن، هه‌موو زانست و هێلێن جودا یێن په‌یوه‌ندیكرنێ دگه‌ل ده‌رڤه‌، ئه‌و وه‌سا به‌رێ خوه‌ دده‌نێ كو د حه‌رامن، لێ ئارمانج و كارێن داعشێ یێن ژ رێ ده‌ركه‌ڤتی، سیاسینه‌ و ب ناڤێ دینی كو دڤێت هه‌موو شارستانییه‌تا ئیراقێ ئه‌وا مرۆڤان لسه‌رده‌مێن بۆری پێشكێشكری، ژناڤببه‌ن.
ئه‌وا مه‌ لسه‌ری نڤیسی، داعشێ دڤێت بجهـ بكه‌ت، لێ ئه‌و خه‌ونێن رۆژێنه‌ و نه‌شێت بكه‌ته‌ راستی، هندی كو ئه‌و كوشتنێ و وێرانكاریێ دژی مرۆڤان بكه‌ت، ئه‌و نه‌شێت مرۆڤان ژ دیرۆك و بۆریێ وان بشووت، چنكو ئه‌و لسه‌رده‌مێ كورت دێ ژین و دێ ل نێزیك ژناڤچن، پاشان دێ جاره‌كا دیتر ژیان ڤه‌گه‌ریت بۆ سه‌رده‌مێن خوه‌ یێن زێرین و دیرۆك دێ نه‌فره‌تان ل تاریپه‌رێسان كه‌ت. ژ كه‌ڤن وه‌ره‌، ململانێ د ناڤبه‌را راستیێ و نه‌راستیێدا هه‌یه‌، لێ هه‌كه‌ هنده‌ك سه‌رده‌مان بۆ ماوه‌یه‌كێ كورت نه‌راستی بسه‌ر راستیێ كه‌ڤتبیت ژی، رامانا وێ ئه‌و نینه‌ كو ئه‌و دروسته‌، لێ ئه‌و هندێ دگه‌هینیت كو وانه‌ بن بۆ مفاوه‌رگرتنێ، ب كار و كریارێن خودان خێران، ئه‌و دێ حه‌لیێن و ژناڤچن، ئێكده‌ستی و ئێككار، دێ ل رۆژانێن بهێن ب هێزا خودایێ ئێك ئه‌ڤ یه‌كه‌ دیاربیت.
*ماسته‌ر ب قانوونا نێڤده‌وله‌تی
[email protected]

بابه‌تێن ب ڤێ مژارێ ڤه‌ گرێدای