داعش هه‌ر کچه‌كا ئێزدی ب هزار دۆلاران دفرۆشیت

داعش هه‌ر کچه‌كا ئێزدی ب هزار دۆلاران دفرۆشیت

Capture

وار – دهۆک :

روانگەیا سوور بۆ مافێن مرۆڤى راگەهاند کو رێکخراوا دەولەتا ئیسلامی ناسیار ب (داعش) د حه‌فتیێن بۆرى دا 300 کچێن ئێزدی ب سەر ئەندامێن رێکخراوا خوه‌ ل سووریا پارڤه‌كرینه‌، لسەر بنەمایێ وێ ئێكێ كو ئەو کچە سەبایینه‌ و ژ دەسکەڤتێن شەڕینه‌ دگەل کافران.
روانگەیا مافێن مرۆڤى د بەیاننامەیەکێ دا کو وێنەیەک ب دەست ئاژانسا دی پی ئەی یا ئەلمانی کەڤتییە، راگەهاند، کو چەندین حالەتێن ب ڤى ره‌نگى دیکیۆمێنت کرینە، کو چەکدارێن ڤێ رێکخراوێ ئەو کچێن ڕه‌ڤاندین فرۆتینە چەند چەکدارێن دى یێن ڤێ رێكخراوێ ب گوژمه‌یێ 1000 دۆلارێن ئەمریکی بۆ هەر ژنه‌كێ، ئه‌و ژى پشتى وه‌سا هاتییه‌ به‌لاڤكرن كو ئه‌و كچه‌ بوویه‌ بسورمان، بۆ وێ ئێكێ هه‌ڤژینیێ دگه‌ل چه‌كدارێن وان پێكبینن ل همبه‌رى دانا گوژمه‌یه‌كێ پاره‌ى ب وان چه‌نكدارێن كو دبێژین ”ئه‌و كچه‌ ب پارێزن خوه‌ كڕینه‌”.
روانگەیا مافێن مرۆڤى باس ژ وێ ئێكێ ژى دكه‌ت، كو 27 حالەت تۆمارکرینە سەبارەت ب وان کچێن کو هاتینه‌ فرۆشتن و داینه‌ شوو ب چه‌كدارێن داعش ل دەشتا باکوورێ رۆژهەلاتا حەلەب و دەشتێن رەقە و حەسەکە.
هه‌مان روانگە ئاشكرا ژى كرییه‌، كو بەرى سێ حه‌فته‌یان چەندین کەسایەتیێن کورد و ئه‌ەرەبێن ده‌ڤه‌را شەدادى ل دەشتا باشوورێ باژێڕێ حەسەکێ بزاڤكرینه‌ گوفتوگۆیێ دگەل چەکدارێن داعش بکەن، داكو ل همبه‌رى پێدانا گوژمه‌یه‌كێ پاره‌ى وان كچان ژێ بکڕن و پاشان ئازادبكه‌ن و ڤه‌گه‌ڕنه‌ڤه‌ د ناڤ كه‌سوكارێن خوه‌ دا، هەرچەندە وان داعش راگەهاندییە کو وان دێ وەک کەنیزەک بکارئینن.
روانگەیا سوور بۆ مافێن مرۆڤى ب تووندا ئیدانەیا ڕه‌ڤاندنا کچ و ژنێن ئێزدییان کرییە و فرۆتنا وان ژى وه‌كو وێ ئێكێ كو كه‌رسته‌یه‌كێ بازرگانى بن، شەرمزار دکه‌ت، د ده‌مه‌كى دا گەلێ سووریا زێده‌تر ژ 40 مه‌هانە شۆڕشێ دکه‌ت، داكو ژ دەستی کۆیلایەتی و سته‌م و زۆردارى دەربچیت و بگه‌هتە وه‌لاته‌کێ ئازاد و دیمۆکرات و دادپەوەر و وه‌كهه‌ڤى.
ژ ئالییه‌كێ دى ڤه‌، وەزارەتا کاروبارێن شەھیدان و ئەنفالکرییان یا حوکمەتا ھەرێما کوردستانێ و دگه‌ل نوونەرایه‌تیێن حوکمەتێ ل وه‌لاتێن ئۆرۆپا، دخوازن دۆسیەیا شنگالێ ب جینۆساید بناسینن، وەزارەتا شەھیدان ژى دبێژیت، “ژبه‌ر ئەنفالێ کارکرن بۆ ڤێ کەیسێ ده‌مێ کێمتر دڤێت”.
فواد عوسمان ئاخڤتنكه‌رێ وەزارەتا کاروبارێن شەھیدان و ئەنفالکرییان یا حوکمەتا ھەرێما کوردستانێ بۆ (باس) راگەهاند، ”پشتى بڕیارا ئەنجومەنێ وەزیران لدۆر ڤێ ئێكێ، نوكه‌ لیژنەیەکا بلند ل ئەنجومەنێ وەزیران ب سەرۆکایەتییا مەحموود حاجی سالح وەزیرێ کاروبارێن شەھیدان و ئەنفالکرییان و وەزیرێ کار و سەرۆکێ فەرمانگەها پەیوەندییان و لێپرسراوێ قانوونیێ ئەنجومەنێ وەزیران پێکھاتییە و کار لسەر ڤێ دۆسیەیێ دکەن”. گۆتژی، “مه‌ وەکو وەزارەت وەرەقەیەکا کارى به‌رهه‌ڤكرییه‌، داكو گوفتوگۆیێ بکەین و ھیلێن سه‌ره‌كى ژى دیاربكه‌ین”.
ئاماژە ب وێ ئێكێ ژى دا، ”بۆ کۆمكرنا بەلگێن پێدڤى، شانده‌کێ وەزارەتا وان سەره‌دانا خەلکێ شنگالی ل دھۆکێ کرییە”. گۆتژی، “لدووڤ ماددەیێ 11ێ یێ قانوونا دادگه‌ها بلندا تاوانێن ئیراقێ، ئه‌ڤا شنگالێ جینۆسایدە، لێ ب تنێ ئه‌و هند دێ مینیت كو ب باشی دیکیۆمێنتان کۆمبکەین و دیده‌ڤانان ژى چاڤپێكه‌ڤتنان دگه‌ل بكه‌ین”.
دیاركر ژى، ب جینۆسایدناساندن کاره‌کێ دۆمدرێژ و پێدڤى ب ده‌مه‌كێ زێده‌ هه‌یه‌، لێ گەلێ کورد بۆ کەیسێن دى وەکو ئەنفال و کیمیاباران و جینۆسایدا بارزانییان و کوردێن فەیلی، ژبه‌ر وێ ئێكێ ل دادگه‌ها بلندا ئیراقێ ب جینوساید هاته‌ نیاسین، ئه‌و كاره‌ ب ساناهى ئێخست”.
ناڤهاتى ئه‌و ئێكه‌ ژى گۆت: “هه‌كەر کەیسا شنگالێ د ئاستێ نێڤدەولەتی دا ب جینۆساید هاتییه‌ نیاسین، ئه‌ڤه‌ دێ پێنگاڤه‌كا باش بیت، داكو ئه‌م ل دادگه‌هێن ده‌مه‌نى داخوازا قه‌ره‌بوویێ بۆ وان بكه‌ین و بێ گومان، پێنگاڤا پشتى ناساندنێ، دێ قەرەبووکرن بیت”.
ژبال خوه‌ڤه‌ دلاوەر خالد ئاژگەیی، نوونەری نوونەرایەتییا حوکمەتا ھەرێما کوردستانێ ل ئێكه‌تییا ئۆرۆپا، گۆت: ”نوونەرایەتییا مه‌ ل برۆکسل، لبه‌ره‌ پرسا کۆمکوژییا کوردێن ئێزدی و وه‌لاتیێن کریستییان ژبال داعشان ڤه‌، بگه‌هیننه‌ پەرلەمانێ ئۆرۆپا و بخوازین ڤێ پرسێ ب ئاوایه‌كێ فەرمی وەکو جێنۆساید بهێته‌ نیاسین”.
د ناڤ هه‌رێما كوردستانێ ژى دا، ھەر ئێک ژ فڕاکسیۆنێن زەر و كه‌سك ل پەرلەمانێ کوردستانێ، پڕۆژەقانوون سەبارەت ب کارەساتێن مرۆڤی و کۆمکوژییا ئێزدی و مەسیحییان و ب جینۆساید ناساندنا وان پێشکێشى په‌رله‌مانى كرینه‌.

بابه‌تێن ب ڤێ مژارێ ڤه‌ گرێدای