وار – دهوك :
خیانه‌تكرنا ژنان ژ زه‌لامێن وان ب تنێ ئێك جۆر نینه و لدووڤ ده‌م و جهـ و جۆرێ خیانه‌تێ دهێته گوهۆڕین، ئانكو ئه‌و خیانه‌تا ژ بال ژنان ڤه ل همبه‌رى زه‌لامێن وان دهێته‌كرن، ب تنێ ئێك جۆر نینه و د ئێك ده‌م و جهـ ژى دا نینه، به‌لكو چه‌ند جۆره‌ك هه‌نه. ئه‌ڤێن ل خوارێ ژى به‌ربه‌لاڤترین جۆرێن خیانه‌تێنه د جیهانێ دا:
1ــ خیانه‌تا سۆزداریێ:
ئه‌ڤ جۆره ژ خیانه‌تێ زێده‌تر د ده‌مه‌كى دایه كو وێ ژنێ هه‌ست و سۆز و حه‌زژێكرن بۆ كه‌سه‌كێ دى هه‌یه و د هه‌مان ده‌م دا دگه‌ل زه‌لامێ خوه ژى ژیانێ دبه‌ته سه‌رى، ئانكو ئه‌ڤ ژنه د خێزانا خوه دا و دگه‌ل زه‌لام و زاڕۆیێن خوه دژیت، لێ وێ دل لسه‌ر زه‌لامێ خوه نینه، به‌لكو هه‌مو هه‌ست و سۆز و ڤیانا وێ بۆ زه‌لامه‌كێ دى نه كو په‌یوه‌ندیێن دروست دگه‌لدا نینن.
2ــ خیانه‌تا سێكسی:
ئه‌ڤ جۆرێ خیانه‌تێ د ده‌مه‌كى دایه كو وێ ژنێ چو كێشه د گه‌ل زه‌لامێ خوه دا نینن، لێ مه‌ره‌ما وێ ژ ڤێ خیانه‌تكرنێ ئه‌وه كو زێده‌تر حه‌زێن خوه یێن سێكسى تێربكه‌ت، ئانكو دگه‌ل وێ ئێكێ كو په‌یوه‌ندیێن وێ ب زه‌لامێ وێ ڕا باشن و په‌یوه‌ندییا سێكسى به‌رده‌وام دگه‌ل ئێكدو هه‌یه، لێ ئه‌و ب وێ په‌یوه‌ندییا سێكسییا دگه‌ل زه‌لامێ خوه ب تنێ تێرنابیت، ئه‌ڤجا ژبه‌ر ڤێ ئێكێ په‌نایێ دبه‌ته به‌ر گرێدانا په‌یوه‌ندییان دگه‌ل كه‌سه‌ك یان چه‌ند كه‌سه‌كان ژده‌رڤه‌ى خێزانا خوه، داكو ب رێیا وێ په‌یوه‌ندیێ حه‌زێن خوه یێن سێكسى تێربكه‌ت، له‌و ئه‌ڤه ژى ب جۆره‌كێ خیانه‌تا ژنێ ل همبه‌رى زه‌لامێ وێ دهێته هه‌ژمارتن.
3ــ خیانه‌تا تۆلڤه‌كرنێ:
ئه‌ڤ جۆرێ خیانه‌تێ ژى د ده‌مه‌كى دایه كو ئه‌و ژنه هه‌ستبكه‌ت كو هه‌ڤژینێ وێ خیانه‌تێ لێ دكه‌ت، ئه‌ڤجا ژبه‌ر وێ ئێكێ ئه‌و ژى ب خیانه‌تكرنێ تۆلا خوه ژ هه‌ڤژینێ خوه ڤه‌دكه‌ت، ئانكو وه‌كو هه‌ڤڕكى و ململانه‌كێ د ناڤبه‌را وان دا په‌یدادبیت و ژن دبێژیت ماده‌م ئه‌و خیانه‌تێ دگه‌ل من دكه‌ت و په‌یوه‌ندییان دگه‌ل ژنان گرێدده‌ت، ئه‌ز ژى دێ په‌یوه‌ندییان دگه‌ل زه‌لامان گرێده‌م و تۆلێن خوه ژ وى ڤه‌كه‌م.
4ــ خیانه‌تا سه‌رخوه‌شیێ:
ئه‌ڤ جۆرێ خیانه‌تێ زێده‌تر د وان رۆژان دا روودده‌ت كو مه‌ى ڤه‌دخۆن و ئاگه‌هـ ژ خوه نامینیت، پشتى هینگێ بێى خواستا خوه خیانه‌تێ ل هه‌ڤژینێن خوه دكه‌ن (ئه‌ڤ ئێكه زێده‌تر لده‌ف ژنێن رۆژئاڤایى په‌یدادبیت، ئه‌و ژى لگۆره‌ى وێ ئێكێ كو ئه‌و به‌رده‌وام مه‌ى ڤه‌دخۆن). ئانكو ژن د بارێ مه‌ستبوونێ دا كریارا سێكسى د گه‌ل هنده‌ك زه‌لامێن دى دا ئه‌نجامدده‌ت و خیانه‌تێ ل هه‌ڤژینێ خوه دكه‌ت.
5ــ خیانه‌تا ناڤه‌ندا ژیێ مرۆڤى:
ئه‌ڤ جۆرێ خیانه‌تێ د وان جۆرێ ژنان دا هه‌یه كو هه‌ر د ژیێ زاڕۆكینیێ دا ب شووداینه و زاڕۆ بووینه، پشتى هینگێ د ژییه‌كێ مه‌زنتر دا هه‌ست ب وێ ئێكێ دكه‌ن كو چو خوه‌شى و تامه‌ك ژ ڤیان و ژیانا خوه یا ژناتیێ نه‌دیتییه، ئه‌ڤجا ژبه‌ر ڤێ ئێكێ د وى ژیێ خوه دا كو گه‌هشتینه قۆناغه‌كا ناڤنجى، ژنوو دێ بزاڤێ كه‌ن كو ژده‌رڤه‌ى خێزانێ په‌یوه‌ندییان دگه‌ل زه‌لامێن بیانى گرێبده‌ن و ئه‌و حه‌ز و ئاره‌زۆیێن هه‌ین ب رێیا وان بجهـ بینن و تێربكه‌ن.
6ــ خیانه‌تا ژنا خه‌یالى:
گه‌له‌ك ژ وان ژنێن كو خه‌یالینه، زه‌لامه‌ك هه‌یه د مێشكێ وان دا كو ب سوارچاكێ خه‌ونێن خوه ناڤ دبه‌ن، لێ پشتى كو شوو دكه‌ن، كه‌سه‌كى دناسن كو هه‌ستدكه‌ن ئه‌و سوارچاكه‌یه، هه‌ر ژبه‌ر ڤێ ئێكێ ژى خیانه‌تێ ل زه‌لامێن خوه دكه‌ن، ئانكو ژده‌رڤه‌ى خێزانێ په‌یوه‌ندییان دگه‌ل وى زه‌لامى دا گرێدده‌ن كو ب سوارچاكێ خوه دبینن.
ئه‌ڤه شه‌ش جۆر ژ وان خیانه‌تان بوون كو ژن د ده‌م و جهێن جودا ل زه‌لامێن خوه دكه‌ن، دبیت گه‌له‌ك جۆرێن دى یێن خیانه‌تا هه‌ڤژینیێ هه‌بن كو ژن ل دژى زه‌لامێن خوه بكاربینن، لێ دگه‌ل ڤێ ئێكێ ژى دڤێت بزانین كو هه‌ر دو ره‌گه‌ز دوور نینن ژ خیانه‌تا هه‌ڤژینیێ، ئانكو زه‌لام ژى خیانه‌تێ ل ژنێن خوه دكه‌ن كو د جڤاكێن رۆژهه‌لاتى دا خیانه‌تا زه‌لامێ ب تشته‌كێ ئاسایى یان بچووك دهێته دیتن، لێ هه‌ر ده‌ما ژن تووشى شاشییه‌كێ یان خیانه‌ته‌كێ ل همبه‌رى هه‌ڤژینێ خوه بوو، دێ ئه‌و ب كه‌سه‌كا بێ نامووس و ده‌همه‌نپیس هێته ناڤكرن.
