خيانه‌تا كوردان و تفا سه‌رئه‌ڤراز!

 

((ئه‌ى پرۆتس: هه‌تا توژى…))

يۆليۆس قه‌يسه‌ر

ته‌حسين ناڤشكى

رنگه‌ پتر ژ 14 خيانه‌تێن ديرۆكى يێن ناڤدار هه‌بن كو كاروانێ ديرۆكێ گوهه‌ڕتبت، لێ كارتێكرنا خيانه‌تا ((پرۆتسێ)) براماكێ ((يۆليۆس قه‌يسه‌ر))ى رۆمێ ب ديتنا وى لێكرى، ده‌مێ گه‌هشتييه‌ گوپيتكا دكتاتۆريێ و هه‌ڤپه‌يمانى دگه‌ل جڤاتا پيران كرى و ب ده‌ستێ خوه‌ قه‌يسه‌رێ مام كۆشتى مه‌زنترين خيانه‌ته‌.. دهێته‌ ڤه‌گێڕان كو د وێ گاڤێ دا ده‌مێ ((يۆليۆس قه‌يسه‌ر)) ب دربێ برازاى كه‌تى، ژێهه‌ل ته‌ماشه‌كر و گۆتێ: ((ئه‌ى پرۆتس: هه‌تا توژى..)) مه‌به‌ست ژ وێ ئاخاڤتنا د سه‌كه‌راتێ دا ته‌مام نه‌كرى ئه‌و بوويه‌ كو وى هند باوه‌رى هه‌بوويه‌، هه‌كه‌ هه‌مى خيانه‌تێ ل وى بكه‌ن ((پرۆتس)) ل وى ناكه‌ت! پاشى خيانه‌تا ((مير جه‌عفه‌ر))ێ هندستانى ل رێزبه‌ندا دووێ دهێت، ده‌مێ كورسى بۆ خوه‌ ڤياى و ل جه‌نگا ب ناڤێ ((پلاسى)) ناڤدار، لناڤبه‌را هندستانا رۆژهه‌لات كو بريتانييا هينگێ ئه‌و ده‌ڤه‌ر داگير كربوو و مه‌غۆلێن بوسرمان، وى ميرى خوه‌ دايه‌ دگه‌ل بريتانيا و خيانه‌تكرى، پشتى هينگێ بريتانيا 200 سالان حوكم ل وان ده‌ڤه‌رێن ب ناڤێ به‌نگال – سند و هندستانێ كرى.‌ هه‌كه‌ خيانه‌تا هنده‌ك گه‌لێن جيهانى جاره‌ك بت يان دوسێجاربن، واته‌ رێژه‌يه‌كا كێمه‌، هه‌كه‌ ئه‌م هه‌ڤبه‌رى خيانه‌تا كوردان بكه‌ين كو د درێژييا ديرۆكێ دا، تايبه‌ت ل ده‌مێ مێرنشينێن كوردى لژێر ده‌ستهه‌لاتا ئمپراتۆريێن ئۆسمانى و سه‌فه‌وى دژى هه‌ڤدو كرى، ره‌نگه‌ رێژه‌يا وێ پتر خيانه‌تبت و ئه‌گه‌ره‌كى سه‌ره‌كيبت كو كورد د ناڤ جيۆگرافييا ده‌ڤه‌رێ دا هه‌تا نها بێ وه‌لاته‌ك سه‌ربه‌خۆ و هه‌رده‌م دووڤه‌لانكێن بيانى و داگيركه‌ران ماين. واته‌ هه‌ر د ئه‌زلدا خيانه‌ت و ئه‌زينى و (ته‌فشۆيێ به‌رێ خوه‌) ژ ره‌فتارێن سه‌ره‌كى يێن كوردان بووينه‌ دگه‌ل هه‌ڤدو كرين. ژ ديرۆكا درێژا كوردان ديار دبت كو هه‌ر ده‌مێ ئالييه‌كێ ئاليێ دى ب خيانه‌تكاريێ تاوانباركرييه؛‌ هينگێ تفا وى ئالى سه‌رئه‌ڤراز چۆيه‌ و جاره‌ك دى ب ناڤچاڤێن وى ئالى كه‌تييه‌ و هه‌تا نهاژى ئه‌ڤ ديمه‌نه‌ به‌رده‌وامه‌؛ ژ به‌ر كو ژ پارچه‌كرنا كوردان د ناڤبه‌را چار وه‌لاتان دا خويا دبت كو چو ئالى ژ خيانه‌تێ بێبه‌هر نه‌بووينه‌. ئاڕيشه‌ ئه‌وه‌ كو هه‌ر ئالييه‌ك فه‌توايان بۆ حه‌لالكرنا خيانه‌تا خوه‌ لێدده‌ت و بۆ خوه‌ حه‌لال دكه‌ت و خوه‌ ب نه‌ته‌وه‌پارێز و وه‌فادار و نوونه‌رێ كوردان ديار دكه‌ت و ئاليێ دى ب خائين و خوه‌فرۆش دده‌ته‌ نياسين! ئه‌ڤه‌ ل ده‌مه‌كى كو هه‌ر گرۆپه‌كێ سياسى يێ كوردى ل هه‌ر ده‌ڤه‌ره‌كا كوردستانێ بت؛ هه‌كه‌ دگه‌ل ئالييه‌كى يان پتر ژ ئالييه‌كێ دژمن و داگيركه‌رێن كوردستانێ نه‌بت نه‌شێت خوه‌ خودان بكه‌ت و كێمترين ئيمان دێ ئاواره‌ بته‌ ده‌وله‌ته‌ك دوور و كوردينييا خوه‌ ل ده‌ربه‌ده‌ريێ برێڤه‌بت. ئانها ژى ئه‌و گرۆپێ سياسى، چ چه‌كدارى يان مه‌ده‌نى ل هه‌ر ده‌ڤه‌ره‌كا كوردستانێ بت په‌يوه‌ندى دگه‌ل داگيركه‌رێ پارچه‌يا دى يا كوردستانێ يان پتر نه‌بت، نه‌شێت خه‌باتا خوه‌ د كوردستانێ دا بكه‌ت. به‌رى سه‌رهلدانێ، هه‌كه‌ حزبێن هه‌رێما كوردستانێ په‌يوه‌ندى دگه‌ل ئيرانێ و سۆريێ و ره‌نگه‌ تركيا ژى نه‌بان نه‌دكارين خه‌باتا خوه‌ دژى رژێما سه‌ددامى بكه‌ن. هه‌ر وه‌سا حزبێن باكور ژى هه‌كه‌ په‌يوه‌ندى دگه‌ل ئيرانێ و ئيراقێ و سۆريێ نه‌بان نه‌دكارين خه‌باتا خوه‌ دژى تركيا بكه‌ن. نها ژى هه‌ر ئه‌و بازاڕه‌، هه‌رێما كوردستانێ پارتى و هنده‌ك حزبێن دى دگه‌ل تركيانه‌ و ئێكه‌تى و گۆڕان و هنده‌ك حزبێن دى، دگه‌ل ئيرانێ و ئيراقێ و سۆريێنه‌. ل ره‌خێ دى ره‌نگه‌ په‌كه‌كه‌ و حزبێن دى دگه‌ل ئيرانێ و ئيراقێ و سۆريێنه‌… هتد ئاڕيشه‌يا حزبێن كوردى ئه‌وه‌ كو هه‌ر ئێك يێدى ب خيانه‌تێ تاوانبار دكه‌ت و ره‌نگه‌ هه‌ر ئێك ژ يێدى پتر (مماره‌سا) خيانه‌تێ دكه‌ت. ره‌وشا ڤى ژيوارێ كه‌ڤن و نوو بيرا من ل په‌ندا پێشيان دهينت ((قڕێ گۆته‌ كه‌وى تۆكه‌كا ره‌ش يا ل ستۆيێ ته‌)) راستييا وێ قڕ يان (قه‌ل) ب خوه‌ يا ره‌شه‌، تنێ كه‌وى ب وێ تۆكا ره‌شا ل حه‌فكێ ب ره‌شاتيێ تاوانبار دكه‌ت! ڤێجا مه‌سه‌لا كوردان ژى ئه‌ڤه‌يه‌، هه‌ر ده‌مێ ئالييه‌كى شكه‌ستنخوار دێ ب دووربين و هووربينێن خيانه‌تكاريێ و تيۆرييا پيلانگێريێ گرۆپێ دى يێ نفشێ خوه‌ ل قه‌له‌مده‌ت. نێزيكترين هه‌لوه‌ست هه‌لوه‌ستێ 16ى ئوكتۆبه‌رێ بوويه‌ كو هه‌تا نها هه‌ردو ئاليێن سه‌ره‌كى ل هه‌رێما كوردستانێ كو ((پارتى و ئێكه‌تينيه‌)) پشتى ژ ده‌ستدانا پتر 50% ژ ئاخا كوردستانا باشوور هه‌ڤدو ب خيانه‌تێ تاوانباردكه‌ن، بۆ زانين هه‌تا نها نه‌ پارتى و نه‌ ئێكه‌تى به‌رهه‌ڤ نينن به‌رامبه‌ر په‌رله‌مانى يان ل هه‌ر جهه‌كێ دهى روونن و راستيێ بۆ ديرۆكێ ديار بكه‌ن، كانێ كيژ وان خائينه‌ و كيژ وان وه‌فاداره‌ يان چو ئالى ژ خيانه‌تێ بێ به‌هر نينن؟! ئه‌وا ژ هه‌ميێ مه‌نده‌هۆشتر! ئه‌وه‌ كو رۆژانه‌ هه‌ردو ئالى وه‌ك هێزێن سه‌ره‌كى يێن ده‌ستهه‌لاتا فيڤتى – فيڤتى ل هه‌رێمێ پێكهيناى پێكڤه‌ كۆمبوونان دكه‌ن و رادبن و دروون كو وه‌سا خوه‌ ديار دكه‌ن ئه‌و كاره‌ستا وان ب ده‌ستێن خوه‌ ب سه‌رێ ڤى ملله‌تى هيناى دێ چاره‌ كه‌ن، هه‌ر وه‌كى چو نه‌بوويى و خوه‌ د ڤێ مژارێ ناگه‌هينن؛ وه‌سا هزر دكه‌ن كو خه‌لكه‌ك ده‌به‌نگه‌ و راستيێ نزانن كو هه‌ر ئێك ژ وان ب نهێنى يێ كار بۆ به‌رژه‌وه‌نديێن به‌رته‌نگێن حزبا خوه‌ كاردكه‌ن و په‌يوه‌ندييان ب هێزێن ئه‌قليمى و ناڤخوه‌يى دكه‌ن دا كو برايێ خوه‌ بشكێنت و رسوا بكه‌ت. پرسيار ئه‌وه‌: كێ دێ باوه‌رى ب ڤان ئالييان هه‌بت كو وان بپارێزت و كيانێ سياسى يێ ده‌وله‌تێ ب ده‌ستڤه‌ بينن؟

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.