WAAR-دهۆك:
خوه‌نیشاندانێن ئیراقێ ئه‌ڤرۆ بۆ رۆژا بیست و ئێكێ ل به‌غدا و هه‌ژماره‌كا پارێزگه‌هان به‌رده‌وامن، ل گۆری زانیاریێن وار تنێ ل به‌غدا هێزێن ئێمناهیێ سیهـ و دو خوه‌نیشانده‌ر بریندار كرینه.
سه‌لاح بامه‌رنی په‌یامنێرێ وار ل به‌غدا دیاركر، ئه‌ڤرۆ سپێدێ خوه‌نیشاندان ل به‌غدا به‌رده‌وامن تایبه‌ت ل نێزیكی پرا سنك و مه‌یدا خه‌لانی، هێزێن ئێمناهیێ ژی بزاڤا سنۆردار كرنا خوه‌نیشانده‌ران د مه‌یدانا ته‌حریر دا دكه‌ن.
په‌یامنێرێ وار ئاماژه‌كر، ل مه‌یدانا خه‌لانی هێزێن ئێمناهیێ بۆمبێن گازا رۆند رێژ بكارئیناینه و ژ به‌رێ سپێدێ تا نها سیهـ و دو خوه‌نیشانده‌ر بریندار بووینه.
ل پارێزگه‌ها زیقار ژی شه‌ر و پێكدادان د ناڤبه‌را خوه‌نیشانده‌ر و هیزێن پۆلیسان دا هه‌یه و خوه‌نیشانده‌ر مالێن به‌رپرسان د سۆژن، مالا به‌رپرسه‌كێ وه‌زاره‌تا په‌روه‌ردێ و په‌رله‌مانتاره‌كێ ئیراقێ هاتنه سۆتن.
ل ده‌مه‌كی ل پارێزگه‌ها به‌سرا پێلا نه‌رازیبوونێ به‌رده‌وامه، خوه‌نیشانده‌ران رێكێن سه‌ره‌كی بۆ فاو گرتینه.
