خه‌له‌تییه‌كا کوژەک د رەفتارا داعشێدا

 

غیاسه‌دین نەقشبەندی :

ب گوهۆڕینا گۆتارا سیاسییا ئەمریکی و بنبارکرنا تورکیا لبن پێدڤیاتیێن هه‌رێمی، داعش دچیتە د قۆناغا دووێدا، قۆناغا دووێ ژی کارتێکرنەکا مەزن تێدا هاتەکرن، چنکو پێشمەرگە شییا بەرگرییەکا دیرۆکی ژ خاکا کوردستانێ بکەت. کۆبانێ ب شێردلییا خوه‌، ترازییا هێزێ گوهۆڕی، و ئاسنێ داعشێ ئەوێ نەدچەمییا، ب ساری چەماند، راستە هه‌كه‌ ئەمریکا و هەڤپەیمان و دۆستێن کوردان نەبان، داعش دا ترازییا هەڤکێشا ئەقلیمی ب تمامی گوهۆڕیت، بەلێپا هه‌كه‌ هەر چبیت، شەڕ ئه‌نجامە و کا دێ ئەو ئەنجام بۆ کوردان چلێهێت.
داعش کەڤتە د قۆناغا دووێدا، ژبەر کو دەست ب تەقاندنان کر و ئەڤە نیشانەکا ئاشکرایە کو شیانا هێڕشکرنێ نەمایە و ئه‌و کەڤتییە قۆناغا بەرگریکرنێ ژ دەسکەڤتێن خوه‌، ئەوێن ب ساناهی و ترساندنا لەشکرێ ئیراقێ یێ شکەستی بدەستخوه‌ڤە ئیناین، بەلێپا هێشتا ترسا وێ لسەر کوردستانێ مایە، ئەمریکا ژی هند چەکی نادەت کو ب تمامی داعش ژناڤبچیت، بەلکو هند چەکی ددەت ئەم بشێین بەرگرییا خوه‌ پێ بکەین و تەرازییا هێزێ وەکی وێ دڤێت ڕاگریت. نهۆ ژ هەموو دەمان پتر، پێدیڤییە ئەم داعشێ بخوینین و باش تێبگەهین، داكو بشێین ڕەفتارێ دگەل بکەین و هزرا خوه‌ د پێنگاڤا داهاتیدا بکەین، کا دێ چیکەن.
بێگومان سیاسەت زانستەکە و وەکی هەر زانستەکا دی، میتودێن شڕۆڤەکرنێ تێدا گەلەکن، بەلێپا ڕێیا کو هەموو پێ ئەرێدبن؛ مەنهەجێ پراگماتی زانستییە، زانا ب دەهان ساڵان ژییێ خوه‌ تەرخان دکەن بۆ تێگەهشتنا زڤڕۆکا ژیانا میکروبەکی، کو زیان نەتنێ بۆ وی هەیە، بەلکو بۆ هەموو مرۆڤایەتیێ و چێدبیت وی میکرۆبی نێزیکترین کەسێ زانای نەساخ کربیت و ژناڤبربیت، ماچێدبیت زانا خوه‌ سلکەت و ئامیرێن تاقیگەهێ بشکێنیت و میکرۆبی بسۆژیت! بەلێپا دێ بینین ب دەهان ساڵان ژ ژیانا خوه‌ تەرخانکەت داكو دژمنێ خوه‌ و دژمنێ مرۆڤایەتیێ بنیاسیت، چنکو هه‌كه‌ نەنیاسیت، ئه‌و نەشێت بزانیت دێ چاوا ژناڤبەت و دێ چاوا کۆتایێ پێ ئینیت، داكو بەرگریێ ژ نەژادێ مرۆڤان بکەت.
شرۆڤەکرنا چالاکیێن داعشێ و ڕێکخراوێن وەک وێ، ئەرکەکە بۆ هەر قۆتابییەکێ سیاسەتێ، چنکو داعش ترسا نۆکەیە و میکرۆبەکە، له‌و دڤێت ب باشترین شێواز زڤڕۆکا ژیان و چێبوونا وێ بهێته‌ خواندن، نەتنێ خەبەرا بێژینێ و خوه‌ ژێ بدەینە پاش، خواندن لسەر ڤێ ڕێکخراوێ گەلەک دکێمن، چنکو ژییێ ڤێ ڕیکخراوێ یێ کورتە و ب ماوەیه‌کێ کورت سەر ژ هەموو ڕێکخراوێن تیرۆریستی ستاند و بوو خالا گەرم د نووچەیێن دونیایێدا. مە دەست دگەل شەڕێ داعشدا نەبوو، نەب هەلبژاردنا مە هاتە ئەنجامدان، بەلکو وەکی هەموو شەڕێن دی کو بسەرێ کوردان هاتین شەڕەکێ بسەرمەدا چەسپاندیبوو، ئێک ژ خەلەتیێن کوژەک کو داعش پووچکری، بڕیارا شەڕێ وێ بوو دگەل کوردان، چنکو کوردان ل دەستپێکێ بێلایەنییا خوه‌ ب ئاشکرایى دیارکر و دگۆت: ئەم خوه‌ تێکەلی ڤی شەڕی ناکەین، ئەڤ بڕیارا داعش بوو مایێ پووچبوونا وێ و هه‌كه‌ شەڕێ کوردان نەکربا، ب دڵنیاییڤە دبێژم: نهۆ بێگومان بەغدا ژی گرتبا و بەرەڤ سعۆدیێ ژی چووبان، ئەوان خوه‌ ل چیاییەکیدا نەدزانی چەندێ بهێزە، نەدزانی دێ دوماهییا وان کوردستان بیت.
ژ ڕوویێ هەواڵگریێ، مە گەلەک کێماسیێن هەین، هەردەم داعش پتر تشتا ژ مە دزانیت کو ئەم لسەر وێ دزانین، ڤێجا ژبەر بەرەڵلایی و بێسەروبەرییا میدیا کوردی بیت، ئان ژبەر نەزانینا مە بۆ ئیداره‌یا شەڕی، ئان هەر هویەکێ دی بیت، دئەنجامدا ئەم چو ژێ نزانین، ئەم نزانین کا شانێن وێ چەندن و هەرچەند مرۆڤان سەرکردەیه‌ک هەیە و چ جۆرێ چەکی هەیە و کا دڤێت چیبکەن، ئەم دێ مینین ل هیڤییا ڕەفتارا وان و لسەر وێ ڕەفتارێ ژ نوو دێ هەست ب خوه‌ کەین و دێ سەروبەرێ خوه‌ لسەر ڕەفتارا وان کەین، ئەڤەژی کارەساتەکا مەزنە و بۆ مە دیاردکەت کو دەزگەهێن هەواڵگرییا مە ب ئەکادیمی کارێ خوه‌ ناکەن، ئانکو هندێ ژێ دزانن. داعش، وەکی هەر ڕێکخراوەکا دی یا تیرۆریستی مانا وێ یا ب چالاکیێن وێڤە گرێدایە، هه‌كه‌ چالاکی نەمینن، دێ پووچ بیت و بەرەڤ نەمانێ چیت، وەک؛ قاعیدە، بوکۆ حەرام، جەبها پۆلیساریوو، پڵنگێن تامیل. ئەڤە هەموو ژبەر بێچالاکیێ دکەڤنە حالێ لاوازبوونێدا. ته‌تنێ دەما چالاکییان دکەن، هێز و سەهما وان زێدەدبیت و ناڤودەنگێ وان دەردکەڤیت، بۆ نموونە؛ قاعیدە کو ل جیهانێ مەزنترین ڕێکخراوا تیرۆریستی بوو و کارێن ناڤدەولەتی دکرن و ناڤودەنگێ وێ بەڵاڤببوو، بەلێ دەما چالاکی نەمینن، ناڤودەنگ نامینن.
پێکهاتێن داعش چوار بەشن:
١. ئەو سەرێن داعش کو ژ دەرڤە هاتین و ئەرکێ وان تەجنیدکرن و تەنفیزا ئەجندایەکێ تایبەتە بۆ جهێن تایبەت بەرامبەر تشتەکێ دیارکری.
٢. جیهادی، ئامیرەکێ تەنفیزسیە، ئەوێن ژ هەموو لایێن جیهانێڤە دهێن بۆ جیهادێ، یێ هاتی بۆ خەلاتەکێ پاشەرۆژێ و ژیانەکا دی، یێ هاتی داكو بهێتە کوشتن، حوری و بەحەشت و ئەرکێ ئاینی.
٣. لەشکرێ مجند، ئەون یێن ل گوند و باژێڕان دگەهنە ڤێ ڕیکخراوێ بۆ تالان و تۆلەڤەکرن و ژن و دەستکەڤتان کو ب ڕێیەکا ئایدیۆلۆجی دهێتە رازیکرن ب گه‌ره‌نتیكرنا دین و دونیایێ.
٤. ئەو ئیسلامیێن نەوێرن ژبەر بارودۆخێ سیاسی باخڤن و مەرەما خوه‌ ب دورستی دیارکەن و نەشێن ئیدانه‌یا داعش ژی بکەن، چنکو دگەل بیروباوەرییا وان پێڤاژ دبیت و دگەل ئیدیعا و گۆتنێن وان ئێکناگریت.
دەما دبێژن: ئەمریکا دەستێ دگەل هەی، ئەز ئێکسەر دبێژم: ڕاستە، چنکو ئەز دزانم کو ئەمریکا ئێک مسقال ئەخلاق د سیاسەتا وێ یا دەرڤەدا نینە، گەلەک ب ساناهی دێ هەر مللەتەکی ژناڤبەت هه‌كه‌ بەرژەوەندیێن وێ بخوازن، هەروەسا دزانم کو ئەوڕۆپا ژبەر چاڤڕەشییا مە نینە ڤێ بۆ مە دکەت، چنکو بەری سێ هەیڤان ژ نهۆ ئامادەنەبوون ناڤێ کوردستانێ ژی بینن، ژبەر هندێ ئەز هەردبێژم: ئەم پێدڤی ب خوه‌ڕێکخستن و خوه‌ئامادەکرنێینە، دڤێت ئەم ب خوه‌ بارێ هه‌رێمی بخوینین و وەکی هەموو جاران ب هیڤییا خودێ بتنێڤە نەهێلین کو ئاشێ مە بگێڕیت.

بابه‌تێن ب ڤێ مژارێ ڤه‌ گرێدای